ކަމާލް އަދުވާން ހޮސްޕިޓަލުގައި ރަހީނުކޮށްފައިވާ މީހުންގަޔަށް ކުޅުޖަހާ އެތައްއަނިޔާއެއް ޔަހޫދީން ކޮށްފި

ޣައްޒާގެ ކަމާލް އަދުވާން ހޮސްޕިޓަލަށް އިސްރާއީލު ސިފައިން ދިން ޙަމަލާގައި ހައްޔަރުކުރެވުނު ސަތޭކަ އެތައް މީހުންގެ ތެރެއިން ބައެއް މީހުން ދޫކޮށްލާފައިވާ ކަމަށް ޣައްޒާގެ ޞިއްޙީ ވުޒާރާއިން ބުނެފިއެވެ. ނަމަވެސް، ހޮސްޕިޓަލުގެ ޑިރެކްޓަރ ޙުސާމް އަބޫ ސަފިޔާގެ ހާލު އަދިވެސް ނޭނގޭ ކަމަށް އެ ވުޒާރާއިން މަޢުލޫމާތު ދީފައިވެއެވެ.

ދޫކޮށްލެވުނު މީހުން ކިޔައިދިން ގޮތުގައި، އެމީހުންނަށް އަނިޔާކޮށް، ކުޅުޖަހައި، ހެދުން ބާލުވައި، ގަޑިއިރުތަކެއް ވަންދެން ފިނިގަނޑުގައި ބޭތިއްބުމަށްފަހު ސުވާލުކޮށްފައިވެއެވެ. މި ޙަމަލާއަކީ "ބާބެރިކް" ޢަމަލެއް ކަމަށް ސަރަޙައްދުގެ އިސްވެރިން ސިފަކޮށްފައިވެއެވެ.

އދ. ގެ ދުނިޔޭގެ ޞިއްޙަތު ޖަމްޢިއްޔާ (ޑަބްލިޔު.އެޗް.އޯ) އިން ބުނެފައިވަނީ، އިސްރާއީލުން ޣައްޒާގެ ޞިއްޙީ ނިޒާމު "ނިޒާމީ ގޮތެއްގައި ނައްތާލުމަކީ" ދިހަ ހާސް އެތައް ފަލަސްޠީނުންނަށް ދެވޭ "މަރުގެ ޙުކުމެއް" ކަމަށެވެ. އަދި އދ. ގެ ފަލަސްޠީނު ރެފިއުޖީންގެ އޭޖެންސީ (އަންރުވާ) އިން ގޮވާލާފައިވަނީ "ވަގުތުން" އިންސާނީ އެހީ ފޯރުކޮށްދިނުމަށެވެ. މިހެން ގޮވާލީ ޣައްޒާގައި ކުޑަކުދިން ފިނިން މަރުވަމުންދާތީއެވެ.

2023 ވަނަ އަހަރުގެ އޮކްޓޯބަރު 7 އިން ފެށިގެން އިސްރާއީލުން ޣައްޒާއަށް ދެމުންދާ ހަނގުރާމައިގެ ސަބަބުން މަދުވެގެން 45,484 ފަލަސްޠީނުން މަރުވެ، 108,090 މީހުން ޒަޚަމްވެފައިވެއެވެ. އަދި އެ ދުވަހު ޙަމާސްގެ ޙަމަލާގައި އިސްރާއީލުގެ މަދުވެގެން 1,139 މީހުން މަރުވެ، 200 އަށްވުރެ ގިނަ މީހުން ރަހީނުންގެ ގޮތުގައި ގެންގޮސްފައިވެއެވެ.