ޤުރުއާން ހިތުދަސްކުރާ ފަރާތްތަކަށް ކޮންމެ އަހަރަކު ޚާއްޞަ ހަފްލާއެއް ބޭއްވުމަށް ނިންމައިފި

ކީރިތި ޤުރުއާން ހިތުދަސްކުރާ ފަރާތްތަކަށް ސަނަދު ދިނުމަށް ޚާއްޞަ ހަފްލާއެއް ކޮންމެ އަހަރަކުވެސް ރަމަޟާން މަހު ބޭއްވުމަށް ނިންމައިފިއެވެ. މިކަން އިޢުލާނުކުރެއްވީ އިސްލާމީ ކަންތައްތަކާބެހޭ ވަޒީރު ޑރ. މުހައްމަދު ޝަހީމް އަލީ ސަޢީދެވެ.

ވަޒީރު ޑރ. ޝަހީމް ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވިގޮތުގައި، މި ހަފްލާ ބޭއްވުމަށް ހަމަޖެހިފައިވަނީ ކޮންމެ އަހަރެއްގެވެސް ރަމަޟާން މަހުގެ 27 ވަނަ ރޭގައެވެ. އަދި މި ހަފްލާގައި ބައިވެރިވާ ފަރާތްތަކަށް ޚާއްޞަ ޤައުނެއް ތައްޔާރުކުރެވޭނެ ކަމަށާއި، ފުރަތަމަ ހަފްލާ މިއަންނަ ރަމަޟާން މަހުގެ 27 ވަނަ ރޭ ބޭއްވުމަށް ހަމަޖެހިފައިވާ ކަމަށްވެސް އެމަނިކުފާނު ވިދާޅުވިއެވެ.

މީގެ އިތުރުން، ރާއްޖޭގައި ހާފިޡުންގެ އަގު ވަޒަންކުރުމުގެ ގޮތުން ރައީސުލްޖުމްހޫރިއްޔާގެ ޚާއްޞަ މެޑެއްޔާއި ހަނދާނީ ލިޔުމާއި އިނާމު ދެއްވަމުންދާކަން ވަޒީރު ފާހަގަކުރެއްވިއެވެ. އެގޮތުން، އޮކްޓޯބަރު 2022 އިން 1 ސެޕްޓެންބަރު 2024 ގެ ނިޔަލަށް ޤުރުއާން ހިތުދަސްކޮށްގެން ސަނަދު ހާސިލުކުރި 28 ހާފިޡުންނަށް މިއަހަރު މެޑެއްޔާއި ހަނދާނީ ލިޔުމާއި އިނާމު ދެއްވާފައިވާކަމަށް އެމަނިކުފާނު ވިދާޅުވިއެވެ.

ވަޒީރު އިތުރަށް ވިދާޅުވީ، މިހާރުވެސް 3 މީހަކު ޤުރުއާން ހިތުދަސްކުރުމަށްފަހު އިމްތިހާނު ހަދަމުންދާ ކަމަށާއި، 2 މީހަކު އިމްތިހާނު ހެދުމަށް އެދިފައިވާ ކަމަށެވެ. އަދި 5 އަހަރުގެ ކުއްޖަކުވެސް ޤުރުއާން ހިތުދަސްކުރުމަށްފަހު މުރާޖަޢާ ކުރުމަށް އެދިފައިވާ ކަމަށްވެސް އެމަނިކުފާނު ހާމަކުރެއްވިއެވެ.

ސަރުކާރުން ވަނީ ކީރިތި ޤުރުއާން ހިތުދަސްކުރާ ފަރާތްތައް ޢުމްރާއަށް ފޮނުވުމުގެ މަޝްރޫޢެއްވެސް މިއަހަރު އިފްތިތާޙުކޮށްފައެވެ. މި ހުރިހާ މަސައްކަތްތަކަކީވެސް ރާއްޖޭގައި ޤުރުއާން ހިތުދަސްކުރުން އިތުރަށް ކުރިއެރުވުމަށާއި ހާފިޡުންގެ އަގު ވަޒަންކުރުމަށް ކުރެވޭ މަސައްކަތްތަކެކެވެ.