ފުރަތަމަ ފަހަރަށް ޙައްޖަށް ދާ މީހުންނަށް އިސްކަން ދިނުމަށް އިސްލާމިކް މިނިސްޓަރު އާންމުންގެ ޚިޔާލު ހޯއްދަވައިފި

އިސްލާމިކް މިނިސްޓަރު މުޙައްމަދު ޝަހީމް ޢަލީ ސައީދު ވަނީ ޙައްޖަށް ފޮނުވުމަށް ރާއްޖެއަށް ލިބޭ ކޯޓާއިން، ފުރަތަމަ ފަހަރަށް ޙައްޖަށް ދާ މީހުންނަށް އިސްކަން ދިނުމާ ގުޅޭ ގޮތުން އާންމުންގެ ޚިޔާލަށް މިއަދު އެދިވަޑައިގެންފައެވެ. މިނިސްޓަރު މި ޚިޔާލު ހޯއްދެވީ  ފޭސްބުކް ޕޭޖުގައި ކުރެއްވި ޕޯސްޓެއްގައެވެ.

މިނިސްޓަރު ޝަހީމް ވިދާޅުވި ގޮތުގައި، ބައެއް ޤައުމުތަކުގައި ފަރުޟު ޙައްޖު އަދާކޮށްފައި ތިބޭ މީހުންނަށް ދެވަނަ ޙައްޖެއް ކުރެވޭނީ ޙައްޖުކުރާތާ ފަސް އަހަރު ފަހުން ކަމަށް އުސޫލުތައް ހަދައިފައި އޮވެއެވެ. މިއީ ފުރަތަމަ ފަހަރަށް ޙައްޖުކުރަން އެދޭ ފަރާތްތަކަށް ފުރުޞަތު ދިނުމުގެ ގޮތުން ކުރާ ކަމެއް ކަމަށް އޭނާ ވިދާޅުވިއެވެ.

މިނިސްޓަރުގެ މި ޕޯސްޓަށް ގިނަ ބަޔަކު ވަނީ ތާއީދުކޮށްފައެވެ. ބައެއް މީހުން ވަނީ އުމުރުން ދުވަސްވީ މީހުން ޙައްޖު ކިޔޫގައި ޖެހި އަހަރުތައް ފާއިތުވާއިރު ވެސް ހައްޖުވުމުގެ ފުރުޞަތު ނުލިބޭ ކަމުގެ ކަންބޮޑުވުން ފާޅުކޮށްފައެވެ. މިފަދަ ކަންބޮޑުވުންތަކަށް ހައްލު ހޯދައި ދޭން މަސައްކަތް ކުރައްވާނެ ކަމަށް މިނިސްޓަރު ވަނީ ވިދާޅުވެފައެވެ.

ރާއްޖެއަށް އާންމު ގޮތެއްގައި ލިބެނީ 1،000 ޙައްޖު ކޯޓާ ކަމަށްވާއިރު، މިނިސްޓަރު ޝަހީމް ވަނީ ކޯޓާ އިތުރުކުރަން މަސައްކަތް ކުރައްވާނެ ކަމަށް މީގެ ކުރިން ވިދާޅުވެފައެވެ. އަދި ޙައްޖުގެ ކަންކަން ހަރުދަނާކޮށް އަގު ވެސް ކުޑަ ކުރުމަށް ކަމާ ގުޅުން ހުރި އިދާރާތަކުން މަސައްކަތް ކުރާ ކަމަށް ވެސް  ވިދާޅުވެފައިވެއެވެ.

ސަރުކާރުން ވަނީ ޙައްޖަށް މީހުން ގެންދަން ލިބޭ ހުރިހާ ކޯޓާއެއް ޙައްޖު ކޯޕަރޭޝަނަށް ދޭން ނިންމައިފައެވެ. ނަމަވެސް، އަންނަ އަހަރުން ފަށައިގެން ކޯޓާ އިތުރުވެއްޖެ ނަމަ، އިތުރުވާ ބައިން އަމިއްލަ ޖަމާއަތްތަކަށް ދިނުމުގެ ވިސްނުން ވެސް ގެންގުޅުއްވާ ކަމަށް މިނިސްޓަރު ޝަހީމް ވިދާޅުވެފައިވެއެވެ.