ޢުމްރާއަށް މީހުން ގެންދިޔުމުގެ އުޞޫލާ ޚިލާފުވާ ކުންފުނިތަކާމެދު ފިޔަވަޅު އަޅަން ނިންމައިފި

އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެފައިވަނީ ޢުމްރާއަށް މީހުން ގެންދިޔުމުގެ އުޞޫލާ ޚިލާފުވާ ކުންފުނިތަކާމެދު ފިޔަވަޅު އަޅަމުން ގެންދާނެ ކަމަށެވެ. މިކަން އެމަނިކުފާނު ވިދާޅުވެފައިވަނީ ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.

ވަޒީރު ވިދާޅުވިގޮތުގައި ޢުމްރާއަށް މީހުން ގެންދިޔުމުގައި ޢަމަލުކުރުމަށް ގެޒެޓްކޮށްފައިވާ އުޞޫލުތަކާއި، ކުންފުނިތަކުން އެ ވުޒާރާއާއެކު ވެފައިވާ އެއްބަސްވުންތަކާ ޚިލާފުވާ ފަރާތްތަކަށް ނުވަތަ އެއަށް ޢަމަލު ނުކުރާ ފަރާތްތަކަށް ޤަވާޢިދުގައިވާ ގޮތުގެ މަތިން ފިޔަވަޅު އަޅާނެއެވެ. މީގެ ތެރޭގައި އުޞޫލުގެ 19 ވަނަ މާއްދާއަށް ޢަމަލުކޮށްފައި ނުވާ ކުންފުނިތަކާމެދު ފިޔަވަޅު އެޅުމާއި، ހުއްދަ ބާޠިލުކުރުން ހިމެނެއެވެ.

އިސްލާމީ ކަންތައްތަކާބެހޭ ވުޒާރާއިން މިއަހަރުގެ ތެރޭގައި ވަނީ ރާއްޖެއިން މީހުން ޢުމްރާއަށް ގެންދާ ކުންފުނިތަކަށް އެކަމުގެ ހުއްދަ ހޯދުމަށް ކޮންމެ އިރެއްގައިވެސް އެދެވޭގޮތަށް އައު އުޞޫލެއް އެކުލަވާލާފައެވެ. މި އުޞޫލުގެ ދަށުން، އެއްބަސްވުމާ ޚިލާފުވާ ކުންފުނިތައް 1،000 ރުފިޔާއާއި 100،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ. އަދި ހުއްދަ ނެތި ޢުމްރާއަށް މީހުން ގެންދާ ކުންފުނިތައް 100،000 ރުފިޔާއާއި 500،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.

މީގެ އިތުރުން، މައްސަލައިގެ ބާވަތަށް ބަލައި، ޖިނާއީ މައްސަލަތައް ދިވެހި ފުލުހުންގެ ޚިދުމަތަށް ފޮނުވައި، މަދަނީ މައްސަލަތައް އެޓަރނީ ޖެނެރަލްގެ އޮފީހަށް ފޮނުވާނެ ކަމަށްވެސް އުޞޫލުގައި ބަޔާންކޮށްފައިވެއެވެ.

މިހާރު 50 އަށްވުރެ ގިނަ ކުންފުންޏަކަށް ޢުމްރާއަށް މީހުން ގެންދިޔުމުގެ ހުއްދަ ދޫކޮށްފައިވާއިރު، ފަހަކަށް އައިސް ރާއްޖެއިން ޢުމްރާއަށް ދާ މީހުންގެ އަދަދު އިތުރުވަމުން އަންނަކަން ފާހަގަކުރެވެއެވެ. މި ޑިސެންބަރު މަހު އެކަނިވެސް 5،000 އަށްވުރެ ގިނަ މީހުން ޢުމްރާގެ އަޅުކަން އަދާކުރުމަށް ދާނެކަމަށް ލަފާކުރެވެއެވެ.