ބޮންޑެޑް ވެއަރހައުސްއިން ސިނގިރޭޓު ގެއްލުމުގެ މައްސަލަ ތަޙުޤީޤަށް

މޯލްޑިވްސް ކަސްޓަމްސް ސަރވިސްގެ ބެލުމުގެ ދަށުގައިވާ ބޮންޑެޑް ވެއަރހައުސްއަކުން ސިނގިރޭޓު ގެއްލުނު މައްސަލައެއް ދިވެހި ފުލުހުންގެ ޚިދުމަތާއި ކަސްޓަމްސްއިން ތަޙުޤީޤު ކުރަން ފަށައިފިއެވެ. މި މަޢުލޫމާތު  ހާމަކުރެއްވީ ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާނެވެ.

ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވަޒީރު ވިދާޅުވީ، ޒަމާނުއްސުރެ މާލޭގެ އެކި ގެތަކާއި އެޕާޓްމަންޓުތަކުގައި ބޮންޑެޑް ވެއަރހައުސްތައް ހިންގަމުން އަންނަ ކަމަށާއި، މި މައްސަލައިގައި މުދާ ގެއްލުނު ވެއަރހައުސްއަކީވެސް ގެއެއްގައި ހަދާފައިވާ ތަނެއް ކަމަށެވެ. އެފަދަ ތަންތަނުގައި ދެތަޅު ހަރުކޮށް، ތަޅުދަނޑި ބަލަހައްޓަނީ ކަސްޓަމްސްއިން ކަމަށްވެސް އެމަނިކުފާނު ފާހަގަކުރެއްވިއެކުރެއްވިއެވެ.

ވަޒީރުގެ ވާހަކަފުޅުގައި، މުދާ ގެއްލުނު ވެއަރހައުސްގެ ވެރިފަރާތުން އެތަނުގައި ވެއަރހައުސް ހިންގުން ހުއްޓާލައި، އެހެން މަސައްކަތެއް ފަށާފައިވާކަން ފާހަގަކުރެއްވިއެވެ. މި މަޢުލޫމާތު ލިބުމާ ގުޅިގެން، އެތަނުގައި ހުރިކަމަށް ރެކޯޑުތަކުން ދައްކާ މުދަލަށް ޑިއުޓީ ދެއްކުމަށް ވެރިފަރާތަށް އަންގާފައިވާކަމަށްވެސް ވިދާޅުވިއެވެ.

Zamaan thakeh vandhen “bonded warehouse” thah malege eki gethakuga adhi apartment thakuga aee hingamun. Mithanthanuga 2 thalhu harukoh ehthalhuge thalhudhandi balahattany customs ge faraathun. Mi report kurevifaivaa “bonded warehouse” akee ves migothah ge ehgai hadhaafa huri… https://t.co/tl5q2Y6nKI

— Minister of Homeland Security & Technology (@min_mohst) December 28, 2024

މި މައްސަލައިގައި ޤާނޫނީ ފިޔަވަޅު އެޅުމަށްޓަކައި ފުލުހުންނާއި ކަސްޓަމްސްއިން ތަޙުޤީޤު ކުރިއަށްގެންދާ ކަމަށް ވަޒީރު ވިދާޅުވިއެވެ. އަދި ގެތަކުގައި ބޮންޑެޑް ވެއަރހައުސް ހިންގުމަކީ ސަލާމަތީގޮތުންނާއި ކޮންޓްރޯލް ކުރުމުގެ ގޮތުން އެންމެ ރަނގަޅު ގޮތް ނޫންކަމަށް ފާހަގަކުރައްވައި، މިހާރު ސަރުކާރުން މިކަން ބަދަލުކޮށް، ބޮންޑެޑް ވެއަރހައުސްތައް ހިންގޭނީ ހަމައެކަނި ކަސްޓަމްސްގެ ފުރިހަމަ ކޮންޓްރޯލް އޮންނަ ސަރަޙައްދުތަކުގައި ކަމަށް ކަނޑައަޅުއްވާފައިވާކަން ވަޒީރު ހާމަކުރެއްވިއެވެ.