ކުޅިވަރު

ބީޗް ވޮލީގެ ގައުމީ މުބާރާތުގެ ޗެމްޕިއަންކަން ކުޑަކާއްޓޭ އާއި އެޑަމް ހޯދައިފި

ބީޗް ވޮލީގެ ގައުމީ މުބާރާތުގެ ޗެމްޕިއަންކަން ކުޑަކާއްޓޭ އާއި އެޑަމް ހޯދައިފި

ގައުމީ ބީޗް ވޮލީބޯލް މުބާރާތުގެ ޗެމްޕިއަންކަން ހޯދާފައިވަނީ ކުޑަކާއްޓޭ އާއި އެޑަމް

މިފްތާޙް މުޙައްމަދު

މިފްތާޙް މުޙައްމަދު

25 ޑިސެމްބަރު 2024، 08:56

25 ޑިސެމްބަރު 2024، 08:56

ހުލާސާ

މިއީ މި މުބާރާތް ކުޑަކާއްޓޭ އާއި އެޑަމްގެ ޕެއާއިން ކާމިޔާބުކުރި ދެވަނަ ފަހަރު. ވީއޭއެމްއިން ބޭއްވި ފުރަތަމަ ބީޗް ވޮލީ ބޯލް ޗެމްޕިއަންޝިޕް ވެސް ކާމިޔާބުކޮށްފައި ވަނީ މި ޕެއާ.

ވޮލީ ބޯލް އެސޯސިއޭޝަން އޮފް ދަ މޯލްޑިވްސް (ވީއޭއެމް) އިން ބޭއްވި ނޭޝަނަލް ބީޗް ވޮލީ ބޯލް ޗެމްޕިއަންޝިޕް 2024ގެ ޗެމްޕިއަންކަން އިސްމާއިލް ސާޖިދު (ކުޑަކާއްޓޭ) އާއި އާދަމް ނަސީމް (އެޑަމް) ގެ ޕެއާ އިން ހޯދައިފިއެވެ. 

ހޯމަ ދުވަހުގެރޭ ރެޑްބުލް ބީޗް ވޮލީބޯލް ކޯޓުގައި ކުޅުނު ފައިނަލް މެޗު ކުޑަކާއްޓޭ އާއި އެޑަމްގެ ޕެއާ އިން ކާމިޔާބުކުރީ 2-1 ސެޓުންނެވެ. ފައިނަލުގައި އަނެއްކޮޅުން ވާދަކޮށްފައިވަނީ މުހައްމަދު އަލީ (ޑެންޒޯ) އާއި އަހުމަދު މުހައްމަދު (ކޯކޭ)ގެ ޕެއާއެވެ.

ފައިނަލު މެޗުގެ ފުރަތަމަ ސެޓު ކާމިޔާބު ކޮށްފައިވަނީ ޑެންޒޯ އާއި ކޯކޭގެ ޕެއާއިންނެވެ. މި ސެޓު އެ ޕެއާއިން ކާމިޔާބު ކުރީ 23-21 ޕޮއިންޓުންނެވެ.

ނަމަވެސް، މެޗުގެ ދެވަނަ ސެޓު ކުޑަކާއްޓޭ އާއި އެޑަމް ތަފާތު ބޮޑުކޮށް ކާމިޔާބުކުރިއެވެ. އެ ސެޓު 21-14 ޕޮއިންޓުން ކާމިޔާބު ކުރުމަށްފަހު، މެޗުގެ ފަހު ސެޓު ވެސް އެ ޕެއާ އިން ކާމިޔާބު ކުރިއެވެ. ފަހު ސެޓު ކާމިޔާބު ކޮށްފައިވަނީ 15-11 ޕޮއިންޓުންނެވެ. 

މިއީ މި މުބާރާތް ކުޑަކާއްޓޭ އާއި އެޑަމްގެ ޕެއާއިން ކާމިޔާބުކުރި ދެވަނަ ފަހަރެވެ. ވީއޭއެމްއިން ބޭއްވި ފުރަތަމަ ބީޗް ވޮލީ ބޯލް ޗެމްޕިއަންޝިޕް ވެސް ކާމިޔާބުކޮށްފައި ވަނީ މި ޕެއާއެވެ. 

މީގެ އިތުރުން، ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) އިން ބޭއްވި ބީޗްވޮލީބޯޅައިގެ ދެ މުބާރާތަކުން ކުޑަކާއްޓޭ އާއި އެޑަމް ވަނީ ރާއްޖެއަށް ރަން މެޑަލް ގެނަސްދީފައެވެ.

މި މުބާރާތުގެ ތިން ވަނަ ހޮވި މެޗު ކާމިޔާބު ކޮށްފައިވަނީ އަދުނާން އާއި ޝިމާލްގެ ޕެއާއިންނެވެ. އެ މެޗުގައި ނިހާދު އާއި ޔޫސުފްގެ މައްޗަށް، އަދުނާން އާއި ޝިމާލްގެ ޕެއާއިން ކާމިޔާބު ކުރީ ދެ ސެޓުންނެވެ. އެގޮތުން ފުރަތަމަ ސެޓު 21-7 ޕޮއިންޓުން ކާމިޔާބު ކުރިއިރު، ދެވަނަ ސެޓު ކާމިޔާބު ކޮށްފައިވަނީ 21-14 ޕޮއިންޓުންނެވެ.

މި ލިޔުން ކިޔާލުމުން

Ads by MSS