ހުޅުމާލޭގައި ޕާކުކޮށްފައި އޮތް ޓެކްސީއެއްގައި ރޯވި އަލިފާން ސިފައިން ނިއްވާލައިފި

ހުޅުމާލޭ ފޭސް 2 ގެ ހިތިގަސްމަގުގައި ޕާކުކޮށްފައި އޮތް ޓެކްސީއެއްގައި ރޭ މެންދަމު ރޯވި އަލިފާން، މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ވަނީ ނިއްވާލައިފައެވެ.

އެމްއެންޑީއެފްގެ މާލެ އޭރިއާ ކޮމާންޑް، ހުޅުމާލޭ ފަޔާ ސްޓޭޝަނަށް މި ހާދިސާގެ މަޢުލޫމާތު ލިބިފައިވަނީ ރޭ މެންދަމު 3:36 ހާއިރުގައި ކަމަށް ސިފައިން ބުނެއެވެ. މި ޚަބަރު ލިބުމާއެކު، އެ ފަޔާ ސްޓޭޝަނުގެ ފަޔާފައިޓަރުން ވަނީ ވަގުތުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފަށައިފައެވެ.

އެމްއެންޑީއެފްގެ ފަރާތުން މަޢުލޫމާތު ދެމުން ބުނެފައިވަނީ، ފަޔާފައިޓަރުންގެ ހަލުވި މަސައްކަތުން އަލިފާންގަނޑު ނިއްވާލެވިފައިވަނީ 4:01 ހާއިރު ކަމަށެވެ. އަދި މި ހާދިސާގައި އެއްވެސް މީހަކަށް އަނިޔާއެއް ވެފައި ނުވާ ކަމަށާއި، ނަމަވެސް ކާރަށް ބޮޑެތި ގެއްލުންތަކެއް ލިބިފައިވާ ކަމަށް ވެސް އެމްއެންޑީއެފްއިން ފާހަގަކޮށްފައިވެއެވެ.

ހުޅުމާލޭގެ ބޮޑެތި މަގުތަކުގައި ކާރު ޕާކުކުރުމަކީ ވަރަށް އާންމު ކަމެއް ކަމަށާއި، މިފަދަ ގޮތަކަށް ބަހައްޓާފައި ހުންނަ ކާރުތަކުން ވައްކަން ކުރުމަކީ ވެސް ދޭތެރެއަކުން ހިނގާ ކަމެއް ކަމަށް ފާހަގަކުރެވެއެވެ. މި ހާދިސާ ހިނގި ސަބަބާ ގުޅޭގޮތުން އިތުރު މަޢުލޫމާތެއް އަދި ހާމަކޮށްފައެއް ނުވެއެވެ.