ޚަބަރު
ރާއްޖެއައި އިންޑިއާ މީހެއްގެ އަތުން ގިނަ ޢަދަދެއްގެ މަސްތުވާތަކެތި އަތުލައިގެންފި

މޯލްޑިވްސް ކަސްޓަމްސް ސަރވިސަސް. ފޮޓޯ:އިންޓަރނެޓް
ރާއްޖެއައި އިންޑިއާ މީހެއްގެ އަތުން ގިނަ ޢަދަދެއްގެ މަސްތުވާތަކެތި އަތުލައިގެންފިއެވެ.
މޯލްޑިވްސް ކަސްޓަމްސް އިން ބުނެފައިވަނީ ޑިސެމްބަރ 13 ވަނަ ދުވަހު، އިންޑިއާ އިން ރާއްޖެއައި އިންޑިއާގެ 31 އަހަރުގެ ފިރިހެނެއްގެ ލަގެޖްގައި މަސްތުވާތަކެތި ރައްކާކޮށްގެން ގެނެސްފައިވާ ކަމަށް ޝައްކުކުރެވިގެން، އެ މީހާގެ ލަގެޖް ބަލައިފާސް ކުރުމުން މަސްތުވާތަކެތި ފެނިފައިވާ ކަމަށެވެ.
އެ މީހާގެ ލަގެޖް ބަލާފާސްކުރުމުގެ ތެރޭގައި މަސްތުވާތަކެތި ކަމަށް ޝައްކު ކުރެވޭ ތަކެތި ފެނުމުން، އެ ތަކެތި ފުރަތަމަ މަރުހަލާގައި ކަސްޓަމްސް އިން ތަހުލީލު ކުރި އިރު، މަސްތުވާތަކެތީގެ ބާވަތެއް ކަމަށްވާ ކެނަބިސްއަށް ވަނީ ޕޮޒިޓިވް ވެފައި ކަމަށްވެސް ކަސްޓަމްސްއިން ވަނީ ބުނެެފައެވެ.
މިތަކެތީގެ ބަރުދަނުގައި ޕެކިންއާއި އެކު ޖުމްލަ 235 ގުރާމް ހުރިއިރު، މިތަކެތީގެ މަގުމަތީ އަގު އެއް ލައްކަ ރުފިޔާ އަށް އަރާ ކަމަށް ލަފާކުރެވޭ ކަމަށް ކަސްޓަމްސް އިން ބުނެއެވެ.
މި މައްސަލަ އިތުރަށް ތަހުޤީޤު ކުރުމަށް، މައްސަލައިގައި އަތުލައިގަތް މަސްތުވާތަކެއްޗާއި ފަސިންޖަރު މިހާރު ފުލުހުން ބެލުމުގެ ދަށަށް ގެންގޮސްފައި ކަމަށް ކަސްޓަމްސް އިން ބުނެއެވެ.