ޚަބަރު
ޗައިނާ-ރާއްޖެ މިނިވަން ވިޔަފާރީގެ އެއްބަސްވުމުން ދިވެހި އިޤްތިޞާދަށް އެތައްފައިދާއެއް

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އަދި ޗައިނާގެ ޝީ ޖިންޕިން ފޮޓޯ:ރައީސް އޮފީސް
ޖަނަވަރީ 1 ވަނަ ދުވަހުން ފެށިގެން ޗައިނާ-ރާއްޖެ މިނިވަން ވިޔަފާރީގެ އެއްބަސްވުމަށް އަމަލުކުރަން ފެށުމާއެކު، ދިވެހިރާއްޖޭގެ އިޤްތިޞާދަށް ގިނަ ފައިދާތަކެއް ލިބޭނެ ކަމަށް އިޤްތިޞާދީ ތަރައްޤީއާއި ވިޔަފާރިއާއި ބެހޭ ވުޒާރާއިން މިއަދު ވިދާޅުވެއްޖެއެވެ.
މި އެއްބަސްވުމުގެ ސަބަބުން ޗައިނާއިން ރާއްޖެއަށް އެތެރެކުރާ މުދަލުގެ އަގު ހެޔޮވެ، ޗައިނާ ބާޒާރުގައި ވިޔަފާރިތައް ފުޅާކުރުމުގެ ފުރުސަތު ދިވެހި ވިޔަފާރިވެރިންނަށް ފަހިވެގެންދާނެ ކަމަށް އެ ވުޒާރާއިން ވިދާޅުވިއެވެ. މީގެ އިތުރުން، ރާއްޖޭގެ އިޤްތިޞާދު ސިންދަފާތުކޮށް އިޖްތިމާއީ ތަރައްޤީއަށް މަގުފަހިވެގެންދާނެ ކަމަށްވެސް އެ ވުޒާރާއިން ފާހަގަކުރެއްވިއެވެ.
2014 ވަނަ އަހަރު ސޮއިކުރެވުނު މި އެއްބަސްވުމަށް އަމަލުކުރަން ފެށުމުން، ދިވެހިރާއްޖޭގެ އިންސާނީ ވަސީލަތްތައް ތަރައްޤީކުރުމަށާއި އެކިއެކި ދާއިރާތަކާ ގުޅޭގޮތުން ދިރާސާކުރުމަށް ޗައިނާގެ އެހީތެރިކަން ލިބޭނެއެވެ. އަދި ރާއްޖޭގެ ރައްޔިތުންގެ ހުނަރު އިތުރުކުރުމަށް ފުރުސަތު ހުޅުވިގެންދާނެ ކަމަށްވެސް އެ ވުޒާރާއިން ވިދާޅުވިއެވެ.
މި އެއްބަސްވުމުގެ ދަށުން، ފަންނީ ދާއިރާގައި މަސައްކަތްކުރާ ދިވެހިންނަށް ޗައިނާގެ މާކެޓަށް ޚިދުމަތް ފުޅާކުރުމުގެ ފުރުޞަތު ލިބި، އަމިއްލަ މަސައްކަތްކުރާ ފަރާތްތަކުގެ އުފެއްދުންތައް ޗައިނާ މާކެޓަށް އެކްސްޕޯޓް ކުރެވޭނެއެވެ. މީގެ ސަބަބުން ވަޒީފާގެ އިތުރު ފުރުސަތުތައް އުފެދި، ރާއްޖޭގެ އިޤްތިޞާދު އިތުރަށް ކުރިއަރާނެ ކަމަށް ސަރުކާރުން ލަފާކުރައްވައެވެ.
އާންމު ރައްޔިތުންނަށްވެސް މި އެއްބަސްވުމުގެ ސަބަބުން ފައިދާތަކެއް ކުރާނެއެވެ. ޗައިނާއިން އެތެރެކޮށް ވިއްކާ އާންމު ދިރިއުޅުމަށް ބޭނުންކުރާ ތަކެތީގެ އަގު ހެޔޮވެ، މާކެޓްގައި ގިނަ ބާވަތްތައް ލިބެން ހުންނާނެއެވެ. އަދި ކްރިއޭޓިވް މަސައްކަތްކުރާ ފަރާތްތަކުގެ މަސައްކަތަށް ބޭނުންވާ ގިނަ ބާވަތްތަކަކާއި، މަސްވެރިކަމާއި އިމާރާތްކުރުމުގެ ސިނާއަތަށް އެތެރެކުރާ ގިނަ ބާވަތްތަކުން ޑިއުޓީ މަޢާފުވެގެންދާނެއެވެ.
މިހާރުވެސް ދިވެހިރާއްޖެއާއި ޗައިނާއާ ދެމެދު 700 މިލިއަން ޑޮލަރުގެ ވިޔަފާރި ކުރެވެމުންދާއިރު، މި އެއްބަސްވުމަށް އަމަލުކުރަން ފެށުމާއެކު މި އަދަދު 1 ބިލިއަން ޑޮލަރަށް އަރާނެ ކަމަށް ސަރުކާރުން ލަފާކުރައްވައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމަށްފަހު، މި އެއްބަސްވުމަށް އަމަލުކުރަން ފެށުމަށް ކުރަންޖެހޭ މަސައްކަތްތައް ވަނީ ފަށްޓަވާފައެވެ. 2017 ވަނަ އަހަރު މަޖިލީހުން ރުހުން ލިބިފައިވާ މި އެއްބަސްވުމަށް އަމަލުކުރުން އޮތީ 2018 ވަނަ އަހަރު ސަރުކާރު ބަދަލުވުމާ ގުޅިގެން މަޑުޖެހިފައެވެ.
އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާގެ ވަޒީރު އަލްފާޟިލް މުޙައްމަދު ސައީދު ވިދާޅުވީ، "މި އެއްބަސްވުމަކީ ދިވެހިރާއްޖޭގެ އިޤްތިޞާދީ ކުރިއެރުމަށް ވަރަށް މުހިންމު އެއްބަސްވުމެކެވެ. ޗައިނާގެ ބޮޑު މާކެޓަށް ދިވެހި އުފެއްދުންތައް ވިއްކުމުގެ ފުރުޞަތު ލިބި، ދިވެހި ވިޔަފާރިވެރިންނަށް އައު ދޮރުތަކެއް ހުޅުވިގެންދާނެއެވެ. އަދި ޗައިނާއިން ރާއްޖެއަށް އަންނަ އިންވެސްޓްމަންޓްތައް އިތުރުވެ، ވަޒީފާގެ އިތުރު ފުރުޞަތުތައް އުފެދިގެންދާނެއެވެ."
މި އެއްބަސްވުމުގެ ދަށުން، ދެ ޤައުމުގައި އިންވެސްޓްމަންޓް ޕްރޮމޯޝަންތައް ހިންގުމުގެ ފުރުޞަތު ލިބި، ދިވެހިރާއްޖޭގެ އިޤްތިޞާދު އިތުރަށް ވަރުގަދަވެގެންދާނެ ކަމަށް ސަރުކާރުން އުންމީދުކުރައްވައެވެ. މީގެ އިތުރުން، ދިވެހި ރައްޔިތުންނަށް ޗައިނާގައި ތަމްރީނު ލިބުމުގެ ފުރުޞަތުތައް އިތުރުވެ، ރާއްޖޭގެ އިންސާނީ ވަސީލަތްތައް ތަރައްޤީވެގެންދާނެ ކަމަށްވެސް ބެލެވެއެވެ.
ވިޔަފާރިވެރިންގެ ފަރާތުން މި އެއްބަސްވުމަށް މަރުޙަބާ ކިޔާފައިވާއިރު، ބައެއް ފަރާތްތަކުން ކަންބޮޑުވުން ފާޅުކޮށްފައިވެއެވެ. ނަމަވެސް ސަރުކާރުން ވިދާޅުވެފައިވަނީ މި އެއްބަސްވުމުގެ ސަބަބުން ދިވެހި ވިޔަފާރިތަކަށް ގެއްލުމެއް ނުވާނެ ގޮތަށް ކަންކަން ރޭވިފައިވާ ކަމަށެވެ.
ޗައިނާ-ރާއްޖެ މިނިވަން ވިޔަފާރީގެ އެއްބަސްވުމަށް އަމަލުކުރަން ފެށުމާއެކު، ދިވެހިރާއްޖޭގެ އިޤްތިޞާދީ ކުރިއެރުމަށް އައު ދޮރުތަކެއް ހުޅުވިގެންދާނެ ކަމަށް ބެލެވެއެވެ. އަދި މި އެއްބަސްވުމުގެ ސަބަބުން ދިވެހި ރައްޔިތުންގެ ދިރިއުޅުމުގެ ފެންވަރު މަތިވެ، ޤައުމުގެ ތަރައްޤީއަށް އިތުރު ބާރެއް ލިބިގެންދާނެ ކަމަށް ސަރުކާރުން އުންމީދުކުރައްވައެވެ.