ވެލާނާ އިންޓާރނޭޝަނަލް އެއަރޕޯޓުން އެއް ދުވަހެއްގައި 1000 އެއަރ ޓްރެފިކް މޫވްމަންޓްގެ އައު ރެކޯޑެއް

ވެލާނާ އިންޓަނޭޝަ އިންޓަނޭޝަނަލް އެއަރޕޯޓް (ވީއައިއޭ) އިން އިއްޔެ އެއް ދުވަހެއްގެ ތެރޭގައި 1،000 އެއަރ ޓްރެފިކް މޫވްމަންޓް ފަހަނައަޅައި، އެއަރޕޯޓުގެ ތާރީޚުގައި މުހިންމު ރެކޯޑެއް ހާސިލްކޮށްފިއެވެ. މިއީ ވީއައިއޭގެ އޮޕަރޭޝަނަލް ތާރީޚުގައި 24 ގަޑިއިރުގެ ތެރޭގައި 1000 އަށް ވުރެ ގިނަ އެއަރ ޓްރެފިކް މޫވްމަންޓް ރެކޯޑްކުރެވުނު ފުރަތަމަ ފަހަރެވެ.

ވީއައިއޭއިން ދެއްވި މަޢުލޫމާތުގައިވާ ގޮތުން، މި ޖުމްލަ 1000 މޫވްމަންޓްގެ ތެރޭގައި 234 ރަންވޭ މޫވްމަންޓާއި 766 ސީޕްލޭން މޫވްމަންޓް ހިމެނެއެވެ. މި ފާހަގަކޮށްލެވޭ ކާމިޔާބީއަކީ މި ސަރަޙައްދުގެ މައި ހަބެއްގެ ގޮތުގައި އެއަރޕޯޓުގެ މުހިންމުކަން އިތުރުވަމުންދާކަން ހާމަކޮށްދޭ ކާމިޔާބީއެކެވެ.

ވީއައިއޭގައި އެއަރ ޓްރެފިކް މޫވްމަންޓް އިތުރުވެފައިވާ މިންވަރު ދައްކުވައިދެނީ ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވަމުންދާކަމެވެ. ޓޫރިޒަމް މިނިސްޓްރީން މަޢުލޫމާތު ދެއްވާފައިވާ ގޮތުގައި މިއަހަރުގެ މިހާތަނަށް 1،978،252 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ. އަދި މިއަހަރު ރާއްޖެއަށް ޒިޔާރަތްކުރާ ދެ މިލިއަން ވަނަ ފަތުރުވެރިޔާ މިއަންނަ ބުރާސްފަތި ދުވަހު ރާއްޖެ އަންނާނެކަމަށް ލަފާކުރެވެއެވެ.

މި ރެކޯޑު ހާސިލްކުރުމަކީ ރާއްޖޭގެ ފަތުރުވެރިކަމުގެ ސިނާޢަތަށް ލިބުނު ބޮޑު ކުރިއެރުމެއްގެ އިތުރުން، ވެލާނާ އިންޓަނޭޝަނަލް އެއަރޕޯޓުގެ ޤާބިލުކަން ދައްކުވައިދޭ މުހިންމު މިސާލެކެވެ. މިކަމުން ރާއްޖޭގެ އިޤްތިޞާދަށާއި ފަތުރުވެރިކަމުގެ ދާއިރާއަށް އިތުރު ކުރިއެރުންތަކެއް ލިބިގެންދާނެކަމަށް ބެލެވެއެވެ.