ދުނިޔެ
"ހަމަލާއިން ސަލާމަތްވާނެ ކަމަކަށް ހިޔެއް ނުކުރަން" ޑަބްލިޔު.އެޗް.އޯގެ ޑިރެކްޓަރ ޖެނެރަލް
ދުނިޔޭގެ ސިއްޙީ ޖަމްޢިއްޔާ (ޑަބްލިޔު.އެޗް.އޯ) ގެ ޑިރެކްޓަރ ޖެނެރަލް، ޓެޑްރޮސް އަދަނޮމް ގެބްރެޔެސަސް ފޮޓޯ:އިންޓަނެޓް
ދުނިޔޭގެ ސިއްޙީ ޖަމްޢިއްޔާ (ޑަބްލިޔު.އެޗް.އޯ) ގެ ޑިރެކްޓަރ ޖެނެރަލް، ޓެޑްރޮސް އަދަނޮމް ގެބްރެޔެސަސް، ބުރާސްފަތި ދުވަހު އިސްރާއީލުން ޔަމަނުގެ މައި ވައިގެ ބަނދަރަށް ދިން ހަމަލާއިން ސަލާމަތްވާނެކަމާމެދު ކުޑަކޮށްވެސް ހީނުކުރާ ކަމަށް ބުނެފިއެވެ.
ރޮއިޓަރސް ނިއުސް އޭޖެންސީއަށް ދިން އިންޓަވިއުއެއްގައި ޓެޑްރޮސް ވިދާޅުވީ އިސްރާއީލުގެ ހަމަލާގެ އެއްވެސް އިންޒާރެއް ލިބިފައިނުވާ ކަމަށާއި، ގޮވުމުގެ އަޑު ބާރުކަމުން އޭނާގެ ކަންފަތުގައި އަޑުއިވުމުގެ މައްސަލަ އެއްދުވަހަށް ވުރެން ގިނަ ދުވަހު ދެމިގެން ދިޔަ ކަމަށް ހާމަކުރެއްވިއެވެ.
"އަހަރެމެން ތިބި ތަނާ ވަރަށް ކައިރިން ގޮއްވާލީ، އެންމެ ފޫޓެއްހާ ދުރުން. އެހެންވީމާ ސަލާމަތްވާނެކަމާމެދު ޝައްކު އުފެދުނު،ކުޑަ އޮޅުމަކުން ވެސް ސީދާ ހަމަލާ އަޅުގަނޑުމެންނަށް އަމާޒުވީސް."
ޓެޑްރޮސް
Footage captured the moment Israeli forces targeted Sanaa International Airport, Yemen, while the Director-General of the World Health Organization was at the airport. pic.twitter.com/1tDd5IQb9A
— Quds News Network (@QudsNen) December 27, 2024
ޓެޑްރޮސް ވިދާޅުވި ގޮތުގައި އޭނާއާއި އދ. ގެ އެހެން މުވައްޒަފުން ގާތްގަނޑަކަށް އެއް ގަޑިއިރު ވަންދެން ހަލާކުވެފައިވާ އެއަރޕޯޓުގައި ތިބެންޖެހުނެވެ. އަދި މަތިން ޑްރޯން ދުއްވާ އަޑު އިވުނު ކަމަށާއި، އިތުރު ހަމަލާއެއް އަންނާނެކަމުގެ ބިރު އޮތް ކަމަށް ވެސް ވިދާޅުވިއެވެ.
އެއަރޕޯޓް ޓާމިނަލްގެ ތެރޭގައި މިސައިލްގެ ބައިތައް ފެނުނު ކަމަށް ޓެޑްރޮސް ވިދާޅުވިއެވެ.
ޑަބްލިޔު.އެޗް.އޯ ގެ އިސްވެރިޔާ ވިދާޅުވީ އޭނާގެ ދަތުރުފުޅުގެ ތަފްސީލު އާންމުކޮށް ހިއްސާކޮށްފައިވާ ކަމަށާއި، އާންމު ރައްޔިތުންގެ ވަސީލަތްތަކަށް ހަމަލާދިނުމާމެދު ހައިރާންވެވަޑައިގަތް ކަމަށެވެ.
"އަހަރެން އެތާ ހުއްޓަސް ނުހުއްޓަސް، އާންމުންގެ ވައިގެ ބަނދަރު ރައްކާތެރިކުރަންޖެހޭނެ،"
ޓެޑްރޮސް
ޓެޑްރޮސް އިތުރަށް ވިދާޅުވިގޮތުގައި އޭނާއަކީ ވެސް އިންސާނެއް ކަމަށާއި މިކަހަލަ ކަންތައްތަކާ ކޮންމެ ދުވަހަކު ކުރިމަތިލާންޖެހޭ މީހުންނަށް އޭނާ ހަމްދަރުދީވާ ކަމާއި، މި ތަޖުރިބާއިން އެމީހުންގެ އިހުސާސްތައް ދެނެގަނެވުނެވެ.
