ނެނޯނައިފް ޓެކްނޮލޮޖީ އިން ފަރުވާ ދެވުނު އެންމެ ހަގު ކުއްޖާ ކެންސަރުން ސަލާމަތްވެއްޖެ

ލަންޑަނުގައި ދެ އަހަރުގެ ކުއްޖަކަށް ނެނޯނައިފް ޓެކްނޮލޮޖީ ބޭނުންކޮށްގެން ކެންސަރުގެ ފަރުވާ ދިނުމަށްފަހު މިހާރު ވަނީ ކެންސަރުން ސަލާމަތްވެފައެވެ. މިއީ މި ޓެކްނޮލޮޖީ ބޭނުންކޮށްގެން ފަރުވާ ދެވުނު އެންމެ ހަގު ކުއްޖާއެވެ.

ކެމްޑެންގެ ޖޯޖް އަށް 2023 ވަނަ އަހަރުގެ ވަނީ ލިވަރާއި ބައިލް ޑަކްޓުގައި ރަބްޑޮމަޔޮސާކޯމާ (އާރްއެމްއެސް) ނަމަކަށް ކިޔާ  ކެންސަރގެ ބާވަތެއް ޖެހިފައިވާކަން ދެނެގަނެވިފައެވެ.

"އެ ވަގުތު އަހަރެންގެ ހަނދާނުން ނައްތާ ނުލެވޭނެ،" ޖޯޖްގެ ބައްޕަ ޖޮނަތަން ބުންޏެވެ. "މުޅި ދުނިޔެ ހުއްޓުނު ކަހަލަ އިހުސާސެއް ކުރެވުނީ."

މި ތުއްތު ކުއްޖާއަށް ތިން ފަހަރު ކީމޯތެރަޕީ ދިނުމަށްފަހު، ކިންގްސް ކޮލެޖް ހޮސްޕިޓަލުގައި ނެނޯނައިފް ޓެކްނޮލޮޖީ ބޭނުންކޮށްގެން ފަރުވާ ދެވުނެވެ. މި ޓެކްނޮލޮޖީ ބޭނުންކުރަނީ ކަރަންޓުގެ ބާރު ބޭނުންކޮށްގެން ކެންސަރު ހުރި ސަރަހައްދު ނައްތާލުމަށެވެ.

ކެންސަރ ރިސާޗް ޔޫކޭގެ ސައިންސް އެންގޭޖްމަންޓް ލީޑް ޑރ. ސެމް ގޮޑްފްރޭ ވިދާޅުވީ ނެނޯނައިފަކީ އެންމެ ޒަމާނީ، ތަޖުރިބާކުރެވެމުންދާ ފަރުވާއެއް ކަމަށެވެ.

ކަރަންޓުގެ ބާރު ބޭނުންކޮށްގެން ސަރޖަނުންނަށް ކެންސަރު ނެގުމަށް ޓަކައި ޓިއުމަރުގެ ވަށައިގެން ރަނގަޅު މާޖިނެއް ސާފުކުރެވެއެވެ.

ކިންގްސް ކޮލެޖް ހޮސްޕިޓަލުން ނެނޯނައިފް ބޭނުންކުރުމަށް ލައިސަންސަށް އެދި ހުށަހަޅައި، އެން.އެޗް.އެސްގެ ދަށުން އޮޕަރޭޝަން ކުރިއަށް ގެންދިޔައެވެ.

ކެންސަރ ރިސާޗް ޔޫކޭ އިން ބުނާ ގޮތުގައި ޖޯޖަކީ މި ޕްރޮސީޖަރ ހެދުނު ދުނިޔޭގެ އެންމެ ހަގު ކުއްޖާއެވެ. އަދި ފުރަމެއްއަށް ނެނޯނައިފް ފަރުވާ ދެވުނު ޔޫކޭގެ ފުރަތަމަ ކުއްޖާއެވެ.

ޑރ. ގޮޑްފްރޭ ވިދާޅުވީ ޖޯޖްގެ "އެންމެ ޒަމާނީ ސަރޖިކަލް ފަރުވާ އިން ދުނިޔޭގެ އެހެން ކުދިންނަށް ފަރުވާ ދިނުމަށް މަޢުލޫމާތު ލިބިގެންދާނެ" ކަމަށެވެ.

"ސަރޖަނުންނަށް ވަނީ ހުރިހާ ޓިއުމަރެއް ނަގައި، ފުރަމޭގެ ނެގުނު ބައިގެ ވަށައިގެން ސާފުކުރާނެ މާޖިން ލިބިފައި،" ޖޮނަތަން ބުންޏެވެ.

"މިއީ އަހަރެމެން އުއްމީދުކޮށް، ދުޢާކުރަމުން އައި ޚަބަރު."

"ޖޯޖްގެ ބަލި ދެނެގަތް ދުވަހުން ފެށިގެން، އަހަރެމެން ކުރި ހުރިހާ ކަމަކީ އޭނާއަށް ބޭނުންވާ ފަރުވާ ހޯދުމަށް މަސައްކަތްކުރުން"

"ނެނޯނައިފަކީ އައު އަދި އިންގިލާބީ އެއްޗެއްކަން އެނގުމުން އަހަރެމެންނަށް ވަރަށް ކަމުދިޔަ. އަދި އެކަން ވުޖޫދަށް ގެނައުމުގައި އަހަރެމެންގެ ބައިވެރިވުމެއް އޮތްކަމަށް އިހުސާސްވި."

18 މަސް ފަހުން، ޖޯޖް ވަނީ ކެންސަރުން ސަލާމަތްވެ، ސެޕްޓެމްބަރު މަހު  ސްކޫލަށްދާން ފަށައިފައެވެ.

ފަރުވާ ލިބިގަތުމުގައި ޖޯޖް ދެއްކި ހިތްވަރަށްޓަކައި، ކެންސަރ ރިސާޗް ޔޫކޭ ފޮރ ޗިލްޑްރަން އެންޑް ޔަންގް ޕީޕަލް ސްޓާ އެވޯޑް އޭނާއަށް ވަނީ ލިބިފައެވެ.

މިއީ ކެންސަރުގެ ފަރުވާގައި ކުރިއެރުންތަކެއް ލިބެމުންދާކަން ދައްކުވައިދޭ އުފާވެރި ޚަބަރެކެވެ. ޚާއްޞަކޮށް ކުޑަކުދިންނަށް ކެންސަރުގެ ފަރުވާ ދިނުމުގައި މި އައު ޓެކްނޮލޮޖީގެ ސަބަބުން އުއްމީދީ ނަތީޖާތަކެއް ފެންނަމުންދާކަން މި ޚަބަރުން ހާމަވެއެވެ. ޖޯޖްގެ ކާމިޔާބު ވާހަކައިން އެހެން ބަލިމީހުންނަށާއި އާއިލާތަކަށް ހިތްވަރާއި އުއްމީދު ލިބިގެންދާނެއެވެ.