ކުޅިވަރު
ގޯލްޑް ކަޕްގެ ކާމިޔާބާއެކު އޭދަފުށީގެ އެއްބައިވަންތަކަން ދައްކާލައިފި

ފައިނަލް މެޗުގެ ދެވަނަ ގޯލު ޖެހުމަށްފަހު އޭދަފުށި ޓީމުން އުފާފާޅުކުރަނީ
ހުލާސާ
ރާއްޖޭގެ އެއްބައިވަންތަކަމުގެ ދުވަސް މިއަދު ފާހަގަ ކުރަމުންދާއިރު، ފުޓުބޯޅައާ އެކީ އޭދަފުށީގައި މިއޮތީ ހަގީގަތުގައި ވެސް އެއްބައިވަންތަކަމުގެ ކުލަ ޖައްސުވާލާފައި.
ނައިންޓީ ޕްލަސް ގޯލްޑް ކަޕްގެ ޗެމްޕިއަންކަން ހޯދި އޭދަފުށި ފުޓުބޯޅަ ޓީމުން މިއަދު ހަވީރު އެރަށަށް ދިއުމުން، ރަށުގެ ރައްޔިތުން އެއް ރޫހެއްގައި ނިކުމެ ޓީމަށް ހޫނު މަރުހަބާ އެއް ކިޔައިފިއެވެ.
އޭދަފުށި ޓައިމްސް އިން ރިޕޯޓުކޮށްފައިވާ ގޮތުގައި، އިއްޔެއިން ފެށިގެން އެ ރަށުގެ ކައުންސިލުންނާއި ރައްޔިތުން ގުޅިގެން ދިޔައީ މި ހަރަކާތަށް ތައްޔާރުވަމުންނެވެ. އެގޮތުން ރަށު ކައުންސިލްގެ އެންގުމަށް، ޓީމަށް މަރުހަބާ ކިއުމަށްޓަކައި ރަށުގެ ކުދިބޮޑު އެންމެން ރަތް ކުލައިން ޖަރީވެގެން މިއަދު ހަވީރު ވަނީ ބަނދަރަށް ނިކުމެފައެވެ.
ޓީމު ދަތުރުކުރި ލޯންޗު ރަށުގެ ބަނދަރަށް ވަނުމުން، ޓީމުގެ ކެޕްޓަން އިޝާން އިބްރާހިމް (ސައްޓު) އަދި މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދި މުހައްމަދު ފާސިރު (ފާއްޓޭ) ވަނީ ތަށި ހިފައިގެން ލޯންޗުގެ ކުރީކޮޅަށް ނިކުމެފައެވެ.
ތައްޓާއެކު ރަށު ފަސްގަނޑުގައި ފުރަތަމަ ފައިޖައްސާލީ ސައްޓުއެވެ. އެއަށްފަހު ޓީމަށް ހާއްސަކޮށްފައި އޮތް ވެހިކަލެއްގައި ވެހިކަލް ބުރެއް ބޭއްވުމަށްފަހު ބައެއް ހަރަކާތްތައް އެ ރަށު ފުޓުބޯޅަ ދަނޑުފައި ވެސް ކުރިޔަށް ގެންގޮސްފައި ވެއެވެ.
ރާއްޖޭގެ އެއްބައިވަންތަކަމުގެ ދުވަސް މިއަދު ފާހަގަ ކުރަމުންދާއިރު، ފުޓުބޯޅައާ އެކީ އޭދަފުށިން ފެނުނީ ހަގީގަތުގައި ވެސް އެއްބައިވަންތަކަމުގެ ލާމަސީލު ނަމޫނާއެކެވެ.
ގޯލްޑް ކަޕްގައި އޭދަފުށިން ތަށި އުފުލާލީ، ފައިނަލް މެޗުގައި އައްޑޫ ސިޓީ 2-0 އިން ބަލިކުރުމަށްފަހުއެވެ. އޭދަފުށި ޓީމަށް ގޯލުތައް ކާމިޔާބުކޮށްދިނީ އެ ޓީމަށް ކުޅެމުން އަންނަ ދެބެއިން ކަމުގައިވާ މުހައްމަދު ފާސިރު (ފާއްޓޭ) އާއި އަލީ ފާސިރު (ސެންޓޭ) އެވެ.
މި މުބާރާތުގައި އޭދަފުށީގެ ރައްޔިތުން ވަނީ ޓީމަށް ހިތްވަރު ދިނުމުގައި ނަމޫނާ ދައްކާފައެވެ. އަދި ފައިނަލް މެޗަށް ފަހު ދިން އިންޓަވިއުއެއްގައި އޭދަފުށީގެ ކެޕްޓަން އިޝާން އިބްރާހިމް (ސައްޓު) ބުނީ، ކާމިޔާބީގެ ބޮޑު ބައެއް ސަޕޯޓަރުން ހިއްސާކުރާ ކަމަށެވެ.