ޚަބަރު
ނޭޕާލު އަންހެނެއް މަރުވި ޙާދިސާގެ ތަޙުޤީޤު ފުލުހުން ފަށައިފި

އައިޖީއެމްއެޗް ފޮޓޯ:އެޑިޝަން
އައި.ޖީ.އެމް ހޮސްޕިޓަލުގެ އިމަޖެންސީ ރޫމަށް ގެނެވުނު 25 އަހަރުގެ ނޭޕާލު އަންހެނެއް ކަމަށްވާ ކަންޗަން ދުންގެލްގެ މަރުގެ މައްސަލަ މިއަދު ހެނދުނު ފުލުހުންނަށް ރިޕޯޓުކޮށްފިއެވެ.
ތަޙުޤީޤަށް އެނގިފައިވާ ގޮތުގައި ކަންޗަން ދުންގެލް ހޮސްޕިޓަލަށް ގެނެސްފައިވަނީ ވަރަށް ބޮޑަށް ބަނޑުގައި ރިހުމާ ގުޅިގެންނެވެ. އަދި ހޮސްޕިޓަލަށް ގެނައުމުގެ މަގުމަތީގައި ކަންޗަން ދުންގެލްގެ ޚަބަރު ހުސްވިކަން ފާހަގަކުރެވިފައިވެއެވެ.
މެޑިކޯ-ލީގަލް ރިޕޯޓުގައި ކަންޗަން ދުންގެލްގެ މަރުގެ ސަބަބު "އެނގިފައިނުވާ" ކަމަށް ވަނީ ބަޔާންކޮށްފައެވެ. ރިޕޯޓުގައި، ޖިންސީ އަނިޔާއެއް ލިބިފައިވާކަން އެއްވެސް މިންވަރަކަށް ފާހަގަ ކޮށްފައިނުވެއެވެ. އަދި ކަންޗަން ދުންގެލް އަކީ އެނީމިއާގެ މެޑިކަލް ހިސްޓްރީއެއް އޮންނަ މީހެއްކަން އެނގިފައިވެއެވެ.
ކަންޗަން ދުންގެލްގެ ހަށިގަނޑާ ސްޕޮންސަރގެ ފަރާތުން ޙަވާލުވެފައި ނުވާތީ ކަންޗަން ދުންގެލްގެ ހަށިގަނޑު މޯޗަރީއަށް ގެންގޮސްފައިވަނީ ފުލުހުންގެ ޙަވާލުގައެވެ.
މި މައްސަލަ ފުލުހުން ގެންދަނީ ތަޙުޤީޤު ކުރަމުންނެވެ.ކަންޗަންގެ މަރުގެ ޙަޤީޤަތް ހޯދުމަށް ފުލުހުން މަސައްކަތް ކުރަމުންދާއިރު، އިތުރު މަޢުލޫމާތު ލިބުމުން އާންމުކުރާނެ ކަމަށް ފުލުހުން ވަނީ ބުނެފައެވެ.