ބިންވެރިޔާ އަދި ގެދޮރުވެރިޔާ ސްކީމްގެ މައްސަލަައިގައި ކުރީ ސަރުކާރުގެ 4 އިސްވެރިންނާ މެދު ދަޢުވާކުރުމަށް މަޝްވަރާ ފަށައިފި

ބިންވެރިޔާ އަދި ގެދޮރުވެރިޔާ ސްކީމްގެ މައްސަލާގައި ކުރީގެ ސަރުކާރުގެ 4 އިސްވެރިންނާ މެދު ދަޢުވާކުރުމާ ބެހޭގޮތުން ގޮތެއް ނިންމުމަށް އެންޓި-ކޮރަޕްޝަން ކޮމިޝަން (އޭސީސީ) އާއި ޕްރޮސެކިއުޓަރ ޖެނެރަލްގެ އޮފީހާ ދެމެދު ޑިއުޓީ ޕްރޮސިކިއުޝަން މަރުހަލާ ފަށައިފިއެވެ.

އޭސީސީން މިކަން ހާމަކުރައްވަމުން ވިދާޅުވެފައިވަނީ، ގެދޮރުވެރިޔާ ސްކީމްގެ ދަށުން ފްލެޓް ދޫކުރުމުގެ މައްސަލާގައި ހިމެނޭ ފަރާތްތަކުގެ މައްޗަށް ދަޢުވާކޮށްދިނުމާމެދު ގޮތެއް ނިންމެވުމަށް ޕްރޮސެކިއުޓަރ ޖެނެރަލްގެ އޮފީހާއެކު މަޝްވަރާތައް ފަށާފައިވާ ކަމަށެވެ. އަދި ދަޢުވާކުރެވޭނެ ފަރާތްތަކުގެ މައްޗަށް ދަޢުވާކޮށްދިނުމަށް ކުރަންޖެހޭ މަސައްކަތްތައް ވީ އެންމެ އަވަހަކަށް ނިންމާނެ ކަމަށްވެސް އެ ކޮމިޝަނުން ވަނީ ހާމަކުރައްވާފައެވެ.

މި މައްސަލައިގައި ދަޢުވާކުރުމާ މެދު މަޝްވަރާކުރެވެމުންދަނީ ކުރީގެ ސަރުކާރުގައި ހައުސިންގ މިނިސްޓްރީގައި އިސްކޮށް ތިއްބެވި 4 އޮފިޝަލެއްގެ މައްޗަށެވެ. އެއީ ކުރީގެ ސްޓޭޓް މިނިސްޓަރ އަކްރަމް ކަމާލުއްދީން، ސީނިއަރ އެކްޒެކެޓިވް ޑިރެކްޓަރު މުޙައްމަދު އާރިފު، ސީނިއަރ އެގްޒެކެޓިވް ޑިރެކްޓަރު ލިރުގާމް ވަހީދު އަދި ޑިރެކްޓަރ ޖެނެރަލް އަހުމަދު ވިޝާން ނަސީމެވެ. މި 4 ފަރާތުގެ ޕާސްޕޯޓު ވަނީ ކޯޓު އަމުރަކާ ގުޅިގެން ހިފަހައްޓާފައެވެ.

ބިންވެރިޔާ އަދި ގެދޮރުވެރިޔާ ސްކީމްގެ މައްސަލައަކީ ރައްޔިތުންގެ މަސްލަހަތު ހިމެނޭ ބޮޑު މައްސަލައަކަށްވާތީ، ވީހާވެސް އަވަހަށް ތަހުގީގު ނިންމައި، ދަޢުވާ ކުރަންޖެހޭނަމަ ދަޢުވާކުރަން ފޮނުވުމަށް ޕްރޮސެކިއުޓަރ ޖެނެރަލްވެސް ވަނީ ދިވެހި ފުލުހުންގެ ޚިދުމަތާއި އޭސީސީއަށް އަމުރުކުރައްވާފައެވެ. މި މައްސަލައިގެ ތަހުގީގު މަސައްކަތް ކުރިއަށްދާއިރު، ކަމާބެހޭ އިދާރާތަކުން ވަނީ އެކި ފިޔަވަޅުތައް އަޅަމުން ގެންގޮސްފައެވެ.