ޢާންމު ބޭނުންތަކުގެ ޚިދުމަތްދިނުމުގެ ދާއިމީ ލައިސަންސް ދޫކުރަން ފަށައިފި

ޔޫޓިލިޓީ ރެގިއުލޭޓަރީ އޮތޯރިޓީީ  (ޔޫއާރުއޭ) އިން ޢާންމު ބޭނުންތަކުގެ ޚިދުމަތްދިނުމުގެ ދާއިމީ ހިންގުމުގެ ލައިސަންސް ދޫކުރަން ފަށައިފިއެވެ. މިއީ ފެނާއި ނަރުދަމާއާއި ކަރަންޓާއި ކުނި މެނޭޖްކުރުމުގެ ޚިދުމަތްތައް ފީއެއް ނަގައިގެން ނުވަތަ ވިޔަފާރީގެ އުސޫލުން ދިނުމަށް ދޫކުރެވޭ ލައިސަންސެކެވެ.

ޔޫއާރުއޭއިން މަޢުލޫމާތު ދެއްވާފައިވާ ގޮތުގައި، މި ލައިސަންސް ދޫކުރަން ފަށާފައިވަނީ ޔުޓިލިޓީ ރެގިއުލޭޓަރީ އޮތޯރިޓީގެ ޤާނޫނުގެ ދަށުންނެވެ. މީގެ ކުރިން އެ އޮތޯރިޓީން ދޫކުރަމުން އައީ ވަގުތީ ހިންގުމުގެ ލައިސަންސެވެ. އަދި މިފަދަ ލައިސަންސެއް ނެތި ޚިދުމަތް ދިނުމަކީ ޔޫއާރުއޭގެ ޤާނޫނުގެ ދަށުން މަނާކަމެއްކަން ވެސް އެ އޮތޯރިޓީން ފާހަގަކޮށްފައިވެއެވެ.

ޔޫއާރުއޭއިން މިހާތަނަށް ވަނީ ޔުޓިލިޓީ ޚިދުމަތް ފޯރުކޮށްދޭ ބައެއް ފަރާތްތަކަށް ދާއިމީ ހިންގުމުގެ ލައިސަންސް ދޫކޮށްފައެވެ. އެ އޮތޯރިޓީން ބުނާ ގޮތުގައި މި ލައިސަންސް ދޫކުރަން ފެށުމުން ޔޫޓިލިޓީ ޚިދުމަތްތައް ފުޅާވެ، ކުރިއަރާނެއެވެ.

2020 ވަނަ އަހަރު އުފެދުނު ޔޫއާރުއޭގެ މަޤުޞަދަކީ ޢާންމު ބޭނުންތަކުގެ ޚިދުމަތްތަކަކީ ދިވެހިރާއްޖޭގައި ދިރިއުޅޭ އެންމެނަށް އެކަށީގެންވާ ހެޔޮ އަގެއްގައި ހަރުދަނާ، އިތުބާރުހުރި އަދި ދެމެހެއްޓެނިވި ގޮތެއްގެމަތިން ފޯރުކޮށްދެވޭ ޚިދުމަތްތަކަކަށް ހެދުމެވެ. އަދި މި ޚިދުމަތްތައް ދިނުމުގެ ނިޒާމު ހަރުދަނާކުރުމަށްޓަކައި ގަވާއިދުތަކާއި މިންގަނޑުތައް ކަނޑައަޅައި، ބެލެހެއްޓުމެވެ.