ކާރިސާތަކަށް ވިލުންތެރި ޤައުމަކަށް ރާއްޖެ ހެދުމަށް ރައީސް މުޢިއްޒު ޚާއްސަ އިސްކަމެއް ދެއްވާ :ނައިބު ރައީސް

ދިވެހިރާއްޖެއަކީ ޤުދުރަތީ ކާރިސާތަކަށް ވިލުންތެރި ޤައުމަކަށް ހެދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްސަ އިސްކަމެއް ދެއްވާކަމަށް ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ވިދާޅުވެއްޖެއެވެ. 

ނައިބު ރައީސް މިފަދައިން ވިދާޅުވީ މިއަދު ބޭއްވުނު 2004 ވަނަ އަހަރުގެ ސުނާމީ ކާރިސާގެ ހަނދާންތައް ދައްކުވައިދޭ "ވިލުންތެރި 20" މައުރަޒު ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. މި މައުރަޒަކީ ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން އިސްނަގައިގެން ކުރިއަށްގެންދާ މައުރަޒެކެވެ.

ނައިބު ރައީސް ވިދާޅުވި ގޮތުގައި ސުނާމީ ކާރިސާގައި ރާއްޖޭގެ ބޮޑު އާބާދީއަކަށް ވަގުތީ ހިޔާވަހިކަން ފޯރުކޮށްދޭން ޖެހުނެވެ. އަދި ޤައުމުގެ ތަރައްޤީ އެތައް އަހަރެއް ފަހަތައް ޖައްސާލާވަރުގެ ބޮޑެތި ގެއްލުންތަކެއް ސުނާމީ ކާރިސާގައި ލިބުނުކަން އެމަނިކުފާނު ފާހަގަކުރެއްވިއެވެ.

މޫސުމީ ބަދަލުތަކަށް ވިލުންތެރިވުމުގެ އިސްތިރާޖެއް އެކުލަވާލަމުން ދޭހަކޮށްދެނީ މިކަމަށް ރައީސުލްޖުމްހޫރިއްޔާ ދެއްވާ އަހަންމިއްޔަތުކަން. އަޅުގަނޑުމެން މިތިބީ މޫސުމީ ބަދަލުތަކަށާއި ހާދިސާތަކަށް ވިލުންތެރި ރާއްޖެއެއް ބިނާކުރުމަށް 

ނައިބު ރައީސް

މީގެއިތުރުން، ދިވެހިރާއްޖޭގެ ކާރިސީ ހިރާސް ކުޑަކުރުމުގެ އިސްތިރާޖީ ޕްލޭން ރައީސުލްޖުމްހޫރިއްޔާ މިހާރު ފާސްކުރައްވާފައިވާކަންވެސް ނައިބު ރައީސް ފާހަގަކުރެއްވިއެވެ.

އެންޑީއެމްއޭގެ ޗީފް އެގްޒެކެޓިވް ޙިސާން ޙަސަން ވިދާޅުވި ގޮތުގައި، 20 އަހަރު ކުރިން ރާއްޖެއަށް އެރި ސުނާމީއިން ލިބުނު ގެއްލުންތަކުން އަރައިގަނެވުނީ އެދުވަހު ދިވެހިން އެއްބައިވަންތަވެ، ކުރި އަޚުވަންތަވުމުގެ ނަމޫނާ މަސައްކަތްތަކުގެ ސަބަބުންނެވެ. އަދި އޭގެފަހުން މޫސުމީ ބަދަލުތަކަށް ތައްޔާރުވުމަށް ސަރުކާރުތަކުން ގިނަ މަސައްކަތްތަކެއް ކުރަމުންދާކަންވެސް އޭނާ ފާހަގަކުރެއްވިއެވެ.

މިއަދަކީ ރާއްޖޭގެ ޤައުމީ އެއްބައިވަންތަކަމުގެ ދުވަހެވެ. މި ދުވަސް ފާހަގަކުރަނީ 2004 ވަނަ އަހަރުގެ ޑިސެންބަރު 26 ވަނަ ދުވަހު ރާއްޖެ ކުރިމަތިލާންޖެހުނު ސުނާމީ ކާރިސާއިން އަރައިގަތުމަށް ދިވެހިން ދެއްކި އެއްބައިވަންތަކަމުގެ އަގުވަޒަން ކޮށް، ހަނދާންކުރުމުގެ ގޮތުންނެވެ. އެދުވަހުގެ ހަނދާންތައް ދައްކުވައިދޭ މައުރަޒު ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފެވެ. މި މައުރަޒުގައި ސުނާމީ ކާރިސާ ހިނގި ދުވަހުގެ ޚާއްސަ ބައެއް ފޮޓޯތަކާއި އެ ދުވަހާ ގުޅުންހުރި ތަކެތި ޑިސްޕްލޭކޮށްފައިވެއެވެ.

ޙިސާން ޙަސަން އިތުރަށް ވިދާޅުވި ގޮތުގައި، ކާރިސާގެ ވަގުތު ކަންކަން އިންތިޒާމުކޮށް، އެކި ފަރާތްތަކުގެ ޒިންމާތައް ބަޔާންކުރާ ނެޝަނަލް އެމަރޖެންސީ އޮޕަރޭޝަންސް ޕްލޭން މިހާރު ތައްޔާރުކޮށްފައިވެއެވެ. އަދި މި ޕްލޭނާ އެއްގޮތަށް އަވަސް އިޖާބަދިނުމުގެ މަސައްކަތް ރާވާ، އިންތިޒާމުކުރަމުންދާކަމަށް އޭނާ ވިދާޅުވިއެވެ.

ރަށު ފެންވަރުގައި އަވަސް އިޖާބަ ދިނުމުގެ ކަންކަން ކުރުމަށް ކޮމިޓީތައް އެކުލަވާލެވި، ކޮމިޔުނިޓީ އެމަރޖެންސީ ރެސްޕޮންސް ޓީމުތައް ދަނީ ޤާއިމްކުރަމުން. އެމީހުންނަށް ބޭނުންވާ ވަޞީލަތްތައް ފޯރުކޮށްދިނުމަށް ގިނަ މަސައްކަތްތަކެއްދަނީ ކުރަމުން

 ޙިސާން 

ޙިސާންވެސް ވަނީ އަދުގެ ރައީސުލްޖުމްހޫރިއްޔާ، މޫސުމީ ބަދަލުތަކަށް ވިލުންތެރިވުމަށް ޚާއްސަ އަހަންމިއްޔަތުކަމެއް ދެއްވާކަން ފާހަގަކުރައްވާފައެވެ.

2004 ވަނަ އަހަރުގެ ޑިސެންބަރު 26 ވަނަ ދުވަހު ދިމާވި ސުނާމީ ކާރިސާގައި 82 ދިވެއްސަކު ދުނިޔެ ދޫކުރިއެވެ. އަދި 26 މީހަކު ވީނުވީއެއް ނޭނގި ގެއްލުނެވެ. މީގެ އިތުރުން 1،300 މީހުންނަށް އެކި ވަރުގެ އަނިޔާތައް ލިބުނެވެ. އަދި 22،000 މީހުންނަށް ވަގުތީ ބޯހިޔާވަހިކަން ފޯރުކޮށްދޭން ޖެހުނެވެ.

މި ހިތާމަވެރި ހާދިސާއިން ފެށިގެން، ރާއްޖެއިން ވަނީ ޤުދުރަތީ ކާރިސާތަކަށް ތައްޔާރުވުމަށާއި އޭގެ އަސަރުތައް ކުޑަކުރުމަށް ގިނަގުނަ މަސައްކަތްތަކެއް ކޮށްފައެވެ. މިގޮތުން އެކުލަވާލެވިފައިވާ އިސްތިރާޖީ ޕްލޭންތަކާއި، ޤާއިމުކުރެވިފައިވާ އަވަސް އިޖާބަދޭ ނިޒާމުތަކުން، ރާއްޖެއަކީ ކުރިއާ އަޅާބަލާއިރު މިފަދަ ކާރިސާތަކަށް މާ ބޮޑަށް ތައްޔާރުވެފައިވާ ޤައުމަކަށް ވެފައިވާކަން ފާހަގަކުރެވެއެވެ.