ދުނިޔެ / ވިޔަފާރި
170 އަހަރުގެ ރޯޔަލް ވޮރަންޓްގެ ޝަރަފު ކެޑްބަރީއަށް ގެއްލިއްޖެ

ކެޑްބަރީގެ ޑެއިރީ މިލްކް ޗޮކޮލެޓް ފޮޓޯ: އިންޓަނެޓް
170 އަހަރު ވަންދެން ބްރިޓިޝް ރަސްކަމުގެ ރޯޔަލް ވޮރަންޓް ލިބިފައިވާ މަޝްހޫރު ޗޮކްލެޓް ބްރޭންޑް ކެޑްބަރީއަށް އެ ޝަރަފު ގެއްލިއްޖެއެވެ. ބާމިންގްހަމްގައި އުފައްދާ މި ޗޮކްލެޓަށް ފުރަތަމަ ރޯޔަލް ވޮރަންޓް ލިބުނީ 1854 ވަނަ އަހަރު ކުއީން ވިކްޓޯރިއާގެ ފަރާތުންނެވެ.
ކިންގް ޗާލްސް ތަޚުތަށް އަރައިވަޑައިގަތުމާއެކު، އޭނާގެ މަންމަ ކުއީން އެލިޒަބެތު ދެއްވާފައިވާ ރޯޔަލް ވޮރަންޓްތައް އަލުން މުރާޖަޢާކުރެއްވިއެވެ. މިގޮތުން ކުރިން ވޮރަންޓް ލިބިފައިވާ 386 ކުންފުންޏަކަށް އަލުން ވޮރަންޓް ދެއްވާފައިވާއިރު، ކެޑްބަރީ ހިމެނޭ މޮންޑެލީޒް އިންޓަނޭޝަނަލްއަށް ވޮރަންޓް ނުދެއްވުމަށް ނިންމަވާފައިވެއެވެ.
މޮންޑެލީޒްގެ ތަރުޖަމާނެއް ވިދާޅުވީ މި ނިންމެވުމާމެދު ހިތާމަކުރާ ކަމަށެވެ. އަދި ކުރިން ވޮރަންޓް ލިބިފައިވާތީ ފަޚުރުވެރިވާ ކަމަށާއި، މި ނިންމެވުމަށް އިޙްތިރާމްކުރާ ކަމަށެވެ.
ބާމިންގްހަމް ބިޒްނަސް ސްކޫލްގެ ޕްރޮފެސަރ ޑޭވިޑް ބެއިލީ ވިދާޅުވީ ރޯޔަލް ވޮރަންޓަކީ ކަށަވަރުކަމުގެ ތައްގަނޑެއް ކަމަށާއި، އެއީ ބްރިޓިޝް އިޤްތިޞާދަށް ވެސް މުހިންމު އެއްޗެއް ކަމަށެވެ. އަދި ވޮރަންޓް ގެއްލުމުން ކެޑްބަރީގެ ޚަރަދުތައް އިތުރުވާނެ ކަމަށް ވެސް އޭނާ ވިދާޅުވިއެވެ.
ކެޑްބަރީއަކީ 1824 ވަނަ އަހަރު ޖޯން ކެޑްބަރީ އުފެއްދެވި ކުންފުންޏެކެވެ. މިއަހަރަކީ ކުންފުނި އުފެދުނު ތާ 200 އަހަރު ފުރޭ އަހަރެވެ. 2010 ވަނަ އަހަރު އެމެރިކާގެ ކްރާފްޓް ފުޑްސްއިން ކެޑްބަރީ ގަތުމަށްފަހު، 2012 ގައި މޮންޑެލީޒްގެ ބައެއްގެ ގޮތުގައި ވަނީ ހިމަނާފައެވެ.