މަސްވެރިންނަށް 48 ގަޑިއިރުގެ ކުރިން ފައިސާ ޖަމާކުރަމުންދާކަމަށް މިފްކޯއިން ހާމަކޮށްފި

މަސްވެރިން ކިރުވާ މަހަށް 48 ގަޑިއިރުގެ ކުރިން މިހާރު ފައިސާ ޖަމާކޮށްދެމުން އަންނަކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އިން ބުދަ ދުވަހު ހާމަކޮށްފިއެވެ.

މިފްކޯއިން ބުނީ، މަސްވެރިންނާއި އޮޑިވެރިންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ 48 ގަޑިއިރުގެ ތެރޭގައި ފައިސާ ދިނުމުގެ ވަޢުދު ވަނީ ފުއްދަވާފައި ކަމަށެވެ. އަދި މިއަހަރުގެ މަސްވެރިންގެ ދުވަހުން ފެށިގެން 48 ގަޑިއިރުގެ ތެރޭގައި އޮޑިވެރިންނަށް ފައިސާ ޖަމާކޮށްދެމުން އަންނަ ކަމަށް އެ ކުންފުނިން ފާހަގަކުރިއެވެ.

މިފްކޯއިން އިތުރަށް ހާމަކުރި ގޮތުގައި، 24 ގަޑިއިރުގެ ތެރޭގައިވެސް މިހާރު އޮޑިވެރިންނަށް އެމީހުން ކިރުވާ މަހަށް ފައިސާ ޖަމާކޮށްދެމުންދެއެވެ. މި މަސައްކަތުގައި ބޭންކް އޮފް މޯލްޑިވްސްއާއި، މާލީ ވުޒާރާއާއި މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާގެ ފަރާތުން ވަރަށް ބޮޑު އެހީތެރިކަމަކާއި އެއްބާރުލުމެއް ލިބެމުންދާ ކަމަށްވެސް މިފްކޯއިން ބުންޏެވެ.

މި ސަރުކާރު ވެރިކަމާ ހަވާލުވިއިރު، މަސްވެރިން ކިރުވާފައިވާ މަހަށް 230 މިލިއަނެއްހާ ރުފިޔާ ނުދީ އޮތް ކަމަށް މިފްކޯއިން ފާހަގަކުރިއެވެ. ނަމަވެސް ކުޑަ ދުވަސްކޮޅެއްގެ ތެރޭގައި އެ ފައިސާ ދިނުމަށްފަހު، މަސްވެރިންނާއި އޮޑިވެރިންނަށް މިހާތަނަށް ދޭންޖެހޭ ހުރިހާ ފައިސާއެއް ވަނީ ދީ ޚަލާސްކޮށްފައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވުމަށްފަހު މިހާތަނަށް އޮޑިވެރިންނަށް 973،744،789 ރުފިޔާ ވަނީ ދޫކޮށްފައެވެ. މިއީ 55،299 މެޓްރިކް ޓަނަށް ދޫކޮށްފައިވާ ފައިސާގެ އަދަދު ކަމަށާއި، މިއީ ރެކޯޑު އަދަދެއް ކަމަށްވެސް މިފްކޯއިން ފާހަގަކޮށްފައިވެއެވެ.