ޚަބަރު
"މޯލްޑިވްސް އިންޓެގްރޭޓެޑް ހެލްތު އިންފޮރމޭޝަން ސިސްޓަމް" ގެ ޕަބްލިކް ޕޯޓަލް ލޯންޗްކޮށްފި

"މޯލްޑިވްސް އިންޓެގްރޭޓެޑް ހެލްތު އިންފޮރމޭޝަން ސިސްޓަމް" ލޯންޗްކުރުން. ފޮޓޯ: ޕީއެސްއެމް
"މޯލްޑިވްސް އިންޓެގްރޭޓެޑް ހެލްތް އިންފޮރމޭޝަން ސިސްޓަމް" ގެ ޕަބްލިކް ޕޯޓަލް ލޯންޗްކޮށްފިއެވެ.
މިޕޯޓަލް އަކީ ތުއްތުއިރުން ފެށިގެން ކުއްޖާގެ ޞިއްޙަތާއި ގުޅުންހުރި ހުރިހާ މަޢުލޫމާތެއް އެއްތަނަކުން ލިބޭގޮތަށް ފަރުމާކޮށްފައިވާ ޕޯޓަލްއެކެވެ. މި ޕޯޓަލް އިފްތިތާޙް ކޮށްދެއްވައިފައިވަނީ ޞިއްޙީ ވަޒީރު ޢަބްދުﷲ ނާޒިމް، އެކަމަށް ޚާއްޞަކޮށް މިއަދު ހަވީރު މީރުމާގައި ބޭއްވި ރަސްމިއްޔާތެއްގައެވެ.
މިޕޯޓަލް އަކީ ޞިއްޙީ ވުޒާރާ އާއި ދުނިޔޭގެ ޞިއްޙަތު ޖަމިއްޔާ، ޑަބްލިއުއެޗްއޯ ގުޅިގެން ތަރައްޤީކޮށްފައިވާ ޕޯޓަލްއެކެވެ.
"މޯލްޑިވްސް އިންޓަގްރޭޓެޑް ހެލްތު އިންފޮރމޭޝަން ސިސްޓަމް"، (މިހިސް)އަކީ ރާއްޖޭގެ ޞިއްޙީ ދާއިރާގެ މަޢުލޫމާތު އެއްކުރުމަށް ބޭނުންކުރަމުންދާ ސިސްޓަމްތަކުގައި ހިމެނޭ ހުރިހާ މަޢުލޫމާތެއް އެއްތަނަކުން ފޯރުކޮށްދިނުމަށް ކުރިއަށްގެންދާ މަޝްރޫއެކެވެ.
މިހިސް ޕަބްލިކް ޕޯޓަލުން އަންނަމަހުގެ އެއްވަނަ ދުވަހުން ފެށިގެން އުފަންވާ ކޮންމެ ކުއްޖެއްގެ ވެކްސިން މަޢުލޫމާާތާއި ދެވޭ ވިޓަމިން އޭ އަދި ފަނިބޭހުގެ މަޢުލޫމާތުގެ އިތުރުން ހެދިބޮޑުވުމުގެ ޗާޓުގެ މަޢުލޫމާތު ލިބެން ހުންނާނެއެވެ.
މި ޕޯޓަލްގެ ޒަރިއްޔާއިން ބެލެނިވެރިންނަށް ކުއްޖާ ހެދިބޮޑުވަމުންދާ މިންވަރު މޮނިޓަރކުރެވޭނެއެވެ. އަދި ކުއްޖާއަށް ވެކްސިން ޖަހަންޖެހޭ ދުވަސް ކައިރިވުމުން ސިސްޓަމް މެދުވެރިކޮށް ބެލެނިވެރިޔާއަށް އެސްއެމްއެސްގެ ޒަރިއްޔާއިން ނޮޓިފިކޭޝަން ފޮނުވޭގޮތްވެސް ޕޯޓަލުގައިވެއެވެ.