ވޭމަންޑޫއިން މަސްތުވާތަކެއްޗާއި އެކު މީހަކު ހައްޔަރުކޮށްފި

ތ.ވޭމަންޑޫއިން މަސްތުވާތަކެއްޗާއި އެކު ދިވެހި ފިރިހެނަކު ހައްޔަރުކޮށްފިއެވެ.

ދިވެހި ފުލުހުންގެ ޚިދުމަތުން ބުނެފައިވަނީ އެމީހާ ހައްޔަރުކޮށްފައިވަނީ، ތ.ވޭމަންޑޫ ޕޮލިސް ސްޓޭޝަނާއި ފުލުހުންގެ އިންޓަލިޖެންސް ގުޅިގެން ހިންގި އޮޕަރޭޝަނެއްގައި ކަމަށެވެ. އަދި އޭނާ ހައްޔަރުކޮށްފައިވަނީ ވޭމަންޑޫއަށް މަސްތުވާތަކެތި އެތެރެކުރަން އުޅުމުގެ ތެރޭގައި ކަމަށްވެސް ފުލުހުން ބުނެފައިވެއެވެ. 

މިމައްސަލާގައި ހައްޔަރުކޮށްފައިވަނީ ހއ.މުރައިދޫ / ވެނީލާގެ މުޙައްމަދު ޝަރީފް (44އ) ކަމަށް ފުލުހުން ބުނެފައިވެއެވެ. 

މި ޑިސެންބަރު މަހުގެ 24 ވަނަ ދުވަހު ހިންގި އޮޕަރޭޝަނުގައި މުޙައްމަދު ޝަރީފް ހައްޔަރުކޮށްފައިވަނީ، މާލެއިން ފުރައިގެން ތ. އަތޮޅަށް އައި މުދާއުފުލާ ބޯޓެއް ވޭމަންޑޫއަށް ކައިރިކުރުމުން އޭނާ ހުއްޓަވައި ބަލައިފާސްކުރިއިރު މަސްތުވާތަކެތިކަމަށް ޝައްކުކުރެވޭ އެއްޗެއްހުރި ދެ ރަބަރު ޕެކެޓާއި ޖޫސްޕެޓީ ކޮތަޅެއް ފެނުމާއި ގުޅިގެންކަމަށްވެސް ފުލުހުން ބުނެފައިވެއެވެ.

މިމައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ވޭމަންޑޫ މެޖިސްޓްރޭޓް ކޯޓަށް ހާޒިރުކުރުމުން ވަނީ 11 ދުވަހު ބަންދުގެ މުއްދަތެއް ދީފައެވެ. 

މިމައްސަލަ ވޭމަންޑޫ ޕޮލިސް ސްޓޭޝަނުން ދަނީ އިތުރަށް ތަހުޤީޤު ކުރަމުންކަމަށްވެސް ފުލުހުން ބުނެފައިވެއެވެ.