ވާދަވެރި މެޗުތަކެއް ނުކުޅެ އިންޑިއާއަށް ދިޔަ އަންހެން ގައުމީ ފުޓުބޯޅަ ޓީމު ބޮޑު ތަފާތަކުން ބަލިވެއްޖެ

ވާދަވެރި މެޗުތަކެއް ކުޅުމުގެ ފުރުސަތެއް ނުލިބި ގިނަ ދުވަސްތަކެއް ވެފައި ވަނިކޮށް، އެކުވެރިކަމުގެ ދެ މެޗު ކުޅުމަށް އެކުލަވާލި ސްކޮޑުން އިންޑިއާގެ ގައުމީ އަންހެން ފުޓުބޯޅަ ޓީމާ ދެކޮޅަށް ކުޅުނު މެޗުގައި، ރާއްޖެކޮޅަށް ގިނަ ގޯލުތަކެއް ޖަހައި 14-0 އިން ބަލިކޮށްފިއެވެ. 

މިއީ މި ދެ ޓީމުގެ މެދުގައި ކުޅުމަށް ހަމަޖެހިފައިވާ އެކުވެރިކަމުގެ ދެ މެޗުގެ ތެރެއިން ފުރަތަމަ މެޗެވެ. ދެވަނަ މެޗު ކުޅުމަށް ހަމަޖެހިފައިވަނީ މި ހަފްތާގެ ބުރާސްފަތި ދުވަހުއެވެ.

އިންޑިއާގެ ބެންގަލޫރުގައި ކުޅުނު މި މެޗުގައި މުޅިން އަލަށް 8 ކުޅުންތެރިއަކު އިންޑިއާގެ ފުރަތަމަ އެގާރާއިގައި ހިމެނުނު އިރު، މެޗުގެ ފުރަތަމަ ހާފުގައި އެ ޓީމުން ވަނީ ރާއްޖެ ކޮޅަށް 8 ގޯލު ކާމިޔާބުކޮށްފައެވެ.  

މި މެޗުގައި އިންޑިއާގެ ޕްޔާރީ ޒާޒާ އާއި އަލަށް ގައުމީ ޓީމުގައި ހިމެނުނު ލިންޑާ ކޮމް ސާޓޯ ވަނީ ހެޓްރިކް ހަދާފައެވެ. އަދި މީގެ ތެރެއިން ލިންޑާ ވަނީ 4 ގޯލު ކާމިޔާބުކޮށްފައެވެ.

އިންޑިއާ ޓީމަށް ދެން ގޯލުތައް ކާމިޔާބުކޮށްދީފައި ވަނީ ނޭހާ، ކާޖޮލް ޑިސޫޒާ، ސަންގިތާ ބަސްފޯރ، ސޮރޮހައިބަމް ރަންޖަނާއަދި ރިމްޕާ ހަލްޑަރއެވެ. މީގެ ތެރެއިން ނޭހާ އާއި ކާޖޮލް ވަނީ ކޮންމެ ކުޅުންތެރިއަކު ދެ ގޯލު ކާމިޔާބުކޮށްފައެވެ.

މިއީ އިންޑިއާގެ ގައުމީ އަންހެން ފުޓުބޯޅަ ޓީމު ހޯދި އެންމެ ތަފާތު ބޮޑު ނަތީޖާތަކުގެ ތެރެއިން ނަތީޖާއެކެވެ. އެ ޓީމުން މިހާތަނަށް އެންމެ ތަފާތު ބޮޑު ނަތީޖާއެއް ހޯދާފައިވަނީ 2010 ގެ ސާފް ޗެމްޕިއަންޝިޕްގައި ބޫޓާންއާ ދެކޮޅަށެވެ. އެ މެޗު އިންޑިއާއިން ކާމިޔާބު ކޮށްފައިވަނީ 18-0 އިންނެވެ.

ރާއްޖޭގެ ޓީމަށް ބޮޑު ބައްޔަކާ ކުރިމަތިލާން ޖެހުނުއިރު، އެންމެ ފަހުން އެ ޓީމުން މެޗެއް ކުޅެފައިވަނީ މި އަހަރު އޮތް އަންހެނުންގެ ސާފް ޗެމްޕިއަންޝިޕް މުބާރާތުގައެވެ.

މިހާތަނަށް ރާއްޖޭގެ އަންހެން ގައުމީ ފުޓުބޯޅަ ޓީމުން އިންޑީއާ އާއި ހަ ފަހަރެއްގެ މަތިން ބައްދަލު ކޮށްފައިވެއެވެ. އޭގެ ތެރެއިން ފަސް މެޗު ކާމިޔާބުކުރީ އިންޑިއާއެވެ. އަދި ރާއްޖެ އެއްވެސް މެޗަކުން މޮޅުވެފައި ނުވާއިރު، 2016 ވަނަ އަހަރުގެ ސައުތު އޭޝިއަން ގޭމްސްގައި މި ދެ ޓީމު ބައްދަލުކުރި މެޗު ވަނީ 0-0 އިން އެއްވަރުވެފައެވެ.

އިންޑިއާގެ ގައުމީ ޓީމުން އެންމެ ބޮޑު ތަފާތަކުން ރާއްޖެ ބަލިކޮށްފައިވަނީ 2014 ވަނަ އަހަރުގެ އޭޝިއަން ގޭމްސްގައެވެ. އެ މެޗުގައި އެ ޓީމުން ރާއްޖެ ކޮޅަށް 15 ގޯލު ޖެހިއިރު، ރާއްޖެ ޓީމަށް އެއްވެސް ގޯލެއް ކާމިޔާބު ކުރެވިފައެއް ނުވެއެވެ.