އެކްސިޑެންޓުގައި އަނިޔާވި ކުއްޖާގެ ލައިސަންސް އޮތީ މީގެ ހަފްތާއެއްހާ ދުވަސްކުރިން ފުލުހުން ހިފަހައްޓާފައި

ފުލުހުންގެ ކާރަކާއި ސައިކަލެއް ޖެހި ހުޅުމާލޭގައި ރޭ ދަންވަރު ހިނގާފައިވާ އެކްސިޑެންޓުގައި އަނިޔާވި ޒުވާނާގެ ލައިސަންސް އޮތީ، އެއްގަމު ދަތުރުފަތުރު ކުރުމުގެ ގާނޫނާ ހިލާފުވުމުގެ ސަބަބުން  މި މަހުގެ 21 ގައި ހިފަހައްޓާފައިވާކަމަށް ފުލުހުން ހާމަކޮށްފިއެވެ.  

މި މައްސަލައާ ގުޅިގެން ފުލުހުން ނެރުނު ބަޔާނެއްގައި ބުނީ، ރޭ ދަންވަރު 01:50 އެހައިކަންހާއިރު ހުޅުމާލޭ ފޭސް 2، ގުލްއަލާމަގުން އިރުން ހުޅަނގަށް ނިރޮޅު މަގު ހުރަސްކުރަމުންދިޔަ ފުލުހުންގެ އުޅަނދެއްގައި، ނިރޮޅު މަގުން އުތުރުން ދެކުނަށް ބާރު ދުވެލީގައި ދުއްވާފައި އައި ސައިކަލެއް ޖެހި ހިނގާފައިވާ މި ހާދިސާގައި ހިމެނޭ ސައިކަލު ދުއްވި މީހާއަށް ބޮޑެތި އަނިޔާތަކެއް ވެފައިވާ ކަމަށެވެ. 

އެގޮތުން އަނިޔާވި މީހާއަށް ފުރަތަމަ ފަރުވާދިނީ ހުޅުމާލޭ ހޮސްޕިޓަލުގައި ކަމަށާއި، ނަމަވެސް އޭނާގެ ހާލަތު އިތުރަށް ސީރިއަސްވުމާ ގުޅިގެން އޭނާގެ ފަރުވާ އައި.ޖީ.އެމް. ހޮސްޕިޓަލަށް ބަދަލުކޮށްފައިވާ ކަމަށާއި، އަދި މިހާރު އޭނާ އޮތީ ވެންޓިލޭޓަރުގެ އެހީގައިކަމަށް ހޮސްޕިޓަލުން މައުލޫމާތު ދީފައިވެއެވެ.

މި ހާދިސާގައި ފުލުހުންގެ ކާރު ދުއްވަން އިން އޮފިސަރުގެ އިހުމާލެއް ވޭތޯ ބަލަމުންދާ ކަމަށް ވެސް އެ ސާވިސަސް އިން މައުލޫމާތުދީފައި ވެއެވެ.