ގޯލްޑް ކަޕްގެ މޮޅު ކުޅުންތެރިޔާގެ މަގާމު ފާއްޓޭއަށް

ނައިންޓީ ޕްލަސް ގޯލްޑް ކަޕްގެ ފައިނަލު މެޗުން އައްޑޫ ސިޓީ ބަލިކުރުމަށްފަހު މުބާރާތުގެ ޗެމްޕިއަންކަން އޭދަފުށިން ހޯދިއިރު، މުބާރާތުގެ މޮޅު ކުޅުންތެރިއަކަށް ހޮވުނީ އެ ޓީމުގެ ކާމިޔާބީގައި މުހިންމު ދައުރެއް އަދާކުރި މުހައްމަދު ފާސިރު (ފާއްޓޭ)އެވެ.

ފުރަތަމަ ޑިވިޝަނުގެ އޯލް ޔޫތު ލިންކޭޖް (އޭވައިއެލް) އަށް ކުރިން ކުޅެފައިވާ ފާއްޓޭ ވަނީ، ފައިނަލު މެޗުގައި ކާމިޔާބު ކުރި ގޯލާއެކު، ޖުމްލަ 7 ގޯލު ކާމިޔާބު ކޮށްފައެވެ. އޭނާއަށް މުބާރާތުގެ ރަން ބޫޓު އަތުނުވީ އެންމެ ގޯލެއްގެ ތަފާތުންނެވެ. 

މުބާރާތުގެ ފުރަތަމަ ބުރުގައި ތިން މެޗު ކުޅުނު އިރު، އެ ބުރުގައި އޭނާ ތިން ގޯލު ކާމިޔާބު ކޮށްފައިވެއެވެ. އެއީ ތިމަރަފުށި ކޮޅަށް ކާމިޔާބު ކުރި ދެ ގޯލާއި މާލޭ ސިޓީ ކޮޅަށް ކާމިޔާބުކުރި ގޯލެކެވެ. 

ދެވަނަ ބުރުގައި އޭނާ ދެ ގޯލު ކާމިޔާބުކޮށްފައި ވެއެވެ. އެއީ އެ ބުރުގެ ފަހު މެޗުގައި ދިއްދޫ ކޮޅަށް ކާމިޔާބުކުރި ދެ ގޯލެވެ. 

މީގެ އިތުރުން އޭނާ ގޯލް ޝީޓުން ޖާގަ ހޯދާފައިވަނީ ކުއާޓާ ފައިނަލުގައި އޭދަފުށިން ނައިފަރު 5-0 އިން ބަލިކުރި މެޗުގައި ކާމިޔާބުކުރި ގޯލަކުންނާއި، އަދި އެއަށްފަހު ފައިނަލުގައި އައްޑޫ ސިޓީއާ ދެކޮޅަށް ކާމިޔާބުކުރި ގޯލުންނެވެ.

މުބާރާތުގެ މޮޅު ކުޅުންތެރިޔާގެ އިތުރުން، ފާއްޓޭ ވަނީ ފައިނަލް މެޗުގެ މޮޅު ކުޅުންތެރިޔާގެ މަގާމު ވެސް ހޯދާފައެވެ.

ގޯލްޑް ކަޕްގެ ނިންމުމުގެ ރަސްމިއްޔާތުގައި ހޮވާފައިވާ މަގާމުތައް:

މުބާރާތުގެ އެންމެ މޮޅު ގޯލް ކީޕަރު: އަބްދުﷲ ޒިޔަޒަން (އޭދަފުށި)

ރަން ބޫޓު: ޖުމްލަ 8 ގޯލާއެކު އިބްރާހިމް އިމްރާން (ދ. މީދޫ) އަދި ކޯފީ އޮވޫސޫ (ފުވައްމުލަކު ސިޓީ) 

މުބާރާތުގެ އެންމެ މޮޅު ކުޅުންތެރިޔާ: މުހައްމަދު ފާސިރު (އޭދަފުށި)