ޗައިނާ އާއި ޔޫރަޕުގެ މަންޒިލްތަކަށް ދަތުރު ކުރުމަށް ގެންނަ ބޮޑު ބޯޓު ދައްކާލުމަށް އެއާ ޝޯއެއް ބާއްވަނީ

މޯލްޑިވިއަންގެ ފުރަތަމަ ވައިޑް-ބޮޑީ އެއަރކްރާފްޓް، އެއަރބަސް އޭ-330 އަށް މަރުހަބާ ކިއުމުގެ ގޮތުން، އަންނަ ހޯމަ ދުވަހު މާލެ އާއި ހުޅުމާލޭގައި އެއަރ ޝޯވ އެއް ބޭއްވުމަށް ތައްޔާރުވަމުން އަންނަ ކަމަށް މޯލްޑިވިއަނުން ބުނެފިއެވެ. 

އެ އެއާރލައިނުން ހާމަކޮށްފައިވާ ގޮތުގައި މި ޝޯވ ބޭއްވުމަށް ހަމަޖެހިފައިވަނީ ހޯމަ ދުވަހުގެ ހަވީރު 5:00 އިން 5:30 އަށް މާލޭގެ އުސްފަސްގަނޑުގެ އިތުރުން، ހުޅުމާލެ ފޭސް 1 އަދި 2 ގެ އިރުމަތި ފަރާތު އަތިރިމަތީގައެވެ. 

ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒުގެ ސަރުކާރަށް އެއް އަހަރު ފުރުން ފާހަގަ ކުރުމުގެ ގޮތުން މިދިޔަ ނޮވެންބަރު މަހު ސޯޝަލް ސެންޓަރުގައި ބޭއްވި ހާއްސަ ރަސްމިއްޔާތުގައި އެ މަނިކުފާނު މިކަމަށް އިޝާރާތް ކުރައްވައި ވިދާޅުވީ، ޖެނުއަރީ މަހުގެ ތެރޭގައި މޯލްޑިވިއަންގެ ފުރަތަމަ ވައިޑް-ބޮޑީ އެއަރކްރާފްޓް ރާއްޖެއަށް ގެންނާނެ ކަމަށާއި، އެ ބޯޓު މެދުވެރިކޮށް ޗައިނާ އާއި ޔޫރަޕަށް މޯލްޑިވިއަންގެ ދަތުރުތައް ފަށާނެ ކަމަށެވެ.

މީގެ ކުރިން ވެސް މޯލްޑިވިއަނުން ވަނީ އެއަރބަސް މަތިންދާބޯޓެއް ބޭނުންކޮށްގެން ޗައިނާ އާއި ސައުތު އެފްރިކާ އަށް ދަތުރުތައް ކޮށްފައެވެ. ނަމަވެސް އޭރު ގެންގުޅުނު މަތިންދާބޯޓަކީ ދިގު ދަތުރުތަކަށް ހާއްސަ ބޯޓަކަށް ނުވުމުން، އޭރުގެ ދަތުރުތައް ކޮށްފައިވަނީ ޓްރާންސިޓް ކޮށްގެންނެވެ.

މޯލްޑިވިއަންގެ ފްލީޓްގައި މިވަގުތު 24 މަތިންދާ ބޯޓު އޮވެއެވެ. އެއީ އެއާބަސް އޭ-320 މަރުކާގެ އެއް ބޯޓާއި، އޭޓީއާރްގެ ހަތަރު ބޯޓާއި، ޑޭޝް މަރުކާގެ ހަ ބޯޓާއި، ޑޭޝް ޓުވިން އޮޓާގެ 11 ބޯޓެވެ. އަދި މިވަގުތު ރާއްޖެއިން ބޭރުގެ ދަތުރުތަކަށް ބޭނުން ކުރަނީ އެއާބަސް އޭ-320 މަރުކާގެ ބޯޓު އެކަންޏެވެ.

މޯލްޑިވިއަނުން މި ހަފްތާގައި ގެންނަ ވައިޑް-ބޮޑީ އެއަރ ކްރާފްޓުގައި 264 ފަސިންޖަރުން އުފުލޭނެއެވެ. އަދި އެއީ ދިގު ދަތުރުތަކަށް ހާއްސަ މަތިންދާ ބޯޓެކެވެ.