އެމްޑަބްލިޔުއެސްސީގެ ޚިދުމަތްތައް އޮންލައިންކޮށް ފޯރުކޮށްދޭ ޚާއްޞަ ޕޯޓަލެއް ތަޢާރަފްކޮށްފި

މާލޭ ވޯޓާރ އެންޑް ސްވަރޭޖު ކޮމްޕެނީ (އެމްޑަބްލިޔުއެސްސީ) އިން އެ ކުންފުނީގެ ޚިދުމަތްތައް އޮންލައިންކޮށް ފޯރުކޮށްދޭނެ ޚާއްޞަ ޕޯޓަލެއް މިއަދު ތަޢާރަފްކޮށްފިއެވެ. މި ޕޯޓަލް މެދުވެރިކޮށް ކަސްޓަމަރުންނަށް އެމްޑަބްލިޔުއެސްސީގެ އެކި ޚިދުމަތްތަކަށް އެދި ހުށަހެޅުމާއި، އެޕްލިކޭޝަންތައް ކުރިޔަށްދާ މަރުޙަލާތައް ފަސޭހަކަމާއެކު ބަލާލެވޭނެއެވެ.

އޮންލައިން ޕޯޓަލް އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން، އެމްޑަބްލިޔުއެސްސީގެ މެނޭޖިން ޑިރެކްޓަރ ޢަބްދުލް މަތީން މުޙައްމަދު ވިދާޅުވީ، މި ޕޯޓަލަކީ ޢާންމު ރައްޔިތުންނަށް ފޯރުކޮށްދެވޭ ޚިދުމަތްތަކުގެ ފެންވަރު ރަނގަޅުކޮށް، ވީހާވެސް އަވަހަށް ޚިދުމަތްތައް ދިނުމަށް ފަރުމާކޮށްފައިވާ ޕޯޓަލެއް ކަމަށެވެ.

މި އަހަރުގެ ތެރޭގައި 23،000 ކަސްޓަމަރުން އެބަވޭ ކައުންޓަރުން ޚިދުމަތް ހޯދާފައި. 80،000 ކަސްޓަމަރުން ގުޅާފައެބަވޭ. ނަމަވެސް މި ކޯލުތަކާއި މިގޮތަށް ދެވޭ ޚިދުމަތްތައް ޕޯޓަލްގެ ތެރެއިން ވަރަށް ބޮޑަށް މަދުކުރެވޭނެ

މެނޭޖިން ޑިރެކްޓަރ ޢަބްދުލް މަތީން

އެމްޑަބްލިޔުއެސްސީގެ އޮންލައިން ޕޯޓަލް އިފްތިތާޙްކޮށްދެއްވީ އެކުންފުނީގެ މެނޭޖިން ޑިރެކްޓަރ ޢަބްދުލް މަތީން މުޙައްމަދާއި ޗެއަރޕާރސަން ޝަމްޙޫޒާ އަޙުމަދެވެ.

އެމްޑަބްލިޔުއެސްސީން މަޢުލޫމާތު ދެއްވިގޮތުގައި، މި ޕޯޓަލްގެ ޚިދުމަތް ލިބޭނީ އީ-ފާސް ނިޒާމު ބޭނުންކޮށްގެންނެވެ. އަދި މި ޕޯޓަލް މެދުވެރިކޮށް، ކަސްޓަމަރުންނަށް އެމީހުން ހުޅުވާފައިވާ ހުރިހާ އެކައުންޓެއްގެ މަޢުލޫމާތު ބެލޭނެއެވެ. މީގެއިތުރުން، އެއް އެކައުންޓެއް މެދުވެރިކޮށް އެއް ބިލަށްވުރެ ގިނަ ބިލުތަކަށް އެއްފަހަރާ ފައިސާ ދެއްކުމުގެ މަގުވެސް ފަހިވެގެންދާނެއެވެ.

އަދި ސްމާޓް މީޓަރު ހަރުކޮށްފައިވާ ގޭބިސީތަކުގެ ކަސްޓަމަރުންނަށް ވަކިވަކި މީޓަރުތަކުން ފެން ބޭނުންކުރެވިފައިވާ މިންވަރުގެ ތަފުސީލާއި، ފެން މީޓަރުގެ ރީޑިންގެ އިތުރުން ފެން ބިލުތަކުގެ ތަފުސީލުތައްވެސް މި ޕޯޓަލް މެދުވެރިކޮށް ބެލޭނެކަމަށް އެމްޑަބްލިޔުއެސްސީން ވިދާޅުވިއެވެ.

މި އައު ޕޯޓަލްގެ ސަބަބުން އެމްޑަބްލިޔުއެސްސީގެ ޚިދުމަތްތައް އަވަސްވެ، ކަސްޓަމަރުންނަށް ފަސޭހަވެގެންދާނެކަމަށް ބެލެވެއެވެ.މި ޕޯޓަލްގެ ތަޢާރަފާއެކު، ކަސްޓަމަރުންނަށް ގޭގައި ތިބެގެން އެމްޑަބްލިޔުއެސްސީގެ ގިނަ ޚިދުމަތްތަކެއް ލިބިގަތުމުގެ ފުރުޞަތު ލިބިގެންދާނެއެވެ.

އެމްޑަބްލިޔުއެސްސީގެ މެނޭޖިން ޑިރެކްޓަރ ޢަބްދުލް މަތީން މުޙައްމަދު އިތުރަށް ވިދާޅުވި ގޮތުގައި، މި ޕޯޓަލްގެ ސަބަބުން ކުންފުނީގެ މުވައްޒަފުންނަށްވެސް ފަސޭހަތަކެއް ލިބިގެންދާނެއެވެ.

މުވައްޒަފުންނަށް މިހާރު ވަގުތު ލިބިގެންދާނެ އިތުރު ކަންކަމަށް އަހަންމިއްޔަތުކަން ދިނުމަށް. މިސާލަކަށް ކަސްޓަމަރުންނަށް އިތުރަށް އަޅާލުމާއި، ޚިދުމަތުގެ ފެންވަރު އިތުރަށް ރަނގަޅުކުރުމަށް މަސައްކަތްކުރުން

މެނޭޖިން ޑިރެކްޓަރ ޢަބްދުލް މަތީން

މި ޕޯޓަލްގެ ސަބަބުން ކުންފުނީގެ ޚަރަދުތައްވެސް ކުޑަވެގެންދާނެކަމަށް އެމްޑަބްލިޔުއެސްސީން ލަފާކުރެއެވެ. ކަރުދާހުގެ ބޭނުން މަދުވެ، މުވައްޒަފުންގެ ވަގުތު ސަލާމަތްވުމާއެކު، ކުންފުނީގެ ހިންގުން އިތުރަށް ހަރުދަނާވެގެންދާނެކަމަށް ބެލެވެއެވެ.

އެމްޑަބްލިޔުއެސްސީގެ ޗެއަރޕާރސަން ޝަމްޙޫޒާ އަޙުމަދު ވިދާޅުވި ގޮތުގައި، މި ޕޯޓަލަކީ ކުންފުނީގެ ޑިޖިޓަލައިޒޭޝަން މަސައްކަތުގެ މުހިންމު ބައެކެވެ.

އަޅުގަނޑުމެން މި ދަނީ ޒަމާނީ ޓެކްނޮލޮޖީގެ ބޭނުން ހިފައިގެން ކަސްޓަމަރުންނަށް އިތުރު ފަސޭހަތަކެއް ހޯދައިދިނުމަށް މަސައްކަތްކުރަމުން. މި ޕޯޓަލަކީ އެކަމުގެ ފެށުމެއް

ޗެއަރޕާރސަން ޝަމްޙޫޒާ އަޙުމަދެ

އެމްޑަބްލިޔުއެސްސީން އިތުރަށް މަޢުލޫމާތު ދެއްވި ގޮތުގައި، ކުރިއަށް އޮތް ތަނުގައި މި ޕޯޓަލްގެ ޚިދުމަތްތައް އިތުރަށް ފުޅާކުރުމަށް ވަނީ ރޭވިފައެވެ. މީގެ ތެރޭގައި މޮބައިލް އެޕްލިކޭޝަނެއް ތަޢާރަފްކުރުމާއި، އިތުރު އޮންލައިން ޕޭމަންޓް އޮޕްޝަންތައް ތަޢާރަފްކުރުން ހިމެނެއެވެ.

We are excited to announce the launch of new features of MWSC E-portal services with more convenient options. Customers can access the portal and proceed with applications and payments at any time on the link : https://t.co/VS5rRHqQuD#TeamMWSC pic.twitter.com/36Zq2QKHx0

— Male' Water and Sewerage Company Pvt. Ltd. (@MWSC_Official) December 30, 2024