އާރުޑީސީގެ ކުރީގެ އެމްޑީ އަދި ސީއެފްއޯއަށް ފުރުންމަނާކުރުމުގެ އަމުރެއް ނެރެފި

އާރުޑީސީގެ  ކުރީގެ މެނޭޖިންގ ޑިރެކްޓަރ މޫސާ އަލިމަނިކާއި އޭރުގެ ޗީފް ފައިނޭންޝަލް އޮފިސަރ ޔާސިރު ހަސަން ފުރުން މަނާކުރުމުގެ އަމުރެއް ފުލުހުން ނެރެ، އެކަން މިހާރު އަންގާފައިވާކަމަށް މޯލްޑިވްސް ޕޮލިސް ސަރވިސްއިން މިއަދު ހާމަކުރިއެވެ.

މި ފިޔަވަޅު އަޅާފައިވަނީ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ ގުޅުންހުރި މާލީ މައްސަލައެއްގެ ތަޙުޤީޤާ ގުޅިގެންނެވެ. ފުލުހުންގެ ތަޙުޤީޤުން ދައްކާގޮތުގައި، ނިމިދިޔަ އެމްޑީޕީ ސަރުކާރުގެ ބައެއް ވެރިންނާއި އެމީހުންގެ މަސްލަޙަތު އޮންނަ ކުންފުނިތަކަށް އާރުޑީސީގެ ފައިސާތަކެއް ވަދެފައިވާކަމަށް ތުހުމަތުކުރެވެއެވެ.

މި މައްސަލައިގައި އެ ކުންފުނީގެ ވެރިއެއްގެ އެކައުންޓަކަށް 14 މިލިއަން ރުފިޔާ ޖަމާކޮށްފައިވާކަމަށް ތުހުމަތުކުރެވޭއިރު، ތިން މީހެއްގެ ބައިވެރިވުން އޮތްކަން ޔަގީންކުރެވިފައިވާކަމަށް ފުލުހުން ބުނެއެވެ. މީގެ ތެރެއިން އެކަކުގެ އެކައުންޓަށް 11 މިލިއަން ރުފިޔާ އަދި އިތުރު ދެ މީހެއްގެ އެކައުންޓަށް 4 މިލިއަން ރުފިޔާ ޖަމާކޮށްފައިވާކަމަށްވެސް ފުލުހުން ހާމަކުރިއެވެ.

ފުލުހުންގެ ތަޙުޤީޤުން އިތުރަށް ހާމަވެފައިވާ ގޮތުގައި، މި މައްސަލައިގައި ހިމެނޭކަމަށް ތުހުމަތުކުރެވޭ މީހެއްގެ އެކައުންޓަށް އާރުޑީސީގެ އެކައުންޓުން 216 ޓްރާންސެކްޝަން ހަދާފައިވެއެވެ. މީގެ އިތުރުން، ހިޔާނާތްތެރިވިކަމަށް ބެލެވޭ ފައިސާ ނިމިދިޔަ ސަރުކާރުގެ ބައެއް ވެރިންނާއި އެމީހުންގެ މަސްލަޙަތު އޮންނަ ކުންފުނިތަކަށްވެސް ވަދެފައިވާކަން ތަޙުޤީޤަށް ހާމަވެފައިވާކަމަށް ފުލުހުން ބުނެއެވެ.

މި މައްސަލައާ ގުޅިގެން، މޫސާ އަލިމަނިކާއި ޔާސިރު ހަސަން ދިރިއުޅޭ ގެއާއި، އެ ދެ ފަރާތާ ގުޅުންހުރި ދެތަނެއް ބަލައި ފާސްކޮށް، އިލެކްޓްރޯނިކް ސާމާނުތަކެއް ފުލުހުންގެ ބެލުމުގެ ދަށަށް މި މަހުގެ 27 ވަނަ ދުވަހުގެ ރޭ ގެންގޮސްފައިވާކަމަށް ފުލުހުން ހާމަކުރިއެވެ. ނަމަވެސް، ގެންދެވުނު ތަކެތީގެ ތަފްސީލު ފުލުހުން ހާމަކޮށްފައެއް ނުވެއެވެ.

މި މައްސަލައިގެ ތަޙުޤީޤު ކުރިއަށްދާއިރު، އިތުރު މަޢުލޫމާތު ލިބުމުން އާންމުކުރާނެކަމަށް ފުލުހުން ބުނެއެވެ.