ރާއްޖެއިން ބޭރުކުރަން އުޅުނު މިޔަރާއި މަޑިމަސް ކަސްޓަމްސްއިން ނައްތާލައިފި

ރާއްޖެއިން ގަވާއިދާ ޚިލާފަށް ބޭރުކުރަން އުޅުނު މިޔަރާއި މަޑިމަސްތަކެއް ކަސްޓަމްސްއިން އަތުލައިގަނެ ނައްތާލައިފިއެވެ. މި ތަކެތި ފެނުނީ ކަސްޓަމްސްއަށް ލިބުނު މަޢުލޫމާތަކާ ގުޅިގެން ކޮންޓެއިނާއެއް ބަލައި ފާސްކުރުމުގެ ތެރޭގައެވެ.

ކަސްޓަމްސްއިން މަޢުލޫމާތު ދެއްވިގޮތުގައި މިޔަރާއި މަޑީގެ ބާވަތްތަކަކީ ދިވެހިރާއްޖޭގެ މަސްވެރިކަމުގެ އާންމު ގަވާއިދުގެ ދަށުން ހިފުމާއި، ބޭނުމާއި، ނެގުމާއި، މެރުން މަނާ ބާވަތްތަކެވެ. އަދި މިއީ އެކްސްޕޯޓް ކުރުން ވެސް މަނާ ބާވަތްތަކެކެވެ. މީގެ އިތުރުން، މި ތަކެއްޗަކީ ނެތިދިއުމުގެ ބިރުހީވެފައިވާ ދިރޭތަކެތީގެ ބައިނަލްއަގްވާމީ ވިޔަފާރި ކޮންޓްރޯލްކުރުމުގެ ގާނޫނުގެ ދަށުން ރާއްޖެއިން ބޭރުކުރުން މަނާ ތަކެއްޗެވެ.

އަތުލެވުނު މި ތަކެތި ނައްތާލީ މިދިޔަ އާދިއްތަ ދުވަހު ކ. ތިލަފުށީގެ ކުނި ނައްތާލާ ސަރަހައްދުގައި ކަމަށް ކަސްޓަމްސްއިން ހާމަކުރެއްވިއެވެ. މި ޢަމަލަކީ ރާއްޖޭގެ ގާނޫނުތަކާއި ގަވާއިދުތަކާ ޚިލާފު ޢަމަލެއް ކަމަށްވާތީ، އެފަދަ ޢަމަލުތައް ހުއްޓުވުމަށް ކަސްޓަމްސްއިން ދަނީ މަސައްކަތްތަކެއް ކުރަމުންނެވެ.