ދުނިޔެ
ދެކުނު ކޮރެއާގެ މަތިންދާބޯޓެއް ވެއްޓި 85 މީހުން މަރުވެއްޖެ

ބޯޓު ވެއްޓުނު ސަރަޙައްދު ފޮޓޯ: އިންޓަނެޓް
ދެކުނު ކޮރެއާގެ ދެކުނު ހުޅަނގު ސަރަހައްދުގައި ހުންނަ މުއާން އިންޓަރނޭޝަނަލް އެއަރޕޯޓުގައި މިއަދު ހެނދުނު 9:00 ގައި ޖެޖޫ އެއަރގެ މަތިންދާބޯޓެއް ވެއްޓި، މިހާތަނަށް 85 މީހުން މަރުވެއްޖެއެވެ. މި ހާދިސާގައި މަރުވި މީހުންގެ ތެރޭގައި 39 ފިރިހެނުންނާއި 46 އަންހެނުން ހިމެނެއެވެ.
ތައިލެންޑުގެ ވެރިރަށް ބެންކޮކުން ދަތުރުކުރި މި މަތިންދާބޯޓުގައި 175 ފަސިންޖަރުންނާއި 6 ކުރޫ މެމްބަރުން ތިއްބެވެ. މަތިންދާބޯޓު ރަންވޭއިން ބޭރުވެ ފާރަކާ ޖެހި އަލިފާން ރޯވިކަމަށް ވަނީ ރިޕޯޓްކޮށްފިއެވެ. މި ހާދިސާގެ ސަބަބު އަދި ސާފުވެފައި ނުވިޔަސް، ދޫނިތަކެއް އިންޖީނުގައި ޖެހުމުގެ ސަބަބުން ކަމަށް ލަފާކުރެވޭކަމަށް މިހާތަނަށް ލިބުނު ރިޕޯޓްތަކުން ދައްކައެވެ.
ޖެޖޫ އެއަރއިން ވަނީ މި ހާދިސާއާ ގުޅިގެން މާފަށް އެދި ބަޔާނެއް ނެރެފައެވެ. އަދި ސަރުކާރުން ވަނީ ހާދިސާގައި މަރުވި މީހުންގެ އާއިލާތަކަށް އެހީތެރިކަން ފޯރުކޮށްދޭނެ ކަމަށް ބުނެފައެވެ. މިއީ 2005 ގައި އުފެދުނު ޖެޖޫ އެއަރގެ ތާރީޚުގައި ހިނގި ފުރަތަމަ މިފަދަ ހާދިސާއެވެ.
ދެކުނު ކޮރެއާގެ ވަގުތީ ރައީސް ޗޮއި ސަންގް-މޮކް ވަނީ ހާދިސާ ހިނގި ސަރަހައްދަށް ޒިޔާރަތްކޮށް، ސަލާމަތްކުރުމުގެ މަސައްކަތަށް އިތުރު އެހީތެރިކަން ފޯރުކޮށްދިނުމަށް އަންގާފައެވެ.