ކުޅިވަރު

އާސެނަލްގައި މޮޅު ކުޅުމެއް ދައްކަމުން އަންނަ ސަކާ ގިނަ ދުވަސްތަކަކަށް ކުޅުމާ ދުރަށް

އާސެނަލްގައި މޮޅު ކުޅުމެއް ދައްކަމުން އަންނަ ސަކާ ގިނަ ދުވަސްތަކަކަށް ކުޅުމާ ދުރަށް

ލީގު ތަށި ކާމިޔާބު ކުރުމަށް އާސެނަލް ކުރަމުން އަންނަ މަސައްކަތުގައި ސަކާއަކީ މުހިންމު ކުޅުންތެރިއެއް

މިފްތާޙް މުޙައްމަދު

މިފްތާޙް މުޙައްމަދު

29 ޑިސެމްބަރު 2024، 08:15

29 ޑިސެމްބަރު 2024، 08:15

ހުލާސާ

ސަކާ ގިނަ ދުވަސްތަކަކަށް ކުޅުމާ ދުރަށް ދާން ޖެހުނު ނަމަވެސް، އޭނާގެ ބަދަލުގައި އައު ކުޅުންތެރިއެއް ހޯދަން މަސައްކަތް ނުކުރާނެކަމަށް އާޓޭޓާ ބުނެފައިވޭ.

އިންގްލިޝް ޕްރިމިއަރ ލީގުގެ ތައްޓަށް ވާދަކުރަމުން އަންނަ އާސެނަލްގެ މުހިންމު އެއް ކުޅުންތެރިއެއް ކަމަށްވާ، ބުކާޔޯ ސަކާއަށް މި މަހުގެ 21 ވަނަ ދުވަހު ލިބިފައިވާ އަނިޔާއާ ގުޅިގެން އޭނާ އެނބުރި އައުމަށް ދެ މަހަށް ވުރެން ގިނަ ދުވަސް ހޭދަވާނެކަމަށް، އާސެނަލްގެ ކޯޗު، މައިކަލް އާޓޭޓާ ބުނެފިއެވެ. އާޓޭޓާ މިހެން ހާމަކުރީ، އާސެނަލް އެންމެ ފަހުން ކުޅުނު މެޗަށްފަހު ނޫސްވެރިންނާ ވާހަކަ ދައްކަމުންނެވެ. 

އާޓޭޓާ ބުނީ، ސަކާގެ ފަޔަށް ލިބުނު އަނިޔާއާ ގުޅިގެން އޭނާ މިހާރު ސާޖަރީއެއް ހަދާފައިވާ ކަމަށާއި، އޭނާއަށް އެންމެ އަވަހަށް ވެސް ޓީމުގެ ފަރިތަކުރުން ތަކުގައި ބައިވެރިވެވޭނީ މި އަންނަ އަހަރުގެ މާޗު މަހުގައި ކަމަށެވެ. 

އާސެނަލްއިން މި ސީޒަނުގައި ވެސް ތައްޓާ ވާދަކުރަމުން އަންނަ އިރު، އުމުރުން 23 އަހަރުގެ ސަކާއަކީ އެ ޓީމުގެ މުހިންމު ކުޅުންތެރިއެކެވެ. އެގޮތުން މި ސީޒަނުގައި އޭނާ ކުޅެފައިވާ 24 މެޗުން 9 ގޯލު ކާމިޔާބު ކޮށްފައިވާއިރު، 13 އެސިސްޓު ކޮށްދީފައިވެއެވެ. 

ހަމައެކަނި ޕްރިމިއަރ ލީގަށް ބަލާނަމަ، އޭނާ އޮތީ ލިވަޕޫލްގެ މުހައްމަދު ސަލާހްއަށް ފަހު، އެންމެ ގިނައިން އެސިސްޓް ކޮށްދީފައިވާ ކުޅުންތެރިންގެ ލިސްޓުގެ 2 ވަނައިގައި 10 އެސިސްޓާއެކުއެވެ. 

ސަކާ ގިނަ ދުވަސްތަކަކަށް ކުޅުމާ ދުރަށް ދާން ޖެހުނު ނަމަވެސް، އޭނާގެ ބަދަލުގައި އައު ކުޅުންތެރިއެއް ހޯދަން މަސައްކަތް ނުކުރާނެކަމަށް އާޓޭޓާ ބުނެފައިވެއެވެ. އަދި އޭނާގެ ބަދަލުގައި އިޕްސްވިޗް މެޗުގައި ބޭނުންކޮށްފައި ވަނީ ގެބްރިއެލް މާޓިނެލީއެވެ. އަދި ޖެނުއަރީ 1 ވަނަ ދުވަހު އެ ޓީމުން ބްރެންޓްފޯޑްއާ ދެކޮޅަށް ކުޅޭ މެޗުގައި ވެސް ބޭނުން ކުރާނީ މާޓިނެލީ ކަމަށް ރިޕޯޓުތައް ބުނެއެވެ.

އާސެނަލް މިހާރު އޮތީ 36 ޕޮއިންޓާއެކު ލީގުގެ ދެވަނައިގައެވެ. އެއްވަނައިގާ އޮތް ލިވަޕޫލަށް އެއް މެޗު މަދުން ކުޅެގެން ލިބިފައި ވަނީ 42 ޕޮއިންޓެވެ. އަދި ތިން ވަނައިގައި އޮތް ޗެލްސީއަށް 35 ޕޮއިންޓު ލިބިފައި އޮތްއިރު، ހަތަރު ވަނައިގައި ނޮޓިންހަމް ފޮރެސްޓް އޮތީ 34 ޕޮއިންޓާއެކުއެވެ. ޓީމުތަކުގެ މެދުގައި މިހާ ކުޑަ ފަރަގެއް އޮތް އިރު، ލީގު ކާމިޔާބު ކުރުމަށް އާސެނަލް ކުރަމުންދާ މަސައްކަތުގައި ކޮންމެ ޕޮއިންޓަކީ ވެސް އެ ޓީމަށް ވަރަށް މުހިންމު ޕޮއިންޓަކަށް ވާނެއެވެ. 

މި ލިޔުން ކިޔާލުމުން

Ads by MSS