ޚަބަރު
އެޗްޑީސީއިން ވަޒީފާއިން ވަކިކުރި މުވައްޒަފުންނަށް އަލުން ވަޒީފާދިނުމަށްފަހު ސަސްޕެންޑްކޮށްފި

ހައުސިންގ ޑިވަލޮޕްމެންޓް ކޯޕަރޭޝަންގެ ހެޑް އޮފީސް.ފޮޓޯ: ސަން މީޑިއާ
ބިންވެރިޔާ ސްކީމްގެ މައްސަލައާ ގުޅިގެން ހައުސިންގ ޑިވަލޮޕްމެންޓް ކޯޕަރޭޝަނުގެ ވަޒީފާއިން ވަކިކުރި އެ ކޯޕަރޭޝަންގެ މުވައްޒަފުންގެ ވަޒީފާ އަލުން އިޢާދަކުރުމަށްފަހު، ވަޒީފާގެ މަސްޢޫލިއްޔަތުތަކުން ދުރުކޮށްފިއެވެ.
ފުލުހުން ތަހުޤީޤު ކުރަމުންދާ ބިންވެރިޔާ ސްކީމްގެ މައްސަލައާއި ގުޅިގެން ވަޒީފާއިން ވަކިކޮށްފައިވަނީ އެޗްޑީސީގެ 15 މުވައްޒަފެކެވެ.
މިކަމާގުޅިގެން އެޗްޑީސީގެ އޮފިޝަލަކު މީޑިއާއަށް ވިދާޅުވެފައިވަނީ އެޗްޑީސީގެ ވަޒީފާއިން ވަކިކުރި މެނޭޖްމަންޓްގެ އިސް ބޭފުޅުންނާއި އެހެން މުވައްޒަފުންގެ ވަޒީފާ އަލުން އިޢާދަކޮށްފައިވާ ކަމަށެވެ. އަދި މިވަގުތު އެމުވައްޒަފުން ތިބީ ވަޒީފާގެ މަސްޢޫލިއްޔަތުން ދުރުކޮށްފައިކަމަށެވެ.
މީގެއިތުރުން އެޗްޑީސީގެ އޮފިޝަލް ވިދާޅުވެފައިވަނީ މިހާރު ބަލަމުންދާ މައްސަލައާ ގުޅުމެއް ނެތް މުވައްޒަފުންގެ ސަސްޕެންޝަން ތަހުޤީޤު ކުރިއަށްގެންދަމުންދާ ވަރަކުން އުވާލަމުން ދާނެ ކަމަށެވެ.
އަދި މައްސަލައާ ގުޅުން އޮތް މުވައްޒަފުންނާ މެދު އަޅަންޖެހޭ ފިޔަވަޅުތައް ކުރިއަށް ގެންދާނެ ކަމަށް ވެސް ވިދާޅުވިއެވެ.
އަލުން ވަޒީފާ ދެވުނު މުވައްޒަފުންގެ ތެރޭގައި ޗީފް ފައިނޭންޝަލް އޮފިސަރު ޢަބްދުﷲ ފާއިދާއި ޗީފް ބިޒްނަސް އޮފިސަރު އަދި މީޑިއާ ޑިޕާޓްމަންޓްގެ ހެޑް އަޙްމަދު ޔާމީން ވެސް ހިމެނެއެވެ.
މިމައްސަލައަކީ އެޗްޑީސީގެ ކުރީގެ އެމްޑީ ފަޟުލް ރަޝީދުގެ ބޭބެ އެމްޑަބްލިޔުއެސްސީގެ ޑީއެމްޑީ މުޙައްމަދު ފަޒީލް ރަޝީދަށް ޤަވާއިދުން ބޭރުން ގޯއްޗެއް ދިން މައްސަލައެވެ. މިމައްސަލައިގެ ޖިނާއީ ތަހުޤީޤެއް ފުލުހުން ދަނީ ހިންގަމުންނެވެެ.