މިފްކޯގެ ޗެއާޕަރސަން އަހުމަދު ޝަރީފް މަސްވެރިކަން އިޝްތިހާރުކުރާ ކުންފުންޏަށް ބަދަލުކޮށްފި

ސަރުކާރުގެ މަސް ކުންފުނި މިފްކޯގެ ޗެއާޕަރސަންގެ މަޤާމުގައި ހުންނެވި އަހުމަދު ޝަރީފް އެ މަޤާމުން ވަކިކޮށް، މަސްވެރިކަން އިޝްތިހާރު ކުރުމަށް ސަރުކާރުން އުފެއްދި ކުންފުންޏަށް ބަދަލުކޮށްފިއެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން މިއަދު ހާމަކުރި ގޮތުގައި، ގދ. ތިނަދޫ، ސޯމާ އަހުމަދު ޝަރީފް މިފްކޯގެ ޗެއާޕަރސަންގެ މަޤާމުން ވަކިކުރުމަށްފަހު ބަދަލުކޮށްފައިވަނީ މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ކޯޕަރޭޝަން (އެމްފޯމްޕީސީ) ގެ ޑިރެކްޓަރުންގެ ބޯޑަށާއި ޗެއާޕަރސަންގެ މަޤާމަށެވެ.

އެމްފޯމްޕީސީއަކީ މަސްވެރިކަމުގެ ސިނާޢަތު ކުރިއެރުވުމުގެ ގޮތުން ދިވެހިރާއްޖޭގައި ބާނާ މަހަށް އިތުރު ބާޒާރުތައް ހޯދައި، މާކެޓްކޮށް، ޕްރޮމޯޓް ކުރުމަށް އުފެއްދި ޚާއްޞަ ކުންފުންޏެކެވެ. މި ކުންފުންޏަކީ ރައީސުލްޖުމްހޫރިއްޔާއަށް ކުންފުނީގެ ޤާނޫނުގެ ދަށުން ލިބިވަޑައިގަންނަވާ ބާރުގެ ދަށުން އުފެއްދެވި، ދަރަންޏަށް ޒިންމާވާންޖެހޭ މިންވަރު ކަނޑައެޅިފައިވާ، ސަރުކާރުގެ ސައްތައިން ސައްތަ ހިއްސާ އެކުލެވިގެންވާ ކުންފުންޏެކެވެ.

ސަރުކާރުން ބުނާ ގޮތުގައި މި ކުންފުނި އުފެއްދެވުމުގެ މައިގަނޑު މަޤްޞަދަކީ ރާއްޖޭގެ މަސްވެރިކަމުގެ ސިނާޢަތު އިތުރަށް ފުޅާކޮށް، މުޖުތަމަޢަށް އެ ސިނާޢަތުން ލިބިދޭ މަންފާ އިތުރުކުރުމެވެ. މީގެ ތެރޭގައި އެކުއަރކަލްޗަރ އާއި މެރިކަލްޗަރ ފަދަ ކަނޑުފަޅުގެ އެންމެހާ ވަސީލަތްތަކުން އުފައްދާ އުފެއްދުންތައް ހިމެނޭ ގޮތުން، ރާއްޖޭގައި ކުރާ މަސްވެރިކަމުން އުފައްދާ އުފެއްދުންތައް ބައިނަލްއަޤްވާމީ ބާޒާރުގައި އިޝްތިހާރުކޮށް ޕްރޮމޯޓްކުރުމުގެ މަސައްކަތް ހިމެނެއެވެ.

އިތުރުން، ރާއްޖޭގެ މަސްވެރިކަމަށް ޚާއްޞަ ބްރޭންޑެއް ތަޢާރަފުކޮށް، ޤައުމީ އަދި ބައިނަލްއަޤްވާމީ ބާޒާރަށް ނެރުމާއި، ފެންވަރު ރަނގަޅު އަދި މަތީ އަގު ލިބޭ ތަފާތު ބާޒާރުތަކުގައި ރާއްޖޭގެ މަސްވެރިކަމުގެ އުފެއްދުންތަކަށް ހިއްސާ ހޯދުމަކީވެސް މި ކުންފުނީގެ މަޤްޞަދުތަކުގެ ތެރޭގައި ހިމެނޭ ކަމެކެވެ.