ޚަބަރު
މަޖީދީމަގުގައި ފެންބޮޑުވާ މައްސަލަ ހައްލުކުރުމުގެ މަސައްކަތަށް އެމަގުގެ ޓްރެފިކް ފްލޯއަށް ބަދަލުތަކެއް

މާލޭގެ މަޖީދީމަގު
މަޖީދީމަގުގައި ފެންބޮޑުވާ މައްސަލަ ހައްލުކުރުމުގެ މަސައްކަތަށް އެމަގުގެ ބައެއް ބަންދުކޮށް ޓްރެފިކް ފްލޯއަށް ބަދަލުތަކެއް ގެނެސްފިއެވެ.
މިކަމާއި ގުޅިގެން މާލެ ސިޓީ ކައުންސިލުން ބުނެފައިވަނީ މަޖީދީމަގު ފެންބޮޑުވާ މައްސަލަ ހައްލުކުރުމުގެ ގޮތުން ބްލޮކްތަކަށް ބަހާލައިގެން ފުރަތަމަ ބްލޮކްގެ މަސައްކަތް މިހާރު ކުރަމުންދާތީ 28 ޑިސެމްބަރު 2024 އިން ފެށިގެން 04 ޖަނަވަރީ 2025 ގެ ނިޔަލަށް މަޖީދީމަގު، ޗާންދަނީމަގާއި ރަށްދެބައިމަގާއި ހަމައަށް ޓްރެފިކް ފްލޯއަށް ވަނީ ބަދަލުގެނެވިފައިވާ ކަމަށެވެ.

މަޖީދީމަގުގެ ޓްރެފިކް ފްލޯއަށް ގެނެވުނު ބަދަލު ދައްކުވައިދޭ ޗާޓު
އެއްގަމު އުޅަނދު ދުއްވާ އެންމެހާ ފަރާތްތަކުގެ ސަމާލުކަމަށްޓަކައި މިކަން އާންމުކޮށް އަންގާ އިޢުލާން ކުރާ ކަމަށް އެކައުންސިލުން ބުނެފައިވެއެވެ. އަދި މިކަމުގައި އެއްގަމު އުޅަނދު ދުއްވާ އެންމެހާ ފަރާތްތަކަށް ދިމާވެދާނެ ދަތިކަމަށްޓަކައި އެކަންސިލުން ވަނީ މަޢާފަށް އެދިފައެވެ.
ބޯކޮށް ވާރޭވެހޭކަމަށްވާނަމަ މަޖީދީ މަގުގެ ބައެއް ސަރަހައްދުތަކުގައި ފެންބޮޑުވުމުގެ ޝަކުވާ މަގު ބޭނުންކުރާ އާންމުން ކުރެއެވެ. ބޯކޮށް ވާރޭ ވެހޭނަމަ ފެންބޮޑުވެ ވެހިކަލް ދުއްވުމަށާއި ހިނގައި ބިނގާވެ އުޅުމަށް ދަތިވެގެންދެއެވެ. އަދި ބައެއް ސަރަހައްދުތަކުގައި ހުންނަ ފިހާރަތަކަށް ފެންވަންނަ ފަހަރުފަހަރުވެސް އާދެއެވެ.