ދިވެހިން ހޭލުންތެރި ތަހުޒީބު ބަޔަކަށް ހެދުމުގައި ދިވެހިރާއްޖޭގެ އަޑުން މުހިންމު ދައުރެއް އަދާކުރޭ :ވަޒީރު އާދަމް ނަޞީރު

ދިވެހިރާއްޖޭގެ އަޑުގެ 62 ވަނަ އަހަރީ ދުވަހުގެ މުނާސަބަތުގައި އެ އިދާރާއިން ގެނެސްދިން ޚާއްޞަ ޕްރޮގްރާމެއްގައި ވާހަކަފުޅު ދައްކަވަމުން، ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހިމް ވިދާޅުވެފައިވަނީ، ހޭލުންތެރި އަދި ތަހުޒީބު ބަޔަކަށް ދިވެހިން ހެދުމުގައި ދިވެހިރާއްޖޭގެ އަޑުން މުހިންމު ދައުރެއް އަދާކޮށްފައިވާ ކަމަށެވެ.

ވަޒީރުގެ ވާހަކަފުޅުގައި، 1962 ވަނަ އަހަރު ފެށުނު ދިވެހިރާއްޖޭގެ ޤައުމީ ރޭޑިއޯ ވަނީ ޒަމާނީ ދުނިޔެއަކަށް ދިވެހިން ހޭލުންތެރިކޮށް، ތަހުޒީބު ބަޔަކަށް ހެދުމުގައި މުހިންމު ބޮޑު ދައުރެއް އަދާކޮށްފައި ކަމަށް ފާހަގަކުރެއްވިއެވެ. އަދި ދިވެހިބަހާއި ސަގާފަތާއި ތަރިކައާއި އާދަކާދައާ ގުޅޭގޮތުން ހޭލުންތެރިކުރުމާއި މަޢުލޫމާތު ފޯރުކޮށްދިނުމުގައި ދިވެމުގައި ދިވެހިރާއްޖޭގެ އަޑުން ބޮޑު އެހީތެރިކަމެއް ލިބޭ ކަމަށްވެސް ވިދާޅުވިއެވެ.

ޚަބަރާއި މަޢުލޫމާތު ފޯރުކޮށްދިނުމުގައިވެސް ދިވެހިރާއްޖޭގެ އަޑުން ވަނީ މުހިންމު ދައުރެއް އަދާކޮށްފައި. ދިވެހިންގެ މުނިފޫހިފިލުވުމަށް ރޭޑިއޯ ޑްރާމާއާއި ތަމްސީލުތަކާއި ވާހަކަތައް ރޭޑިއޯއިން ގެނެސްދޭ. އަދި ވުޒާރާގެ ބައެއް މަސްއޫލިއްޔަތުތަކަށް (ޤައުމިއްޔަތާ ގުޅުންހުރި ދާއިރާތަކުން ހޭލުންތެރިކުރުމަށް) ރޭޑިއޯއިން އެހީވެދޭ

ވަޒީރު އާދަމް ނަޞީރު އިބްރާހިމް

ދިވެހިރާއްޖޭގެ އަޑުގެ ޚިދުމަތް ފެށުނީ 1962 ވަނަ އަހަރުގެ ޑިސެންބަރު މަހުގެ 29 ވަނަ ދުވަހުއެވެ. މިހާރު މި ޚިދުމަތް ދެމުންގެންދާތާ 62 އަހަރު ވެފައިވާއިރު، ދިވެހިން ހޭލުންތެރިކުރުމާއި މުނިފޫހިފިލުވައިދިނުމުގައި މުހިންމު ދައުރެއް އަދާކޮށްފައިވާކަން ވަޒީރުގެ ވާހަކަފުޅުން ފާހަގަކުރެވެއެވެ.