އިސްރާއީލުން ޣައްޒާއަށް ދެމުންދާ ހަމަލާތައް އިތުރުވެއްޖެ: އެތައް ބަޔަކު ޝަހީދުވެ، ސަތޭކަ އާއިލާއެއް ހިޟޯރުކޮށްފި

ޣައްޒާގެ އެކި ސަރަޙައްދުތަކަށް އިސްރާއީލުން ދެމުންދާ ހަމަލާތައް އިތުރުވެ، އިއްޔެ ރޭ އަދި މިއަދު ހެނދުނު ގިނަ އަދަދެއްގެ ފަލަސްޠީނުން ޝަހީދުވެއްޖެއެވެ. މިގޮތުން އިއްޔެ ރޭ ޣައްޒާ ސިޓީގެ ހުޅަނގު ފަރާތުގައި އޮންނަ ރެމަލް ސަރަޙައްދުގައި ހުރި އިމާރާތްތަކަކަށް އިސްރާއީލުގެ ހަނގުރާމަ މަތިންދާބޯޓަކުން ދިން ހަމަލާއެއްގައި ދެ މީހުން ޝަހީދުވިއެވެ.

މީގެ އިތުރުން، ޣައްޒާ ސިޓީގެ ދެކުނުގައި އޮންނަ ސަބްރާގެ ޖޯޑަން ފީލްޑް ހޮސްޕިޓަލް ކައިރީގައި އެހެން މީހަކު ވެސް އިސްރާއީލުގެ މަތިންދާބޯޓެއްގެ ހަމަލާއަކުން ޝަހީދުވެފައިވެއެވެ. އަދި މިއަދު ހެނދުނު މަޣާޒީ ރެފިއުޖީ ކޭމްޕަށް އިސްރާއީލުން ދިން ހަމަލާއެއްގައި އެއް އާއިލާއެއްގެ ހަތް މެންބަރުން ޝަހީދުވެފައިވާކަމަށް ވެސް ވަނީ ރިޕޯޓުކުރެވިފައެވެ.

މީގެ އިތުރުން، ދެކުނު ޣައްޒާގެ ޚާން ޔޫނިސް ސަރަޙައްދުގައި އޮންނަ އަލް-މަވާސީ ކިޔާ "އިންސާނީ ސަރަޙައްދު" އަށް އިސްރާއީލުން ދިން ހަމަލާތަކުގައި ޒަޚަމްވި މީހުން ހޮސްޕިޓަލަށް ގެންދިއުމުގައި ޕެރަމެޑިކުން މުޅި ރޭގަނޑު ވަނީ ހޭދަކޮށްފައެވެ.

އުތުރު ޣައްޒާގެ ބައިތު ހަނޫން ސަރަޙައްދުގައި އިސްރާއީލުގެ ސިފައިން ވަނީ 300 އާއިލާ ތިބި ސަރަޙައްދެއް ވަށައިލައި ހިޞޯރުކޮށްފައެވެ. މި ސަރަޙައްދަކީ މަސްތަކެއް ވަންދެން އިސްރާއީލުގެ ސިފައިންގެ ހިޞޯރުގެ ދަށުގައި އޮތް ސަރަޙައްދެކެވެ.

މި ހަމަލާތަކާ ގުޅޭގޮތުން އިސްރާއީލުގެ ފަރާތުން އަދި އެއްވެސް ބަޔާނެއް ނެރެފައެއް ނުވެއެވެ. ނަމަވެސް، މި ހަމަލާތަކުގެ ސަބަބުން ޣައްޒާގެ ރައްޔިތުންގެ މެދުގައި ބިރުވެރިކަން އިތުރުވެ، އިންސާނީ ހާލަތު އިތުރަށް ގޯސްވެގެންދާނެކަމަށް ބެލެވެއެވެ.