ޚަބަރު
މާލޭގެ މަގުތަކުން 150 އުޅަނދު ޓޯވ ކޮަށްފި

އުޅަންދެއް ޓޯވ ކުރަނީ ފޮޓޯ: ޕީއެސްއެމް
މާލޭގެ ކާރޫބާރު ބޮޑު މަގުތަކުގައި ޤަވާއިދާ ޚިލާފަށް ޕާކްކޮށްފައިވާ އުޅަނދުތައް ނެގުމުގެ މަސައްކަތުގެ ދަށުން 150 އުޅަނދު ޓޯވކޮށްފިއެވެ. މި ޚާއްޞަ އޮޕަރޭޝަން ފުލުހުން ފަށާފައިވަނީ ބުރާސްފަތި ދުވަހުއެވެ.
ދިވެހި ފުލުހުންގެ ޚިދުމަތުން މަޢުލޫމާތު ދެއްވިގޮތުގައި، މި މަސައްކަތް ކުރިއަށްދަނީ ބޮޑުތަކުރުފާނު މަގު، އަމީނީ މަގު، މަޖީދީ މަގު، އޯކިޑް މަގު، އަމީރު އަޙްމަދު މަގު އަދި ސޯސަން މަގުގެ އިތުރުން، އައިޖީއެމްއެޗް އަދި ވިލިގިލި ފެރީޓާމިނަލް ސަރަހައްދުގައެވެ.
ޓޯވ ކުރެވެނީ ދަތުރުފަތުރަށާއި ޕަބްލިކް ޓްރާންސްޕޯޓަށް ދަތިވާގޮތަށް ގަވައިދާ ޚިލާފަށް ޕާކުކޮށްފައި ހުންނަ އުޅަނދުތަކެވެ.
ފުލުހުން ވިދާޅުވިގޮތުގައި، މިހާތަނަށް ޓޯވކޮށްފައިވާ 150 އުޅަނދަކީ މުޅިންވެސް ސައިކަލެވެ. ޓޯވކުރާ އުޅަނދުތައް އަނބުރާ ގެންދިއުމަށް ވެރިފަރާތަށް 7 ދުވަހުގެ މުއްދަތެއް ދެވޭނެއެވެ. ދެމަސް ދުވަސްފަހުން އެ އުޅަނދުތައް ނުގެންގޮސްފިނަމަ، ރަޖިސްޓްރީ ބާޠިލުކުރުމަށް ދަތުރުފަތުރާބެހޭ ވުޒާރާއަށް ހުށައަޅާނެކަމަށާއި، ރަޖިސްޓްރޭޝަން ބާޠިލުކުރާ އުޅަނދުތައް ނައްތާލުމުގެ މަސައްކަތްވެސް ކުރާނެކަމަށް ފުލުހުން ވިދާޅުވިއެވެ.
މާލޭގެ މަގުތަކުގެ ސަލާމަތާއި ރައްކާތެރިކަން ކަށަވަރުކޮށް، މަގުތައް ތަރުތީބު ކުރުމަށް ފުލުހުން ކުރަމުންދާ މި މަސައްކަތްތަކަށް އާންމުންގެ ފަރާތުން އެއްބާރުލުން ދިނުމަށް ފުލުހުން އެދިވަޑައިގެންފައިވެއެވެ. އަދި މިހާތަނަށް ލިބިފައިވާ އެހީތެރިކަމަށް ފުލުހުން ވަނީ ޝުކުރުއަދާކުރައްވާފައެވެ.