ދެބެއިންގެ ގޯލުތަކުން އައްޑޫ ބަލިކޮށް އޭދަފުށިން ގޯލްޑް ކަޕް ކާމިޔާބުކޮށްފި

ނައިންޓީ ޕްލަސް ގޯލްޑް ކަޕްގެ ފައިނަލުގައި 2-0 އިން އައްޑޫ ސިޓީ ބަލިކޮށް، އޭދަފުށިން މުބާރާތުގެ ތަށި އުފުލާލައިފިއެވެ. އޭދަފުށިން މެޗުގެ ކޮންމެ ހާފެއްގައި ގޯލެއް ކާމިޔާބު ކޮށްފައިވާއިރު، މި ގޯލުތައް ކާމިޔާބުކޮށްދިނީ އެ ޓީމަށް ކުޅެމުން އަންނަ ދެބެއިން ކަމުގައިވާ މުހައްމަދު ފާސިރު (ފާއްޓޭ) އާއި އަލީ ފާސިރު (ސެންޓޭ) އެވެ. 

ގިނަ އަހަރުތަކަކަށްފަހު ރާއްޖެއަށް ފުޓުބޯޅައިގެ އީދެއް ގެނައި ގޯލްޑް ކަޕްގެ ފައިނަލް މެޗު ޝަރަފުވެރިކޮށްދެއްވީ، ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒުއެވެ. މުބާރާތުގެ ޗެމްޕިއަން ޓީމަށް މެޑަލާއި ތަށި ހަވާލުކޮށްދެއްވީ ވެސް އެ މަނިކުފާނެވެ.

މި މެޗު ފެށުމަށް ރެފްރީގެ ކަށިގަނޑު ފުމެލި ހިސާބުން ފެށިގެން ފުރަތަމަ ހާފުގެ ކޮންޓްރޯލް ނެގީ އޭދަފުށިންނެވެ. އެގޮތުން އެ ޓީމުން ވަނީ އެއް ވާނެއްގައި އައްޑޫގެ ގޯލަށް ނުރައްކާކޮށްފައެވެ. އަދި ރަގަޅަށް ޑިފެންސް ކުރުމަށް ވިސްނައިގެން ދަނޑަށް ނިކުތް އައްޑޫ ސިޓީއިން ދިޔައީ އެމީހުންގެ ރޭވުމާ އެއްގޮތަށް އެކަން ރަގަޅަށް ކުރަމުންނެވެ. ނަމަވެސް ކައުންޓަރ އެޓޭކެއްގައި ނޫނީ އެ ޓީމަށް ރަގަޅު ހަމަލާއެއް އުފެއްދިފައެއް ނުވެއެވެ. އަދި އުފެއްދުނު ހަމަލާތައް ފެނުނީ ގޯލަކަށް ބަދަލު ކުރެވޭ ވަރަށް ވުރެން ނުރައްކާ ތެރިކަން ކުޑަކޮށެވެ.

ގިނަ ހަމަލާތަކަކަށްފަހު، މެޗުގެ ފުރަތަމަ ހާފު ނިމެން ވަގުތު ކުޑަތަންވެފައި ވަނިކޮށް އޭދަފުށިން ލީޑު ނެގިއެވެ. އެ ޓީމަށް ލިބުނު ކޯނަރެއް އައްޑޫގެ ގޯލު އޭރިއާ ތެރެއަށް ނަގައިދިންއިރު، އެތާ ހުސްކޮށް ހުރި މުހައްމަދު ފާސިރު (ފާއްޓޭ) ވަނީ ފަސޭހަކަމާއެކު ބޮލުން އެ ބޯޅަ ގޯލަށް ފޮނުވާލާފައެވެ.

މެޗުގެ ދެވަނަ ހާފުގެ ކުރީކޮޅު، އޭދަފުށިން ފުރަތަމަ ހާފެކޭ އެއްގޮތަށް އެޓޭކުތައް އުފެއްދި ނަމަވެސް، މެޗުގެ ފަހު 30 މިނެޓުގައި އައްޑޫއިން ވަނީ ކުޅުން ރަގަޅުކޮށް، ގިނަ ހަމަލާތަކެއް އުފައްދާފައެވެ. އަދި އެ ހަމަލާތައް ދިފާއު ކުރުމުގައި އޭދަފުށީގެ ޑިފެންޑަރުން ކެނޑިނޭޅި މަސައްކަތް ކުރަމުން ދިޔަތަން ފެނުނެވެ. 

އޭދަފުށިން މުބާރާތުގެ ޗެމްޕިއަންކަން ޔަގީން ކުރީ، މެޗުގެ 90 ވަނަ މިނެޓުގައި ސެންޓޭ ކާމިޔާބުކޮށްދިން ރީތި ގޯލާއެކުއެވެ. ވާތް ފަރާތުން އައްޑޫގެ ޕެނަލްޓީ އޭރިއާގެ ކަނާދިމާލުން ޕެނަލްޓީ އޭރިއާގެ ތެރެއަށް ވަނުމަށްފަހު، ޑިފެންޑަރެއް ކައިރިން ނައްޓާލުމަށްފަހު އޭނާ ބޯޅަ ފޮނުވާލީ ތިރިތިރިން ދުރުކަނަށެވެ. ގޯލާއެކު ތަށި ޔަގީންކޮށް، އޭދަފުށީގެ ސަޕޯޓަރުންގެ ތަރުހީބުގެ އަޑު އިތުރަށް ގަދަކުރިއެވެ. 

މެޗަށްފަހު އައްޑޫ ބަހުން ދިން އިންޓަވިއުއެއްގައި އައްޑޫގެ ކެޕްޓަން، ޝަމްވީލް ގާސިމް ބުނީ، ފައިނަލް މެޗު ކާމިޔާބު ކުރުމަށް އެ ޓީމުން ގިނަ މަސައްކަތްތަކެއް ކުރި ކަމަށާއި، ނަމަވެސް މޮޅަށް ކުޅެމުންދިޔަ އޭދަފުށި ބަލިކޮށްލުމަށް އެ މަސައްކަތް ނުފުދުނީ ކަމަށެވެ. 

އަނެއްކޮޅުން އޭދަފުށީގެ ކެޕްޓަން އިޝާން އިބްރާހިމް (ސައްޓު) ބުނީ، ކާމިޔާބީގެ ބޮޑު ބައެއް ސަޕޯޓަރުން ހިއްސާކުރާ ކަމަށާއި އެ ޓީމަށް އޮތް އެންމެ ބޮޑު ޓެކްޓިކަލް އެޓްވާންޓޭޖަކީ ފުރަތަމަ ޑިވިޝަނަށް ކުޅެމުން އަންނަ ބައެއް ކުޅުންތެރިން ތިބުން ކަމަށެވެ. 

ފައިނަލް މެޗުގެ މޮޅު ކުޅުންތެރިއަކަށް ހޮވުނީ، އޭދަފުށިން ލީޑު ނެގި ގޯލާއެކު މުބާރާތުގައި 7 ވަނަ ގޯލު ކާމިޔާބުކުރި ފާއްޓޭއެވެ. 

މި މުބާރާތުގެ އިތުރުން، އޭދަފުށިން ވަނީ އެންމެ ފަހުން އޮތް ގޯލްޑަން ފުޓްސަލް ޗެލެންޖުގެ ޗެމްޕިއަންކަން ވެސް ހޯދާފައެވެ. އެ މުބާރާތުގެ ފައިނަލުގައި އެ ޓީމުން ތިމަރަފުށި ބަލުކުރީ 4-2 އިންނެވެ.