ޚަބަރު
މާލޭގައި ހިންގި އޮޕަރޭޝަނެއްގައި ބަނގުރަލުގެ ވިޔަފާރިކުރާކަމަށް ތުހުމަތުކުރެވޭ މީހަކު ހައްޔަރުކޮށްފި
ހައްޔަރުކުރެވުނު މުޙައްމަދު އަޒްހަމް ސައީދެ ފޮޓޯ:ޕޮލިސް މީޑިއާ
އިންޓެލިޖެންސަށް ލިބުނު މަޢުލޫމާތަކާ ގުޅިގެން ހިންގި އޮޕަރޭޝަނެއްގައި ބަނގުރަލުގެ ވިޔަފާރިކުރާކަމަށް ތުހުމަތުކުރެވޭ މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުން މަޢުލޫމާތު ދެއްވިގޮތުގައި މާލޭގައި ހިންގުނު މި އޮޕަރޭޝަނުގައި ހައްޔަރުކުރެވުނީ ގދ. ގައްދޫ، ރެޑްމާގެ، 33 އަހަރުގެ މުޙައްމަދު އަޒްހަމް ސައީދެވެ. އޭނާ ހައްޔަރުކުރެވުނީ މަޖީދީމަގުންނެވެ. ފުލުހުން އިތުރަށް ވިދާޅުވިގޮތުގައި އޭނާ ދުއްވަމުންދިޔަ ސައިކަލް ބަލައި ފާސްކުރިއިރު، 3 ފުޅި ބަނގުރާ ފެނިފައިވެއެވެ.
ފުލުހުން މަޢުލޫމާތު ދެއްވިގޮތުގައި މި މައްސަލަ އިތުރަށް ތަޙުޤީޤުކުރަމުން ގެންދެއެވެ.
އައު އަހަރާ ދިމާކޮށް، ބަނގުރަލާއި މަސްތުވާތަކެތީގެ މައްސަލަތައް އިތުރުވެދާނެކަމަށް ބެލެވޭތީ، ފުލުހުން ވަނީ މިދިޔަ ހަފުތާގައި ޚާއްޞަ އޮޕަރޭޝަނެއް ފަށާފައެވެ. މި އޮޕަރޭޝަނުގެ ދަށުން މިފަދަ ޤާނޫނާ ޚިލާފު ޢަމަލުތައް ހުއްޓުވުމަށް މަސައްކަތްތަކެއް ކުރަމުންދާކަން ފާހަގަކުރެވެއެވެ.
