ދީން
ރަޙްމަތާ މެދު މާޔޫސް ނުވޭ، އެންމެ ހެޔޮކަން ބޮޑު ގޮތް ދެނެވޮޑިގެންވަނީ ﷲ: ހުތުބާ

އިސްލާމީ މަރުކަޒުގައި ހުކުރު ހުތުބާ އަޑުއަހަން ބަޔަކު އިށީނދެގެން، ފޮޓޯ: ރައީސް އޮފީސް

ފަރުދުން
27 ޑިސެމްބަރު 2024، 02:19
27 ޑިސެމްބަރު 2024، 02:19
ހުލާސާ
އަހަރެމެންނަށް އެންމެ ހެޔޮކަން ބޮޑު ގޮތް ދެނެވޮޑިގެންވަނީ ﷲ. އަހަރެމެން ނުރުހޭ ކަމަކީ އަހަރެމެންނަށް އެންމެ ލާބަހުރި ގޮތް ކަމަށް ވެދާނެ. އަދި އަހަރެމެން ބޭނުން ކޮންމެ ކަމަކީ އަހަރެމެންނަށް އެންމެ ފައިދާ ހުރި ގޮތަށް ނުވެދާނެ.
މާތް ﷲގެ ރަހްމަތާ މެދު މާޔޫސްވުމަކީ މަގުފުރެދުމުގެ ސަބަބުތަކުގެ ތެރެއިންވާ ސަބަބެއް ކަމަށާއި، ކަންކަމުގައި ﷲ އާ ވަކީލު ކުރުމަކީ އީމާންކަމުގެ ތެރެއިންވާ ކަމެއް ކަމުގައި ފާހަގަކޮށް، ކަންކަމުގައި މާޔޫސްވުމާއި އުއްމީދު ކެނޑުމުން ދުރުހެލިވުމަށް މިއަދުގެ ހުކުރު ހުތުބާގައި ގޮވާލައިފިއެވެ.
ދިރިއުޅުމުގެ ހަޔާތަކީ ހިތްދަތިކަމާއި ހިތާމަތަކާއި ދަތި އުނދަގޫ ކަންކަން ހިމެނިގެންވާ ހަޔާތެއްކަން ބުނެދެމުން، ކޮންމެ ދަތި އުނދަގުލަކަށްފަހު ފަސޭހަކަން އަންނާނެކަން ކަށަވަރު ކަމަށާއި، އަދި ހިތާމަތަކަށްފަހު އުފާވެރިކަން އަންނާނެކަމުގެ ޔަގީންކަން، ކީރިތި ގުރުއާނުން ދަލީލު ދައްކައި ހުތުބާގައި ދީފައިވެއެވެ. އިންސާނުންނަށް އޮތީ އުފާވެރިކަމުގައި ޝުކުރު ކުރުމެވެ. އަދި ހިތްދަތިކަމުގައި ކެތްތެރި ވުމެވެ.
އަގީދާ ކިތަންމެ ވަރުގަދަ މީހެއް ވިޔަސް، މާޔޫސްކަމުގެ ތެރެއަށް ވެއްޓިދާނެކަމަށް ހުތުބާގައި ބުނެފައިވެއެވެ. އެހެންކަމުން ހިތްދަތިކަމެއް ކުރިމަތިވެއްޖެނަމަ އެކަމުން އަރައިގަންނަން މަސައްކަތް ކުރާނެ ގޮތަށް އަލިއަޅުވާލަމުން ހާމަކުރީ، އަގީދާގެ ސާބިތުކަން މުހިންމު ކަމަށާއި، ވަސްވާސްގެ ޝިކާރައަކަށް ނުވެ، ސަލާމަތުގެ އައްސޭރިއަށް ވާސިލްވުމަށް ވަރުގަދަ އަޒުމެއްގައި ހުރުން މުހިންމު ކަމަށެވެ.
އެގޮތުން އިންސާނާއާ އެކި ގޮތްގޮތުން ދިމާވާ މުސީބާތްތަކުން ސަލާމަތް ކުރެއްވުން ﷲގެ އިރާދަފުޅުގައި ކަނޑައަޅުއްވާފައި ވެއެވެ. އެހެންކަމުން އެކަންކަމުން ސަލާމަތްވުމަށް އިންސާނާ މަސައްކަތް ކުރަން ވާނީ ސަބަބުތަކުގައި ހިފައިގެންނެވެ. އެހެނީ އަހަރެމެންނަށް އެންމެ ހެޔޮކަން ބޮޑު ގޮތް ދެނެވޮޑިގެންވަނީ ﷲއެވެ. އަހަރެމެން ނުރުހޭ ކަމަކީ އަހަރެމެންނަށް އެންމެ ލާބަހުރި ގޮތް ކަމަށް ވެދާނެއެވެ. އަދި އަހަރެމެން ބޭނުން ކޮންމެ ކަމަކީ އަހަރެމެންނަށް އެންމެ ފައިދާ ހުރި ގޮތަށް ނުވެދާނެއެވެ. މި ހުރިހައި ކަމެއް އެންމެ މޮޅަށް ދެނެވޮޑިގެންވަނީ މާތް ﷲ ކަމާމެދު ޝައްކެއް ނެތެވެ.
އެހެންކަމުން، މާތް ﷲ ގެ މަގުގައި ސާބިތުވެ ހުންނަ މީހަކު މާޔޫސް ވެގެން ނުވާނެއެވެ. މުއުމިނުންގެ ސިފައަކީ އެއީއެވެ. މުސީބާތުގެ ވަގުތުގައި ވެސް މާތް ﷲގެ ރަހްމަތާއި ލުޔަށް އުއްމީދު ކުރުމެވެ. އެކަލާނގެ ނިންމެވުން ރައްދުކުރާނެ އަދި އެކަލާނގެ އިރާދަކުރައްވާފައިވާ ގޮތް ބަދަލުކުރެވޭނެ އެއްވެސް ފަރާތެއް ނުވެއެވެ.
އިންސާނާގެ ހިތަށް ހަމަޖެހުން ލިބޭ އެއްކަމަކީ ހެޔޮލަފާ މީހުންނާއި އެކީގައި އުޅުމާއި، އެމީހުންގެ ނަސޭހަތްތަކުގެ ފައިދާ ހޯދުމެވެ. އަދި އެފަދަ މީހުންނާ ބައްދަލުވެ، އެ ފަދަ މަޖިލިސްތަކުގައި ކަންކަމާ މަޝްވަރާ ކުރުމަށް މާތްﷲ ބާރުއަޅުއްވައެވެ.
މީގެ އިތުރުން ކީރިތި ޤުރުއާން ކިޔެވުމާއި، ޤުރުއާނާ މެދު ވިސްނައި ފިކުރު ކުރުމަކީ ވެސް ހިތްތަކަށް ހިތްހަމަޖެހުން ލިބޭ ކަމެކެވެ. އަދި ހެނދުނާއި ހަވީރުގެ ޒިކުރުތަކާއި، ނިދުމުގެ ކުރިން ކުރާ ޒިކުރުތަކާއި، ދުވާލާއި ރޭގަނޑުގެ އެހެނިހެން ވަގުތުތަކުގައި ކުރާ ޒިކުރުތައް ކުރުން ވެސް ހިމެނެއެވެ. މިކަމުން އިންސާނާ ސަލާމަތްކޮށްދެނީ ޖިންނި ޝައިޠާނުންނާއި އިންސާނުންގެ ތެރެއިންވާ ޝައިޠާނުންގެ ނުބައިކަމުންނެވެ.