އޭއައި ޓެކްނޮލޮޖީ މެދުވެރިކޮށް ޓައިޕް 2 ޑައިބެޓީސް ކުރިއާލާ ދެނެގަތުމުގެ މަސައްކަތް ފަށައިފި

ލަންޑަނުގެ ދެ އެންއެޗްއެސް ހޮސްޕިޓަލް ޓްރަސްޓަކުން ޓައިޕް 2 ޑައިބެޓީސް ބަލި ޖެހުމުގެ 10 އަހަރު ކުރިން ބަލި ޖެހިދާނެކަން ދެނެގަތުމަށް އޭއައި ޓެކްނޮލޮޖީ ބޭނުންކުރަން ފަށައިފިއެވެ. އިމްޕީރިއަލް ކޮލެޖާއި ޗެލްސީ އަދި ވެސްޓްމިންސްޓަރ އެންއެޗްއެސް ފައުންޑޭޝަން ޓްރަސްޓްތަކުން މި މަސައްކަތް ފަށާފައިވަނީ "އެއަރ-ޑީއެމް" ނަމަކަށް ކިޔާ އޭއައި ސިސްޓަމެއް ތަމްރީނުކުރުމަށެވެ.

މި ސިސްޓަމުން ބަލަނީ ބަލިމީހުންގެ އީސީޖީ ހާޓް ޓްރޭސްތަކުގައި ހުންނަ ކުދިކުދި އިންޒާރުތަކެވެ. މިއީ ޑޮކްޓަރުންނަށް އާންމުކޮށް ދެނެގަތުމަށް އުނދަގޫ ކަންކަމެވެ. މި ސިސްޓަމުގެ ކްލިނިކަލް ޓްރަޔަލްތައް 2025 ވަނަ އަހަރު ފެށުމަށް ވަނީ ރޭވިފައެވެ.

ފުރަތަމަ ކުރެވުނު މަސައްކަތްތަކުން ދައްކާގޮތުގައި މި ސިސްޓަމަށް 70 އިންސައްތަ ފަހަރު ރިސްކު ދެނެގަނެވެއެވެ. ލީޑް ރިސާޗަރ ޑރ. ފު ސިއޯންގ ވިދާޅުވި ގޮތުގައި ބަލިމީހާގެ އުމުރު، ޖިންސު، ލޭގެ ޕްރެޝަރ މަތިވެފައިވޭތޯ އަދި ބަރުދަން ހުރި މިންވަރު ފަދަ އިތުރު މަޢުލޫމާތު ދިނުމުން މި ސިސްޓަމުގެ ނަތީޖާ އިތުރަށް ރަނގަޅުވެއެވެ.

މި ދެ ހޮސްޕިޓަލުގައި 1000 އާ ހަމައަށް ބަލިމީހުންގެ އީސީޖީ ސްކޭންތައް މި އޭއައި ސިސްޓަމުން ކިޔާނެއެވެ. މިއީ އަދި އާންމުކޮށް ހުރިހާ މީހުންނަށް ހުޅުވާލެވިފައިވާ ކަމެއް ނޫނެވެ. ނަމަވެސް އެންއެޗްއެސްގައި މި ޚިދުމަތް ފުޅާކުރުމަށް މާހިރުން އުންމީދުކުރެއެވެ. އެކަމަށް 5 އަހަރު ނުވަތަ އެއަށްވުރެ ގިނަ ދުވަސް ނަގާނެކަމަށް ޑރ. ސިއޯންގ ވިދާޅުވިއެވެ.

މި މަސައްކަތް ފަންޑުކުރާ ބްރިޓިޝް ހާޓް ފައުންޑޭޝަނުން ބުނާ ގޮތުގައި ޑައިބެޓީސްގެ ރިސްކު އޮތް މީހުން ދެނެގަތުމުން ފުރާނަ ސަލާމަތްކުރެވިދާނެއެވެ. ޓައިޕް 2 ޑައިބެޓީސް ކޮންޓްރޯލް ނުކުރެވި ހުރުމުން ހާޓް އެޓެކާއި ސްޓްރޯކް ޖެހުމުގެ ފުރުސަތު އޮވެއެވެ.

ޑައިބެޓީސް ޔޫކޭގެ ޑރ. ފޭ ރައިލީ ވިދާޅުވި ގޮތުގައި އިނގިރޭސިވިލާތުގައި އެކަނި 1.2 މިލިއަން މީހުން ޓައިޕް 2 ޑައިބެޓީސް ޖެހިފައިވާކަން ނޭނގި ތިބިއިރު، މިލިއަނުން ގުނާ އަދަދެއްގެ މީހުންނަށް މި ބަލި ޖެހުމުގެ ރިސްކު އެބައޮތެވެ. އެހެންކަމުން މި ބަލި ޖެހިދާނެ މީހުން ކުރިއާލާ ދެނެގަތުމަކީ ވަރަށް މުހިންމު ކަމެކެވެ.