އޭއެފްސީ ވިމެންސް ޗެމްޕިއަންސް ލީގަކީ ރާއްޖޭގެ އަންހެން ފުޓުބޯޅައަށް އޮތް އުއްމީދެއް: ނިޒާމްބެ

މި އަހަރު އޭޝިއަން ފުޓުބޯޅަ ފެޑެރޭޝަން (އޭއެފްސީ) އިން އަލަށް ފެށި އޭއެފްސީ ވިމެންސް ޗެމްޕިއަންސް ލީގަކީ ރާއްޖޭގައި އަންހެނުންނަށް ހާއްސަ ފުޓުބޯޅަ މުބާރާތްތައް ބޭއްވުމަށް ލިބޭ ހިތްވަރަކަށް ވާނެކަމަށް، ގައުމީ އަންހެން ފުޓުބޯޅަ ޓީމުގެ ކޯޗު، މުހައްމަދު ނިޒާމް (ނިޒާމްބެ) ބުނެފިއެވެ. 

ނިޒާމްބެ މިހެން ބުނީ، ރާއްޖޭގެ އަންހެން ފުޓުބޯޅަ ޓީމުން އެކުވެރިކަމުގެ މެޗުތަކެއް އިންޑިއާގައި ކުޅުމަށް އެ ގައުމަށް ފުރުމުގެ ކުރިން ޕަބްލިކް ސާވިސް މީޑިއާ (ޕީއެސްއެމް) އަށް ދިން އިންޓަވިއުއެއްގައެވެ. 

މި މޭރުމުން ވާހަކަ ދައްކަމުން ނިޒާމްބެ ބުނީ، ރާއްޖޭގައި އަންހެނުންގެ ފުޓުބޯޅަ މުބާރާތެއް ނެތުމަކީ، ޓީމަށް އޮތް ބޮޑު ގޮންޖެހުމެއް ކަމަށާއި، އެކަމުގެ ސަބަބުން ރަގަޅު ޓީމެއް އެކުލަވާލުމަށް "ޗޮއިސް" ތަކެއް ނޯންނަކަމަށް ނިޒާމްގެ ބުންޏެވެ. ނަމަވެސް، އޭއެފްސީ ވިމެންސް ޗެމްޕިއަންސް ލީގަކީ ރާއްޖޭގައި މުބާރާތްތައް ބޭއްވުމަށް ލިބޭ ހިތްވަރަކަށް ވެގެން ދާނެކަމަށް ބުނެފައިވެއެވެ.

ނިޒާމްގެ ފާހަގަކުރި ގޮތުގައި، މިކަމަށް މަސައްކަތް ކުރުމަށް އޮތް ހިތްވަރަކީ، މުބާރާތުގެ ޗެމްޕިއަނުންނަށް އެއް މިލިއަން ޑޮލަރު ހުށަހަޅާފައި އޮތުން ކަމަށާއި، އެހެންކަމުން ރާއްޖޭގެ ޓީމުތަކުން އެކަމަށް މަސައްކަތް ނުކުރަންވީ ސަބަބެއް ނެތް ކަމަށެވެ.

ގައުމީ އަންހެން ފުޓުބޯޅަ ޓީމުން އިންޑިއާގެ ބެންގަލޫރުގައި އެކުވެރިކަމުގެ ދެ މެޗު ކުޅުމަށް ހަމަޖެހިފައިވާއިރު، ގައުމީ ޓީމުން އެންމެ ފަހުން މެޗެއް ކުޅެފައިވަނީ މި އަހަރު އޮތް އަންހެނުންގެ ސާފް ޗެމްޕިއަންޝިޕް މުބާރާތުގައެވެ. 

އޭއެފްސީއިން އަލަށް ތައާރަފްކުރި ޗެމްޕިއަންސް ލީގުގެ މެޗުތައް އަންނަނީ އޮކްޓޯބަރ 6 ވަނަ ދުވަހުން ފެށިގެން ކުޅެމުންނެވެ. 

މުބާރާތުގެ އެއްވަނަ ޓީމަށް އެއް މިލިއަން ޑޮލަރު ހުށަހަޅާފައި ވާއިރު، ރަނަރަޕް ޓީމަށް ލިބޭނީ ފަސް ލައްކަ ޑޮލަރެވެ.