ދުނިޔެ
ސްރީ ލަންކާގެ މާލީ ޙާލަތު ރަނގަޅުވުމުން: މޫޑީސްއިން ކްރެޑިޓް ރޭޓިންގ މަތިކޮށްފި

ސްރީލަންކާ ފޮޓޯ : އިންޓަނެޓް
ޤައުމުތަކުގެ މާލީ ޙާލަތާއި ދަރަނި ދެއްކުމުގެ ޤާބިލުކަން ވަޒަންކުރާ އަމިއްލަ ކުންފުންޏެއް ކަމަށްވާ މޫޑީސްއިން ސްރީ ލަންކާގެ ކްރެޑިޓް ރޭޓިންގ މަތިކޮށްފިއެވެ. މޫޑީސްއިން މިހާރު ވަނީ ސްރީ ލަންކާއަށް ދީފައިވާ ރޭޓިންގ ސީއޭއިން ސީއޭއޭ1 އަށް މަތިކޮށްފައެވެ.
2022 ވަނަ އަހަރުގެ މެއި މަހުގެ ތެރޭގައި ބޭރުގެ ލޯނުތައް އަދާ ނުކުރެވޭ ވަރަށް ސްރީ ލަންކާގެ މާލީ ޙާލަތު ފުރަތަމަ ފަހަރަށް ގޯސްވީ ދަރަނި ގިނަވެ ދައުލަތުގެ ރިޒާވްގައި ހުރި ފައިސާގެ ޢަދަދު ދަށަށް ދިއުމުންނެވެ. އެހެންނަމަވެސް، މިހާރު މޫޑީސުން ރޭޓިންގ މަތިކޮށްފައި މިވަނީ ސްރީ ލަންކާއިން ދައްކަންޖެހޭ 12.55 ބިލިއަން އެމެރިކާ ޑޮލަރުގެ ދަރަނި ދައްކާނެ ގޮތުގެ ރޭވުންތައް މިދިޔަ ހަފުތާގައި އަލުން އެކުލަވާލައިފައި ވަނިކޮށެވެ.
މޫޑީސްއިން ބުނެފައިވާ ގޮތުގައި ފާއިތުވި ދެ އަހަރުގެ ތެރޭގައި ސްރީ ލަންކާގެ މާލީ ޙާލަތު ރަނގަޅުވެފައިވާ ކަމަށާއި ދަރަނި ނުދެއްކޭ ވަރަށް ނުވަތަ ސަރުކާރު ނުހިންގޭ ވަރަށް ޤައުމުން ފައިސާ ހުސްވުމުގެ ފުރުޞަތު ކުރިއަށް ވުރެ ކުޑަވެފައިވާ ކަމަށެވެ.
މީގެ އިތުރުން، މާލީ ޙާލަތު ވަޒަންކުރާ މަޝްހޫރު އެހެން ކުންފުންޏެއް ކަމަށްވާ ފިޗުން ވެސް ވަނީ ސްރީ ލަންކާގެ ރޭޓިންގ ރިސްޓްރިކްޓެޑް ޑިފޯލްޓުން ސީސީސީ ޕްލަސްއަށް ހުކުރު ދުވަހު މަތިކޮށްފައެވެ.
ސްރީ ލަންކާގެ މާލީ ޙާލަތަށް ހެޔޮ ބަދަލެއް އައިސްފައި މިވަނީ އެ ޤައުމުގެ އިންފްލޭޝަންގެ ނިސްބަތަށް ވެސް ހެޔޮ ބަދަލެއް އައިސްފައި ވަނިކޮށެވެ. މިދިޔަ ނޮވެމްބަރު މަހު އިންފްލޭޝަން ރޭޓު ވަނީ -1.7 އިންސައްތައަށް ދަށްވެފައެވެ. މިއީ ފާއިތުވި ނުވަ އަހަރުގެ ތެރޭގައި އެ ޤައުމުގެ އިންފްލޭޝަން އެންމެ ދަށްވި މިންވަރެވެ.
ހިނގަމުންދާ 2024 ވަނަ އަހަރު ސްރީ ލަންކާގެ އިޤްތިޞާދު 4.5 ނުވަތަ 5 އިންސައްތައިން އިތުރުވާނެ ކަމަށް ބެލެވެއެވެ. މިއީ ވޯލްޑް ބޭންކުން ލަފާކޮށްފައިވާ 4.4 އިންސައްތައަށް ވުރެ މަތީ ޢަދަދެކެވެ.