ގައުމީ ވޮލީ ލީގު ހޮނިހިރުގައި ފަށަނީ

ވޮލީބޯލް އެސޯސިއޭޝަން އޮފް ދަ މޯލްޑިވްސް (ވީއޭއެމް)ގެ ގައުމީ ވޮލީ ލީގު 28 ޑިސެންބަރު ވާ ހޮނިހިރު ދުވަހު ފެށުމަށް ތައްޔާރުވެއްޖެއެވެ. މި މުބާރާތް ޖެނުއަރީ 2 ވަނަ ދުވަހުގެ ނިޔަލަށް ކުރިޔަށްދާއިރު، މުބާރާތުގެ މެޗުތައް ކުޅޭނީ ސޯޝަލް ސެންޓަރުގެ އެތެރޭ ހޯލުގައެވެ.

މި ފަހަރުގެ މުބާރާތުގައި 5 ޓީމަކުން ވާދަކުރާނެއެވެ. އެގޮތުން މުބާރާތުގެ ޗެމްޕިއަންކަން އެންމެ ފަހުން ހޯދި ދިވެހި ސިފައިންގެ ކްލަބް (ޑީއެސްސީ)ގެ އިތުރުން، ޕޮލިސް ކްލަބް، ކްލަބް އެޗްޑީސީ، ސްޕޯޓްސް ކްލަބް ސިޓީ އަދި ބްލޫޒް ފޯރ ވޮލީބޯލް ވާދަކުރާނެއެވެ.

މުބާރާތުގެ ފުރަތަމަ މެޗުގައި ހޮނިހިރު ދުވަހުގެ ހަވީރު ބައްދަލު ކުރާނީ ސްޕޯޓްސް ކްލަބް ސިޓީ އާއި ބްލޫޒް ފޯރ ވޮލީބޯލްއެވެ. ނަމަވެސް މުބާރާތް ރަސްމީކޮށް ފަށާނީ، އެރޭ ކްލަބް އެޗްޑީސީ އާއި ޕޮލިސް ކްލަބް ބައްދަލުކުރާ މެޗުންނެވެ.

މި މުބާރާތަށް ޓީމުތައް ތައްޔާރުވަމުން އަންނަ އިރު، އެންމެ ރަގަޅަށް މުބާރާތުގައި ފެންނާނެ ކަމަށް ލަފާކުރެވެނީ ކްލަބް އެޗްޑީސީއެވެ. ސަބަބަކީ މި މަހު ނޭޕާލުގެ ކަތުމަންޑޫގައި ކުރިޔަށްދިޔަ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)ގެ މެންސް ވޮލީބޯލް ކްލަބް ޗެމްޕިއަންޝިޕްގައި އެ ޓީމު ވާދަކޮށްފައިވުމެވެ. ފަސް ޓީމު ވާދަކުރި އެ މުބާރާތުން އެޗްޑީސީއަށް ލިބުނީ ހަތަރު ވަނައެވެ.