އައިސީސީ ޗެމްޕިއަންސް ޓްރޮފީގައި އިންޑިއާގެ މެޗުތައް ޕާކިސްތާނުގެ ބަދަލުގައި ޑުބާއީގައި ކުޅުމަށް ނިންމައިފި

ޕާކިސްތާނުގައި ބޭއްވުމަށް ހަމަޖެހިފައިވާ އައިސީސީ ޗެމްޕިއަންސް ޓްރޮފީ 2025ގެ މެޗުތައް ކުޅުމަށް އެ ގައުމަށް ދިއުމަށް އިންޑިއާއިން ދެކޮޅު ހެދުމުން، އިންޑިއާގެ މެޗުތައް ޑުބާއީގައި ކުޅުމަށް އިންޓަނޭޝަނަލް ކްރިކެޓް ކައުންސިލް (އައިސީސީ) އިން ނިންމައިފިއެވެ.

ނަމަވެސް، ފެބުރުއަރީ 19 އިން މާޗު 9 އަކަށް ކުރިޔަށް ގެންދިއުމަށް ތާވަލުކޮށްފައިވާ މި މުބާރާތުގައި "ހައިބްރިޑް މޮޑެލް" އެއީ ގަބޫލު ކުރާނެ ގޮތެއް ނޫންކަމަށް ޕާކިސްތާން ކްރިކެޓް ބޯޑް (ޕީސީބީ) އިން ވަނީ ކުރިން ހާމަކޮށްފައެވެ. ނަން ސިއްރުކުރުމަށް ޝަރުތުކޮށް އަލްޖަޒީރާއާ ވާހަކަ ދެއްކި ޕީސީބީގެ އޮފިޝަލަކު ކުރިން ބުނީ، ޕާކިސްތާން ނޫން ގައުމެއްގައި މުބާރާތުގެ އެއްވެސް މެޗެއް ކުޅެން ޕީސީބީއިން އެއްބަސްނުވާނެ ކަމަށާއި، މި މުބާރާތް ކުޅުމަށް އިންޑިއާ އިން ޕާކިސްތާނަށް ދަތުރުނުކޮށްފިނަމަ، ކުރިޔަށް އޮތް ތާންގައި ޕާކިސްތާނުން ވެސް އަމަލުކުރާނީ އެގޮތަށްކަމަށެވެ.

ޕީސީބީގެ މި ނިންމުމާ ދެކޮޅަށް އައިސީސީއިން އިންޑިއާގެ މެޗުތައް ކުޅުމަށް ދުބާއީ ހަމަޖެއްސިއިރު، ޕާކިސްތާނާއި އިންޑިއާ ހިމެނެނީ ގްރޫޕް-އޭ ގައެވެ. އެ ގްރޫޕުގައި ދެން ހިމެނެނީ ނިއު ޒީލެންޑާއި ބަންގްލަދޭޝްއެވެ. އަދި އިންޑިއާ އާއި ޕާކިސްތާން އެއް ގްރޫޕެއްގައި ހިމެނުމާ ގުޅިގެން، އެ ދެ ޓީމު ބައްދަލުކުރާ މެޗު ވެސް ކުޅޭނީ ޑުބާއީގައެވެ. އެ މެޗު ތާވަލުކޮށްފައި ވަނީ ފެބުރުއަރީ 23 އަށެވެ.

މީގެ އިތުރުން، އިންޑިއާ އާއި ޕާކިސްތާން ފައިނަލުގައި ބައްދަލުކުރަން ޖެހިއްޖެނަމަ، އެ މެޗު ވެސް ޑުބާއީގައި ކުޅުމަށް އައިސީސީއިން ވަނީ ނިންމާފައެވެ. އިންޑިއާ ފައިނަލަށް ނުދާނަމަ ފައިނަލް ކުޅޭނީ ޕާކިސްތާނުގެ ލާހޯރުގައެވެ. 

ދެ ގައުމުގެ ދެމެދުގައި އޮތް ސިޔާސީ އަރާރުންތަކާއެކު، އިންޑިއާގެ ގައުމީ ކްރިކެޓް ޓީމު ޕާކިސްތާނަށް ދިއުން އިންޑިއާއިން މަނާކޮށްފައި އޮންނަތާ މިހާރު ގިނަ ދުވަސްތަކެއް ވެއްޖެއެވެ. އެހެން ކުޅިވަރެއް ކުޅުމަކަށް ވެސް، 2008 ވަނަ އަހަރުގެ ފަހުން އިންޑިއާގެ އެއްވެސް ގައުމީ ޓީމެއް ޕާކިސްތާނަށް ދަތުރުކޮށްފައެއް ނުވެއެވެ. އެގޮތުން 2023 ވަނަ އަހަރު ޕާކިސްތާނުގައި ބޭއްވި އޭޝިއާ ކަޕްގެ އިންޑިއާގެ މެޗުތައް ކުޅެފައިވަނީ ސްރީލަންކާގައެވެ.

އަދި މި ފަހަރުގެ ޗެމްޕިއަންސް ޓްރޮފީ އަކީ 1996 ވަނަ އަހަރަށްފަހު ޕާކިސްތާނުގައި އައިސީސީގެ ފިރިހެން ޕްރޮފެޝަނަލް މުބާރާތެއް ބޭއްވުމަށް ތައްޔާރުވާ ފުރަތަމަ ފަހަރެވެ. އެ އަހަރު ޕާކިސްތާނުން ވަނީ އިންޑިއާ އަދި ސްރީލަންކާއާއެކު 50-އޯވަރ ވޯލްޑް ކަޕް ވެސް ބާއްވާފައެވެ.