ސައިންސް / ވިޔަފާރި
އެލްޖީގެ ޓްރާންސްޕޭރަންޓް ޓީވީ މާރކެޓަށް ނެރެފި: އަގަކީ 60،000 ޑޮލަރު

އެލްޖީގެ އައު އުފެއްދުން ފޮޓޯ:އިންޓަނެޓް
އެލްޖީ އިން އެ ކުންފުނީގެ އެންމެ ފަހުގެ އައު ޓެކްނޮލޮޖީ ބޭނުންކޮށްގެން ތައްޔާރުކޮށްފައިވާ ދެފުށްފެންނަ ޓްރާންސްޕޭރަންޓް ޓީވީ މާރކެޓަށް ނެރެފިއެވެ. މިއީ އެލްޖީގެ ސިގްނޭޗަރ އޯލެޑް ޓީވީ އެވެ. ބުދަ ދުވަހު އެލްޖީ އިން ހާމަކުރި ގޮތުގައި މި ޓީވީގެ ޕްރީ އޯޑަރ ކުރުމުގެ ފުރުސަތު މިހާރު ވަނީ ހުޅުވާލާފައެވެ. މި ޓީވީގެ އަގަކީ 60،000 އެމެރިކާ ޑޮލަރެވެ.
މި އަހަރުގެ ކުރީކޮޅު ބޭއްވުނު ސީއީއެސް މައުރަޒުގައި ފުރަތަމަ ދައްކާލި މި ޓީވީއަކީ 77 އިންޗީގެ 4ކޭ ސްމާޓް ޓީވީއެކެވެ. މި ޓީވީގެ ޚާއްސަ ކަމަކީ ޓީވީ ސްކްރީނުން އެއްކޮށް ދެފުށް ފެންނަ ގޮތަށް ހަދާލެވޭ ކަމެވެ. މީގެ ސަބަބުން ޓީވީ ބަހައްޓާފައި ހުންނަ ތަނުގެ ފަހަތުން ފެންނަ މަންޒަރު ނުބެދި ފެންނާނެއެވެ.
މި ޓީވީގައި ރިމޯޓް ކޮންޓްރޯލްގެ ބަޓަނެއް ފިއްތާލުމުން އަރައި ފައިބާ ކަޅު ފަރުދާއެއް ހަރުކޮށްފައިވެއެވެ. މި ަފރުދާ ތިރިކޮށްލުމުން ޓީވީ ވެގެންދާނީ އާންމު އޯލެޑް ޓީވީއަކަށެވެ. އަދި މަތިކޮށްލުމުން ދެފުށް ފެންނަ ޑިސްޕްލޭއަކަށް ބަދަލުވެގެންދާނެއެވެ.
އެލްޖީގެ ޕްރޮމޯޝަނަލް ފޮޓޯއެއްގައި މި ޓީވީ ބަހައްޓާފައި ވަނީ އޯޝަން ވިއުއެއް ލިބޭ ގޮތަށް ބޮޑެތި ބިއްލޫރި ކުޑަދޮރުތަކެއް ހުރި ކޮޓަރިއެއްގެ އެނދުގެ ކުރިމަތީގައެވެ. މި ޓީވީގެ ސަބަބުން ފެންނަ މަންޒަރު ނުބެދި، ޓީވީގެ ތެރެއިން އެ މަންޒަރު ފެންނާނެއެވެ.
މީގެ އިތުރުން މި ޓީވީ ބޭނުންކޮށްގެން ހައި-ރެޒޮލިއުޝަން، ދެފުށްފެންނަ ކެންވަހެއްގެ ގޮތުގައިވެސް ބޭނުންކުރެވޭނެއެވެ. މިގޮތުން ވީޑިއޯ، ފޮޓޯ ނުވަތަ އެނިމޭޝަން ދައްކާލެވޭނެއެވެ. މިސާލަކަށް ވިލާތަކާއި ކަހަނބުތައް ފަދަ ޤުދުރަތީ މަންޒަރުތައް ދެއްކިދާނެއެވެ.
މި ޓީވީ ފަރުމާކޮށްފައިވަނީ ގޭތެރޭގެ ޑިޒައިން އިތުރަށް ފުރިހަމަކޮށްދޭ ގޮތަށެވެ. އަދި މި ޓީވީއަށް ވީޑިއޯ އާއި އޯޑިއޯ ސިގްނަލްތައް ފޮނުވަނީ ވައިލެސްކޮށް، އެލްޖީގެ ޒީރޯ ކަނެކްޓް ބޮކްސް މެދުވެރިކޮށެވެ. މިކަމުގެ ސަބަބުން ވަޔަރުތަކުގެ ސަބަބުން ޖާގަ ބޭކާރުވުން ކުޑަވާނެއެވެ.
ސީއީއެސް 2024 ގައި މި ޓީވީއަށް ވަނީ "ބެސްޓް އޮފް އިނޮވޭޝަން" އެވޯޑު ލިބިފައެވެ. މި ޓީވީގެ ޕްރީ އޯޑަރ ކުރެވޭނީ އެލްޖީ.ކޮމް، ބެސްޓް ބައި އަދި ވީޑިއޯ އެންޑް އޯޑިއޯ ސެންޓަރ މެދުވެރިކޮށެވެ.
އޯލެޑް ޓީވީތަކަކީ އެލްސީޑީ ޓީވީތަކާ އަޅާބަލާއިރު ގިނަ ފައިދާތަކެއް ލިބޭ ޓީވީތަކެކެވެ. މީގެ ތެރޭގައި ރަނގަޅު ކޮންޓްރާސްޓް، އިތުރު އަލިކަން، ފުޅާ ކުލަތަކުގެ ދާއިރާ، އަވަސް ރިފްރެޝް ރޭޓް އަދި ބޮޑު ވިއުއިންގ އޭންގަލްއެއް ހިމެނެއެވެ. އޯލެޑް ޓީވީތަކުން ކަރަންޓު ބޭނުންކުރާ މިންވަރު ކުޑަވެ، އަދި ތުނި، ދެފުށްފެންނަ ޑިސްޕްލޭތައް އުފެއްދުމަށް މަގުފަހިވެއެވެ.
ނަމަވެސް އޯލެޑް ޑިސްޕްލޭތަކުގެ އުމުރު ކުރުކަމާއި އަގުބޮޑުކަން ފާހަގަކުރެވެއެވެ. އެލްޖީ ސިގްނޭޗަރ އޯލެޑް ޓީވީގެ އަގު ވަރަށް ބޮޑުކަން ފާހަގަކުރެވެއެވެ. އެހެންނަމަވެސް، ބޮޑު ސްކްރީނެއް ބޭނުންވާ ފަރާތްތަކަށް، ބައެއް ތަންތަނުގައި ގެއެއްގެ އަގަށްވުރެ ކުޑަ އަގެއްގައި، 77 އިންޗީގެ އޯލެޑް ޓީވީތައް 1،700 ޑޮލަރުން ފެށިގެން ލިބެން ހުރިކަން ފާހަގަކުރެވެއެވެ.