ޚަބަރު
ވައިގެމަގުން ރާއްޖެ އެތެރެކުރަން އުޅުނު 5.5 މިލިއަން ރުފިޔާގެ މަސްތުވާތަކެތި ކަސްޓަމްސްއިން ހިފަހައްޓައިފި

ވައިގެމަގުން ރާއްޖެ އެތެރެކުރަން އުޅުނު 5.5 މިލިއަން ރުފިޔާގެ މަސްތުވާތަކެތި ފޮޓޯ:ކަސްޓަމްސް
މިދިޔަ ހޯމަ ދުވަހު ތައިލޭންޑުން ރާއްޖެ އައި ދެ ދިވެހިންގެ އަތުން 2.4 ކިލޯގެ މަސްތުވާތަކެތި ކަސްޓަމްސްއިން ވަނީ އަތުލައިގަނެފައެވެ. މޯލްޑިވްސް ކަސްޓަމްސް ސަރވިސްއިން މަޢުލޫމާތު ދެއްވާފައިވާ ގޮތުގައި، މި ތަކެތި އަތުލައިގަތީ މި މަހުގެ 26 ވަނަ ދުވަހު ތައިލޭންޑުން ރާއްޖެ އައި 41 އަހަރާއި 21 އަހަރުގެ ދެ ދިވެހި ފިރިހެނުންގެ ޢަމަލުތަކާމެދު ޝައްކު އުފެދިގެން، އެ ދެ މީހުން އިތުރަށް ބަލައި ފާސްކުރުމުންނެވެ.
ކަސްޓަމްސްއިން ބުނާ ގޮތުގައި، މި ދެ ފަސިންޖަރުންގެ ހަށިގަނޑުގައި މަސްތުވާތަކެތި ރައްކާކޮށްފައި ހުއްޓާ ވަނީ ފެނިފައެވެ. ފުރަތަމަ މަރުޙަލާގައި ކަސްޓަމްސްއިން މި ތަކެތި ތަޙުލީލުކުރިއިރު، މަސްތުވާތަކެތީގެ ދެ ބާވަތެއް ކަމަށްވާ ހެރޮއިން އަދި މެފެޑްރޯންއަށް ވަނީ ޕޮޒިޓިވް ވެފައެވެ. މި ތަކެތީގެ ބަރުދަނުގައި ޕެކިންއާއެކު ޖުމްލަ 2.4 ކިލޯ ހުރިއިރު، މިއީ މަގުމަތީ އަގުން ގާތްގަނޑަކަށް 5.5 މިލިއަން ދިވެހި ރުފިޔާގެ އަގުހުރި މަސްތުވާތަކެތި ކަމަށް ކަސްޓަމްސްއިން ލަފާކުރެއެވެ.
މި މައްސަލަ އިތުރަށް ތަޙުޤީޤުކުރުމަށްޓަކައި، އަތުލައިގަނެވުނު މަސްތުވާތަކެއްޗާއި މައްސަލައިގައި ޝާމިލްވާ ދެ ފަސިންޖަރުން ވަނީ ދިވެހި ފުލުހުންގެ ޚިދުމަތާ ޙަވާލުކޮށްފައެވެ.