ކަޒަކިސްތާނުގައި މަތިންދާބޯޓެއް ވެއްޓި 42 މީހުން މަރުވެއްޖެ

އަކްޓައު ސިޓީ ކައިރީގައި މަތިންދާބޯޓެއް ވެއްޓި، އެހާދިސާގައި މަދުވެގެން 42 މީހުން މަރުވެފައިވާ ކަމަށް ބެލެވޭ ކަމަށް އޭޕީ އިން ރިޕޯޓުކޮށްފިއެވެ. ބުދަ ދުވަހު ހިނގި މި ހާދިސާގައި ދިރި ތިބި މީހުންވެސް ތިބި ކަމަށް ފުރަތަމަ ރިޕޯޓުތަކުން ދައްކައެވެ.

ކަޒަކިސްތާނުގެ ކުއްލި ނުރައްކަލުގެ މިނިސްޓްރީން ޓެލެގްރާމްގައި ދީފައިވާ ބަޔާނެއްގައި ބުނެފައިވަނީ މި މަތިންދާބޯޓުގައި 5 ކުރޫ މެންބަރުންނާއެކު 67 މީހުން ދަތުރުކުރި ކަމަށެވެ. އަދި ފުރަތަމަ އެސެސްމަންޓުން ދައްކާ ގޮތުގައި 25 މީހުން ދިރި ތިބި ކަމަށާއި، 22 މީހުން ހޮސްޕިޓަލުގައި އެޑްމިޓްކޮށްފައިވާ ކަމަށެވެ.

މި މަތިންދާބޯޓުގައި ދަތުރުކުރި 37 މީހުންނަކީ އަޒަރުބައިޖާނުގެ ރައްޔިތުންނެވެ. އަދި 16 މީހުންނަކީ ރަޝިޔާގެ ރައްޔިތުންނެވެ. މީގެ އިތުރުން 6 ކަޒަކިސްތާނު އަދި 3 ކިރުގިސްތާނު ރައްޔިތުން ހިމެނެއެވެ.

ރަޝިޔާގެ ނޫސްތަކުން ބުނާ ގޮތުގައި މި މަތިންދާބޯޓަކީ އަޒަރުބައިޖާން އެއަރލައިންސްގެ މަތިންދާބޯޓެކެވެ. އަދި މި މަތިންދާބޯޓު ދަތުރުކުރަމުން ދިޔައީ ބާކޫ އިން ރަޝިޔާގެ ޗެޗްނިޔާގެ ގްރޮޒްނީ އަށެވެ. ނަމަވެސް ގްރޮޒްނީގައި ފޮގް އޮތުމާ ގުޅިގެން މަތިންދާބޯޓުގެ މަގު ބަދަލުކުރެވުނެވެ. އަޒަރުބައިޖާން އެއަރލައިންސްއިން މިކަމާ ގުޅޭ ގޮތުން އަދި އެއްވެސް ބަޔާނެއް ދީފައެއް ނުވެއެވެ.

ސޯޝަލް މީޑިއާގައި ދައުރުވަމުންދާ ވީޑިއޯތަކުން ދައްކާ ގޮތުގައި މަތިންދާބޯޓު ބިމާ ޖެހުމާއެކު އަލިފާން ރޯވެ، ކަޅު ދުން ގަނޑެއް އަރައިގެން ދިޔައެވެ.