ކަމަލް އަދްވަން ހޮސްޕިޓަލުގައި ހުޅު ޖެހުން ދިވެހި ސަރުކާރުން ކުށްވެރިކޮށްފި

ޣައްޒާގެ ކަަމަލް އަދްވަން ހޮސްޕިޓަލަސް އިޒްރާއިލް ސިފައިން ވަދެ ހުޅުޖެހި މައްސަލަ ދިވެހި ސަރުކާރުން ކުށްވެރިކޮށްފިއެވެ.

މިކަމާ ގުޅިގެން ދިވެހި ޚާރިޖިއްޔާއިން ނެރެފައިވާ ސްޓޭޓްމަންޓެއްގައި ބުނެފައިވަނީ ޣައްޒާގެ އުތުރުގައި ހުންނަ ކަމަލް އަދުވަން ހޮސްޕިޓަލް އިޒްރާއީލު ސިފައިން އަންދާލައި، ބަލިމީހުންނާއި މެޑިކަލް ސްޓާފުން އެތަނުން ބޭރަށް ނުކުތުމަށް މަޖުބޫރުކުރި މައްސަލަ ދިވެހި ސަރުކާރުން ހަރުކަށި އިބާރާތުން ކުށްވެރިކުރާކަމަށެވެ.

ނަފްރަތު އުފެދޭ މި ޢަމަލަކީ ބައިނަލްއަޤްވާމީ އިންސާނީ ޤާނޫނާއި ބައިނަލްއަޤްވާމީ އިންސާނީ ޙައްޤުތަކާބެހޭ ޤާނޫނާ ވަރަށް ބޮޑަށް ޚިލާފުޢަމަލެއްކަމަށެވެ.

މުހިންމު ޞިއްޙީ ޚިދުމަތްދޭ ތަންތަނަށް ދޭ މިފަދަ ހަމަލާތަކަކީ ހަނގުރާމައިގެ ޖަރީމާއެއް ކަމަށާއި، މިއީ ފަލަސްތީނުގެ ރައްޔިތުންނާ ދެކޮޅަށް މިހާރު ހިނގަމުންދާ ހައްދެއް ނެތް އަނިޔާވެރިކަމުގެ ބައެއްކަމަށާއި، ރާއްޖޭގެ ސަރުކާރުން ބައިނަލްއަޤްވާމީ މުޖްތަމަޢަށާއި ޚާއްސަކޮށް އދ.އަށް ތަކުރާރުކޮށް ގޮވާލަނީ، ފަލަސްތީނުގެ ރައްޔިތުންނާ އެކު ވަރުގަދަ އެއްބައިވަންތަކަމެއްގައި މި ހަމަނުޖެހުމަށް އިންސާފުވެރި އަދި ދެމިއޮންނަ ސުލްހަވެރި ހައްލެއް ހޯދޭނީ 1967 ގެ ކުރިން އޮތް ބޯޑަރުތަކުގެ މައްޗަށް ބިނާކޮށް މިނިވަން އަދި އިސްތިޤްލާލު ފަލަސްތީން ދައުލަތެއް ޤާއިމްކޮށްގެން ކަމަށެވެ.

އިޒްރާއިލް ސިފައިން ކަމަލް އަދްވަން ހޮސްޕިޓަލުގައި ހުޅު ޖަހާފައިވަނީ 27 ޑިސެންބަރު ވީ ހުކުރު ދުވަހުއެެވެ. ކަމަލް އަދްވަން ހޮސްޕިޓަލުގައި ހުޅު ޖަހާ އެ ހޮސްޕިޓަލްގެ މެޑިކަލް އޮފިސަރުންނަށް އަނިޔާކޮށްފައިވާ ކަަމަށް ވަނީ ރިޕޯޓުކޮށްފައެވެ. 

ކަމަލް އަދްވަން ހޮސްޕިޓަލުގައި އިޒްރާއިލް ސިފައިން ހުޅުޖެހުމާ ގުޅިގެން އެހޮސްޕިޓަލުގެ 30 ޕޭޝަންޓަކު އިންޑޮނޭޝިއަން ހޮސްޕިޓަލަށް ބަދަލުކޮށްފައިވެއެވެ.