ރާއްޖޭގެ ފަތުރުވެރިކަމުގައި އައު ރެކޯޑެއް: 2 މިލިޔަން ފަތުރުވެރިންގެ އަމާޒު ހާސިލްވެއްޖެ

ރާއްޖެއަށް މިއަހަރު ޒިޔާރަތްކުރި 2 މިލިޔަން ވަނަ ފަތުރުވެރިޔާއަށް ވެލާނާ އިންޓަނޭޝަނަލް އެއަރޕޯޓުން ހޫނު މަރުހަބާއެއް ކިޔައިފިއެވެ. މިއާއެކު ރާއްޖެއަށް މިއަހަރު ގެނައުމަށް އަމާޒުކަނޑައަޅާފައިވާ 2 މިލިޔަން ފަތުރުވެރިންގެ އަދަދު ހާސިލްވެ، ރާއްޖޭގެ ފަތުރުވެރިކަމުގެ އައު ރެކޯޑެއް ވަނީ ޤާއިމްކޮށްފައެވެ.

ރާއްޖެއަށް މިއަހަރު ޒިޔާރަތްކުރި 2 މިލިޔަން ވަނަ ފަތުރުވެރިޔާއަކީ އޮސްޓްރިއާގެ ރައްޔިތެކެވެ. މި އުފާވެރި މުނާސަބަތު ފާހަގަކުރުމަށްޓަކައި ވެލާނާ އިންޓަނޭޝަނަލް އެއަރޕޯޓުގައި ޚާއްޞަ ރަސްމިއްޔާތެއް ބޭއްވުނެވެ.

މި ރަސްމިއްޔާތުގައި ފަތުރުވެރިކަމާބެހޭ ވަޒީރު އިބްރާހިމް ފައިސަލް، އެމްއެމްޕީއާރުސީގެ މެނޭޖިންގ ޑިރެކްޓަރ އިބްރާހީމް ޝިއުރީ، އެމްއޭސީއެލްގެ މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދު އަދި އިމިގްރޭޝަންގެ އިސްވެރިން ބައިވެރިވެ ވަޑައިގެންނެވިއެވެ.

ރާއްޖޭގެ ފަތުރުވެރިކަން އިޝްތިހާރުކޮށް، ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމަށް ސަރުކާރުން ވަނީ ގިނަގުނަ މަސައްކަތްތަކެއް ކޮށްފައެވެ. މި މަސައްކަތްތަކުގެ ނަތީޖާއެއްގެ ގޮތުން މިއަހަރުގެ ފެބްރުއަރީ މަހަކީ ރާއްޖެއަށް ރެކޯޑު އަދަދަކަށް ފަތުރުވެރިން ޒިޔާރަތްކުރި މަހެއްގެ ގޮތުގައި ފާހަގަކުރެވުނެވެ. އެ މަހު ރާއްޖެއަށް 2 ލައްކަ ފަތުރުވެރިން ޒިޔާރަތްކުރިއެވެ.

ސަރުކާރުން އަންނަ އަހަރަށް އަމާޒުކޮށްފައިވަނީ 2.2 މިލިޔަން ފަތުރުވެރިން ރާއްޖެއަށް ގެނައުމެވެ. މި އަމާޒު ހާސިލުކުރުމަށްޓަކައި، ސަރުކާރުން ދަނީ އަންނަ އަހަރުތެރޭ ވެލާނާ އިންޓަރނޭޝަނަލް އެއަރޕޯޓުގެ އައު ޓަރމިނަލް ހުޅުވުމުގެ މަސައްކަތް ކުރަމުންނެވެ. މި ތަރައްޤީއާއެކު ރާއްޖެއަށް ޒިޔާރަތްކުރާ ފަތުރުވެރިންގެ އަދަދަށް އިތުރު ކުރިއެރުމެއް ލިބޭނެކަމަށް ލަފާކުރެވެއެވެ.