ކުޅިވަރު
ކޯޗެއްގެ މަގާމަށް މުރޭ ހަމަޖެއްސިފަހުން ކުޅުމަށް އާރޯކަން ލިބިއްޖެ: ޖޮކޮވިޗް

ޖޮކޮވިޗް އާއި މުރޭ އަކީ ކުރިން ވާދަވެރި ދެ ކުޅުންތެރިން، ފޮޓޯ: ގެޓީ އިމޭޖަސް
ހުލާސާ
އޮސްޓްރޭލިއަން އޯޕަންއަކީ ޖޮކޮވިޗްގެ އޭޓީޕީ ސިންގަލްސް ޓައިޓްލްސްގެ އަދަދު 100 އަށް ހެދުމަށް އޭނާއަށް ލިބޭ ފުރުސަތެއް. އަދި އެ މުބާރާތް އޭނާއަށް ކާމިޔާބު ކުރެވިއްޖެނަމަ، 11 ތައްޓާއެކު މި މުބާރާތް އެންމެ ގިނައިން ކާމިޔާބު ކޮށްގެން ހަދާފައިވާ ރެކޯޑަށް ބޮޅެއް އޭނާއަށް އިތުރު ކުރެވޭނެ.
ސާބިއާގެ ނޯވަކް ޖޮކޮވިޗްގެ ކޯޗަކަށް، ކުރީގައި އޭނާއާ އެންމެ ވާދަވެރި އެއް ކުޅުންތެރިއެއް ކަމަށްވާ އެންޑީ މުރޭ ހަމަޖެއްސިފަހުން، ކުޅުމަށް އާރޯކަން ލިބިއްޖެ ކަމަށް ޖޮކޮވިޗް ބުނެފިއެވެ.
ރެކޯޑު އަދަދަކަށް، 24 ގްރޭންޑް ސްލޭމް ކާމިޔާބުކޮށްފައިވާ ޖޮކޮވިޗް މިހެން ބުނީ، 2025 ވަނަ އަހަރުގެ ސީޒަން މިއަންނަ ހަފްތާގައި ފެށުމަށް ތާވަލުކޮށްފައި ވަނިކޮށެވެ. މި އަންނަ ހަފްތާގައި ކުޅޭ ބްރިސްބޭން އިންޓަނޭޝަނަލްގައި އޭނާ ބައްދަލު ކުރާނީ އޮސްޓްރޭލިއާގެ ރިންކީ ހިޖިކަޓާއާއެވެ.
މީގެ އިތުރުން، ޖެނުއަރީ 12 ގައި ފެށުމަށް ހަމަޖެހިފައިވާ އޮސްޓްރޭލިއަން އޯޕަންއަކީ އައު ސީޒަންގައި ޖޮކޮވިޗް ކުޅޭނެ ފުރަތަމަ މުބާރާތެވެ. މިފަހަރުގެ މުބާރާތަށް ކުރިމަތިލާއިރު، އުމުރުން 37 އަހަރުގެ ޖޮކޮވިޗްއަށް އޮތް އެންމެ ބޮޑު ހިތްހަމަޖެހުމަކީ އޭނާއަށް އިރުޝާދު ދިނުމަށް، ތިން ފަހަރު ގްރޭންޑް ސްލޭމް ކާމިޔާބު ކޮށްފައިވާ މުރޭ ހުރުމެވެ.
މުރޭއަށް ތައުރީފު ކުރަމުން ޖޮކޮވިޗް ބުނީ، ޖޮކޮވިޗްގެ ކުޅުމުގައި ހުރި ރަގަޅު ކަންކަމާއި ނުރަނގަޅު ކަންކަން އެންމެ ރަގަޅަށް ދަންނަ އެކަކީ، އޭނާއާ ކުރިން އެންމެ ވާދަވެރި އެއް ކުޅުންތެރިއެއް ކަމުގައިވާ މުރޭ ކަމަށާއި، އޭނާގެ ކުޅުމުގައި ރަގަޅު ކުރަން ޖެހޭ ކަންކަމަށް މުރޭގެ ރަގަޅު ވިސްނުމެއް އެބަހުރި ކަމަށެވެ.
އަދި އިދިކޮޅު ކުޅުންތެރިން ވެސް މުރޭ ދަސްކޮށްފައިވާ ކަމަށާއި، އެގޮތުން މިހާރުގެ އެންމެ ރަގަޅު ކުޅުންތެރިންނާއި، އަރަމުން އަންނަ ޒުވާން މޮޅެތި ކުޅުންތެރިންގެ ކުޅުން ވެސް މުރޭއަށް އެނގޭކަމަށް ޖޮކޮވިޗް ބުނެފައި ވެއެވެ. އެހެންކަމުން، އެ ކުޅުންތެރިންގެ ހުނަރާއި، ވަކިވަކި ކުޅުންތެރިން ކައިރިން ފައިދާ ނެގޭނެ ގޮތްތައް އެނގިފައި އޮތުމަކީ މުބާރާތްތައް ކާމިޔާބު ކުރުމަށް ލިބޭނެ ވަރަށް ބޮޑު ފައިދާއެއް ކަމަށް އޭނާ ބުނެފައި ވެއެވެ.
މީގެއިތުރުން މުރޭގެ ވިސްނުމާއި، ކާމިޔާބީ ހޯދުމަށް އޭނާ ބޭނުންވާ މިންވަރަކީ، ޖޮކޮވިޗްއަށް ސީޒަންގައި އައު ގްރޭންޑް ސްލޭމްތަކެއް ހާސިލްކުރުމަށް އެހީތެރިވެދޭނެ ކަމެއް ކަމަށާއި، އެކަމަށް ވަރަށް އިންތިޒާރު ކުރެވޭ ކަމަށް ޖޮކޮވިޗް ބުނެފައި ވެއެވެ.
މިދިޔަ އަހަރުގެ އޯގަސްޓު މަހު ރިޓަޔާކުރި މުރޭއާއެކު ޕާޓްނާޝިޕެއް ހަދާފައިވާ ކަމަށް ޖޮކޮވިޗް އިއުލާންކުރީ މިދިޔަ ނޮވެންބަރު މަހުއެވެ.
އޮސްޓްރޭލިއަން އޯޕަންއަކީ ޖޮކޮވިޗްގެ އޭޓީޕީ ސިންގަލްސް ޓައިޓްލްސްގެ އަދަދު 100 އަށް ހެދުމަށް އޭނާއަށް ލިބޭ ފުރުސަތެކެވެ. އަދި އެ މުބާރާތް އޭނާއަށް ކާމިޔާބު ކުރެވިއްޖެނަމަ، 11 ތައްޓާއެކު މި މުބާރާތް އެންމެ ގިނައިން ކާމިޔާބު ކޮށްގެން ހަދާފައިވާ ރެކޯޑަށް ބޮޅެއް އޭނާއަށް އިތުރު ކުރެވޭނެއެވެ.